அயன் பட பாணியில் போதைப்பொருளுடன் சிக்கிய நடிகர்... சென்னை விமான நிலையத்தில் கைது

35 கோடி ரூபாய் மதிப்பிலான போதைப் பொருளுடன் விமான நிலையம் வந்த நடிகர் ஒருவரை சென்னை சுங்கத்துறை மற்றும் வருவாய் புலனாய்வு இயக்குநரகம் இணைந்து கைது செய்துள்ளனர்.

Chennai airport drug smuggling : சென்னை விமான நிலையத்தில் கோடிக்கணக்கான ரூபாய் மதிப்புள்ள போதைப்பொருளுடன் பாலிவுட் நடிகர் ஒருவர் கைது செய்யப்பட்டுள்ளார். 3.5 கிலோ கிராம் கொக்கைனுடன் அந்த இளம் நடிகர் பிடிபட்டுள்ளார். இதன் மதிப்பு ரூ.35 கோடியாகும். சென்னை சுங்கத்துறை மற்றும் வருவாய் புலனாய்வு இயக்குநரகம் (டிஆர்ஐ) இணைந்து நடத்திய சோதனையில் இந்த கைது நடவடிக்கை எடுக்கப்பட்டுள்ளது.

கரண் ஜோஹரின் வெற்றிப் படமான 'ஸ்டூடண்ட் ஆஃப் தி இயர்' படத்தில் நடித்த நடிகர் இவர். ஞாயிற்றுக்கிழமை அதிகாலையில் அவர் கைது செய்யப்பட்டார். விமான நுண்ணறிவுப் பிரிவு அதிகாரிகள் அந்த இளம் நடிகரை சோதனையிட்டனர். அவர் சிங்கப்பூரில் இருந்து வந்துள்ளார். அவரது டிராலி பேக்கில் இருந்த ரகசிய அறையில் பிளாஸ்டிக் பைகளில் கொக்கைன் மறைத்து வைக்கப்பட்டிருந்தது கண்டுபிடிக்கப்பட்டது. இந்த பேக்கை கம்போடியாவைச் சேர்ந்த ஒரு தெரியாத நபர் கொடுத்ததாக அந்த நடிகர் கூறியுள்ளார்.

யார் அந்த நடிகர்?

கம்போடியாவில் இருந்து சிங்கப்பூர் வழியாக விமானத்தில் வந்தபோது அந்த நடிகர் பிடிபட்டார். நடிகரின் பெயரை அதிகாரிகள் வெளியிடவில்லை. மும்பை மற்றும் டெல்லிக்கு கடத்துவதற்காக இந்த போதைப்பொருள் கொண்டுவரப்பட்டது தெரியவந்துள்ளது.

கடந்த இரண்டு வாரங்களில் சென்னை விமான நிலையத்தில் நடந்த இரண்டாவது பெரிய போதைப்பொருள் கடத்தல் இதுவாகும். செப்டம்பர் மாதம், சாக்லேட் பெட்டியில் மறைத்து வைக்கப்பட்டிருந்த 5.6 கிலோகிராம் கொக்கைன் சென்னை விமான நிலையத்தில் பறிமுதல் செய்யப்பட்டது. இந்த சம்பவத்தில் எத்தியோப்பியாவைச் சேர்ந்த இருவர் கைது செய்யப்பட்டனர். செப்டம்பர் 16 அன்று, எத்தியோப்பியாவைச் சேர்ந்த ஒருவரிடம் இருந்து 2 கிலோகிராம் கொக்கைன் கைப்பற்றப்பட்டது.