விளம்பரத்தில் 4 செகண்ட்ஸ் நடித்த ஐஸ்வர்யா; ஓவர் நைட்டுல 5,000 போன் கால்ஸ்: பிரஹலாத் கக்கர்

Aishwarya Rai Acts 4 Sec ad : விளம்பர உலக ஜாம்பவான் பிரஹலாத் கக்கர், 1993-ல் வெளியான பெப்சி விளம்பரத்தில் ஐஸ்வர்யா ராயின் சில வினாடி தோற்றம் எப்படி தேசத்தையே கவர்ந்தது என்பதை நினைவு கூர்ந்தார்.

Aishwarya Rai Acts 4 Sec ad : 

விளம்பரத்தில் 4 செகண்ட்ஸ் நடித்த ஐஸ்வர்யா

கடந்த 1990-களில் வெளியான பல விளம்பரங்கள் இன்றும் மக்கள் மனதில் நீங்கா இடம் பிடித்துள்ளன. அவற்றில், அமீர் கான் மற்றும் ஐஸ்வர்யா ராய் பச்சன் நடித்த பெப்சி விளம்பரம் மிகவும் முக்கியமானது. அந்த நேரத்தில், இருவரும் பெரிய நட்சத்திரங்கள் அல்ல. அமீர் கான் சில படங்களில் மட்டுமே நடித்திருந்தார், ஐஸ்வர்யா ராய் கல்லூரியில் படித்துக் கொண்டிருந்தார். சமீபத்தில் ஏஎன்ஐ-க்கு அளித்த பேட்டியில், விளம்பர உலக ஜாம்பவான் பிரஹலாத் கக்கர், 1993-ல் வெளியான பெப்சி விளம்பரத்தில் ஐஸ்வர்யா ராயின் சில வினாடி தோற்றம் எப்படி தேசத்தையே கவர்ந்தது என்பதை நினைவு கூர்ந்தார். 

அப்போது அறியப்படாத கல்லூரி மாணவியாக இருந்த அவருக்கு இந்த விளம்பரம் ஒரு பெரிய திருப்புமுனையை ஏற்படுத்தியதாக அவர் குறிப்பிட்டார். "நடிகர்களைத் தேர்வு செய்வதில்தான் சவாலே இருந்தது... அந்த விளம்பரத்திற்கு ஆட்களைத் தேர்வு செய்ய எங்களுக்கு மூன்று மாதங்கள் ஆனது. கதைக்கு பொருத்தமானவர்கள் தேவைப்பட்டனர். ஐஸ்வர்யா அப்போது பிரபலமாக இல்லை. நான்கு வினாடிகள் மட்டுமே திரையில் தோன்றி, ஒட்டுமொத்த தேசத்தையும் திரும்பிப் பார்க்க வைக்கும் ஒரு பெண் தேவைப்பட்டார். 'வாவ், யார் இந்தப் பெண்?' என்று எல்லோரையும் கேட்க வைக்க வேண்டும். அதுதான் நடந்தது," என்றார் அவர்.

விளம்பரம் வெளியான நாளை நினைவு கூர்ந்த அவர், "விளம்பரம் வெளியான மறுநாள் காலை எனக்கு 5,000 தொலைபேசி அழைப்புகள் வந்தன. 'யார் அந்த சஞ்சு? (விளம்பரத்தில் ஐஸ்வர்யாவின் கதாபாத்திரத்தின் பெயர்) அவர் எங்கிருந்து வருகிறார்?' என்று கேட்டார்கள்," என பிரஹலாத் நினைவு கூர்ந்தார். இந்த வெற்றி விளம்பரத்தின் மூளையாக செயல்பட்ட பிரஹலாத், ஐஸ்வர்யாவின் வசீகரமான கண்கள்தான் தன்னைக் கவர்ந்ததாகவும், அதனால்தான் அவரை 'சஞ்சு' கதாபாத்திரத்தில் நடிக்க வைத்ததாகவும் கூறினார்.

"யாரையும் பார்த்து எனக்கு திருப்தி ஏற்படவில்லை... அவர்களிடம் அந்தத் தரம் இல்லை. சாதாரணமாக சிறப்பாக இருந்தால் மட்டும் போதாது. நான் மிகவும் சிறப்பான ஒருவரைத் தேடிக்கொண்டிருந்தேன். நான்கு வினாடிகளில் உலகையே ஸ்தம்பிக்க வைக்கும் ஒரு முகம். அப்போது, சில பெண்கள் அவரை கண்டுபிடித்தனர். தோளில் ஜோல்னா பை, கிழிந்த ஜீன்ஸ், கலைந்த தலைமுடியுடன்... அவர் ஒரு கட்டிடக்கலை கல்லூரியில் படித்துக் கொண்டிருந்தார்," என்று பிரஹலாத் நினைவு கூர்ந்தார்.

"நான் அவரைப் பார்த்து, 'இவர்தானா?' என்று கேட்டேன். அவர்கள், 'ஒரு மேக்கப் டெஸ்ட் செய்து பார்க்கலாம்' என்றார்கள். என்னைத் தடுத்து நிறுத்தியது, என்னை ஒரு கணம் யோசிக்க வைத்தது அவரது கண்கள். அவரது கண்களைப் பார்த்தபோது, நான் முழு பிரபஞ்சத்தையும் கண்டேன். ஒவ்வொரு மனநிலைக்கும் ஏற்ப அவரது கண்களின் நிறம் மாறியது... சாம்பல், பச்சை, நீலம் என அவரது மனநிலையைப் பொறுத்து நிறம் மாறியது. அது என்னை மயக்கியது. அதனால் நாங்கள் அவருக்கு மேக்கப் டெஸ்ட் செய்து, அவரை அழகுபடுத்தினோம். நாங்கள் அப்படியே வாயடைத்துப் போனோம். அவர் அவ்வளவு வசீகரமானவராக இருந்தார்," என்று அவர் பகிர்ந்து கொண்டார்.

1994-ல் ஐஸ்வர்யா ராய் மிஸ் இந்தியா பட்டம் வெல்வதற்கு முன்பே இந்த பெப்சி விளம்பரம் வெளியானது. நடிகை மஹிமா சவுத்ரியும் இந்த விளம்பரத்தில் நடித்திருந்தார் என்பது குறிப்பிடத்தக்கது.