யார் இந்த ராஜேஸ்வரி? பழங்குடியின மாணவியின் ஐஐடி சாதனை பயணம்

கல்வராயன் மலைப் பகுதியைச் சேர்ந்த பழங்குடியின மாணவி ராஜேஸ்வரி, JEE மேம்பட்ட தேர்வில் வெற்றி பெற்று IIT-யில் இடம் பிடித்துள்ளார். தந்தையை இழந்த போதும், கடின உழைப்பால் இந்தச் சாதனையைப் படைத்துள்ள அவரை முதல்வர் பாராட்டியுள்ளார்.

கல்வராயன் மலைப் பகுதியிலுள்ள பழங்குடியின சமூகத்தைச் சேர்ந்த மாணவி அ. ராஜேஸ்வரி, JEE மேம்பட்ட (JEE Advanced) தேர்வில் வெற்றி பெற்று, நாட்டிலேயே மிகவும் மதிப்புமிக்க கல்வி நிறுவனமான இந்திய தொழில்நுட்பக் கழகத்தில் (IIT) இடம் பிடித்துள்ளார். இதன் மூலம் ஐஐடி-யில் சேரும் முதல் அரசுப் பழங்குடியினர் உறைவிடப் பள்ளி மாணவி என்ற பெருமையை அவர் பெற்றுள்ளார்.

ராஜேஸ்வரி, சேலம் மாவட்டம், கருமந்துறை கிராமத்தைச் சேர்ந்தவர். கடந்த ஆண்டு புற்றுநோயால் தந்தையை இழந்த நிலையிலும், அவரது கனவை நெஞ்சில் சுமந்து கடினமாகப் படித்து இந்தச் சாதனையைப் படைத்துள்ளார். கருமந்துறையில் உள்ள அரசுப் பழங்குடியினர் உறைவிடப் பள்ளியில் படித்து வந்த ராஜேஸ்வரி, 12 ஆம் வகுப்பில் 600-க்கு 521 மதிப்பெண்களையும், JEE மேம்பட்ட தேர்வில் பட்டியல் பழங்குடியினர் (ST) பிரிவில் அகில இந்திய அளவில் 417 வது இடத்தையும் பிடித்துள்ளார்.

தமிழக முதல்வர் பாராட்டு மற்றும் கல்விச் செலவு:

மாணவி ராஜேஸ்வரியின் இந்தச் சாதனைக்குத் தமிழக முதலமைச்சர் மு.க.ஸ்டாலின் தனது பாராட்டுக்களைத் தெரிவித்துள்ளார். தனது சமூக வலைத்தளப் பதிவில், "தந்தையை இழந்தாலும், அவர் கனவைத் தன் நெஞ்சில் சுமந்து நனவாக்கியிருக்கும் அரசு உறைவிடப் பள்ளி மாணவி ராஜேஷ்வரியின் சாதனைக்கு என் சல்யூட். ராஜேஸ்வரி போன்ற நமது மகள்கள் மேலும் பலர் சேருவதுதான் IIT-க்கு உண்மையான பெருமையாக அமையும்! அதற்காக நமது திராவிட மாடல் அரசு தொடர்ந்து உழைக்கும்" என்று குறிப்பிட்டுள்ளார். மேலும், ராஜேஸ்வரியின் உயர்கல்விச் செலவு முழுவதையும் தமிழக அரசே ஏற்கும் என்றும் அவர் அறிவித்துள்ளார்.

அதிமுக பொதுச் செயலாளர் எடப்பாடி பழனிசாமி உள்ளிட்ட பல்வேறு அரசியல் தலைவர்களும் ராஜேஸ்வரியின் சாதனைக்கு வாழ்த்து தெரிவித்துள்ளனர்.

சவால்களையும் தாண்டி சாதித்த ராஜேஸ்வரி:

ஏழ்மையான பழங்குடி குடும்பத்தைச் சேர்ந்த ராஜேஸ்வரி, தனது ஆசிரியர்களின் வழிகாட்டுதலுக்கும், குடும்பத்தினரின் ஆதரவுக்கும் நன்றி தெரிவித்துள்ளார். தனது சகோதர, சகோதரிகள் படிப்பில் சிறப்பாக இருந்தும் JEE பற்றி அறியாத நிலையில், ஆசிரியர்கள் அளித்த சிறப்புப் பயிற்சி மற்றும் வழிகாட்டுதல் தனக்கு உதவியதாக அவர் கூறியுள்ளார். 10 ஆம் வகுப்பில் 500-க்கு 438 மதிப்பெண்களையும், 12 ஆம் வகுப்பில் 600-க்கு 521 மதிப்பெண்களையும் பெற்ற ராஜேஸ்வரி, உயர்கல்விக்கான பரந்த வாய்ப்புகளைத் திறக்கும் வகையில் கணிதம்-உயிரியல் பிரிவைத் தேர்ந்தெடுத்தார்.

ஆதி திராவிடர் மற்றும் பழங்குடியினர் நலத்துறை மற்றும் அவரது பள்ளி ஆசிரியர்களின் தொடர்ச்சியான முயற்சிகள், பெற்றோர்களுக்கு ஆலோசனை வழங்குதல், விண்ணப்பக் கட்டணங்களை தள்ளுபடி செய்தல், மற்றும் பயிற்சி வகுப்புகளுக்கு ஏற்பாடு செய்தல் போன்ற நடவடிக்கைகள் இந்த வெற்றிக்குக் காரணமாக அமைந்ததாக பள்ளி தலைமை ஆசிரியர் தெரிவித்துள்ளார். ராஜேஸ்வரியின் இந்தச் சாதனை, மேலும் பல பழங்குடி மாணவர்களைப் பெரிய கனவுகளைக் காண ஊக்குவிக்கும் என்று எதிர்பார்க்கப்படுகிறது.