கொங்குநாட்டை அதிரவிட்ட விஜய்... ஈரோட்டில் தளபதி எடுத்த மாஸ் செல்பி வீடியோ வைரல்

தமிழக வெற்றிக் கழகத்தின் பிரம்மாண்ட பொதுக்கூட்டம் ஈரோட்டில் இன்று நடைபெற்ற நிலையில், அதில் கலந்துகொண்ட தொண்டர்களுடன் விஜய் எடுத்த மாஸ் செல்பி வீடியோ வைரலாகி வருகிறது.

Vijay Mass Selfie Video Viral : தமிழக வெற்றிக் கழகத்தின் (தவெக) நிறுவனர் விஜய், ஈரோட்டில் நடந்த பொதுக்கூட்டத்தில் ஆளும் திமுக அரசை கடுமையாக தாக்கி பேசினார். தவெகவின் வளர்ச்சியைத் தடுப்பதற்காக திமுக பொய்ப்பிரச்சாரம் செய்வதாகவும், "அசிங்கமான அரசியலில்" ஈடுபடுவதாகவும் அவர் குற்றம் சாட்டினார்.

நீட் விலக்கு மற்றும் எரிவாயு சிலிண்டர் மானியம் போன்ற பிரச்சினைகளைக் குறிப்பிட்டு, திமுக தொடர்ந்து பொய்ப்பிரச்சாரங்களை மேற்கொண்டு வருவதாக விஜய் குற்றம் சாட்டினார். "திமுகவும் பிரச்சினைகளும் ஃபெவிகால் போல ஒட்டிக்கொண்டுள்ளன, அவற்றைப் பிரிக்கவே முடியாது" என்று அவர் குறிப்பிட்டார்.

தவெக ஒரு வலுவான அரசியல் மாற்றாக உருவாவதைத் தடுப்பதே ஆளும் கட்சியின் ஒரே நோக்கம் என்று விஜய் கூறினார். "அசிங்கமான அரசியலை என்னால் புரிந்துகொள்ள முடிகிறது, ஆனால் நாங்கள் ஒருபோதும் அப்படிப்பட்ட அரசியலைச் செய்ய மாட்டோம்," என்று அவர் உறுதியாகக் கூறினார்.

தவெகவின் தொலைநோக்குப் பார்வையை பற்றிக்கூறிய விஜய், காஞ்சிபுரம் கூட்டத்தில், ஆட்சிக்கு வந்தால் என்ன செய்வோம் என்பதை தெளிவாகப் பட்டியலிட்டதாகக் கூறினார். நலத்திட்டங்கள் குறித்த தனது நிலைப்பாட்டை தெளிவுபடுத்திய அவர், மானியங்களுக்கு எதிரானவர் அல்ல என்றும், ஆனால் மக்களை "ஓசி" என்று முத்திரை குத்தி திமுக அவதூறு செய்வதைக் கண்டிப்பதாகவும் கூறினார்.

விஜய்யின் மாஸ் செல்பி

தனது மிக வலுவான கருத்துக்களில் ஒன்றாக, திமுகவை ஒரு "தீய சக்தி" என்றும், தவெகவை ஒரு "தூய சக்தி" என்றும் விஜய் மீண்டும் மீண்டும் குறிப்பிட்டார். தமிழ்நாட்டில் தற்போதைய அரசியல் போராட்டம் இந்த இரு சக்திகளுக்கு இடையேதான் நடக்கிறது என்றார். கடந்த கால அரசியலை நினைவு கூர்ந்த விஜய், முன்னாள் முதலமைச்சர் ஜெயலலிதா ஏன் திமுகவிற்கு எதிராக இவ்வளவு கடுமையான நிலைப்பாட்டை எடுத்தார் என்பதை இப்போது புரிந்துகொள்வதாகக் கூறினார்.

தனது உரையை நிறைவு செய்த விஜய், "நான் மக்களுடன் நிற்கிறேன், மக்கள் என்னுடன் நிற்கிறார்கள்" என்று கூறி மக்களுக்குத் தனது ஆதரவைத் தெரிவித்தார். கூட்டத்திற்கு வந்தவர்களைப் பாதுகாப்பாக வீடு திரும்பும்படி கேட்டுக்கொண்டதோடு, தனது வழக்கமான பாணியில், கூட்டத்துடன் ஒரு செல்ஃபி எடுத்துக்கொண்டார். அதனை "ஈரோடு செல்ஃபி" என்று அவர் அழைத்தார். இந்த செல்பி வீடியோவை விஜய் தன்னுடைய இன்ஸ்டாகிராம் பக்கத்தில் பதிவிட்டுள்ளார். பதிவிட்ட ஒரு மணிநேரத்திலேயே 1 மில்லியனுக்கு மேல் லைக்குகளை பெற்று அந்த வீடியோ சாதனை படைத்துள்ளது.