கொத்தமல்லி

சமையலுக்குத் தேவையான கொத்தமல்லியை நம்ம வீட்டு கிச்சன்லயே வளர்த்தா என்ன? அதுக்கு என்னவெல்லாம் செய்யணும், எதிலெல்லாம் கவனம் தேவைன்னு பார்க்கலாம் வாங்க.

சமையலுக்குப் பயன்படுத்தும் முழு மல்லி விதைகளை இரண்டாக உடைத்துக்கொள்ளுங்கள். விதைகள் தூளாகிவிடாமல் பார்த்துக்கொள்வது முக்கியம்.

இரண்டாக உடைத்த விதைகளை 12 முதல் 24 மணி நேரம் வரை தண்ணீரில் ஊறவைக்க வேண்டும். இப்படிச் செய்தால் விதைகள் சீக்கிரம் முளைக்கும்.

ஒரு பூந்தொட்டி, பிளாஸ்டிக் டப்பா அல்லது காலி பால் பாக்கெட் எடுத்துக்கொள்ளுங்கள். தண்ணீர் வடிந்து போவதற்காக அதன் அடியில் சில துளைகளைப் போட வேண்டும்.

மாட்டுச் சாண உரம் அல்லது மண்புழு உரம், தேங்காய் நார், மண் ஆகியவற்றைச் சம அளவில் கலந்து கொள்ளுங்கள். மண் தளர்வாக இருக்க வேண்டும்.

விதைகளைத் தூவிய பிறகு, அதன் மேல் சுமார் அரை சென்டிமீட்டர் அளவுக்கு மெல்லியதாக மண் அல்லது தேங்காய் நாரைத் தூவி விதைகளை மூட வேண்டும்.

ஒரு ஸ்பிரேயர் கொண்டோ அல்லது கையால் தெளித்தோ மெதுவாகத் தண்ணீர் விடுங்கள். நேரடியாகத் தண்ணீரை ஊற்றினால், விதைகள் மண்ணுக்குள் ஆழமாகச் சென்றுவிடும் அல்லது அடித்துச் செல்லப்படும்.

கொத்தமல்லி முளைப்பதற்கு மிதமான சூரிய ஒளி தேவை. இதை கிச்சன் ஜன்னல் ஓரத்திலோ அல்லது நல்ல வெளிச்சம் வரும் பால்கனியிலோ வைக்கலாம்.

மண்ணில் எப்போதும் லேசான ஈரப்பதம் இருக்க வேண்டும். ஆனால், தண்ணீர் தேங்கி நிற்காமல் பார்த்துக்கொள்ளுங்கள்.

பொதுவாக 7 முதல் 10 நாட்களில் மல்லி விதைகள் முளைக்கத் தொடங்கும். 30 முதல் 45 நாட்களில், நல்ல வாசமான கொத்தமல்லி இலையை உங்கள் கிச்சனிலிருந்தே பறிக்கலாம்.

செடியின் மேல்பகுதியில் உள்ள இலைகளை மட்டும் பறித்தால், கீழிருந்து மீண்டும் புதிய இலைகள் வளர்ந்து கொண்டே இருக்கும்.