போப் பிரான்சிஸ் உடல்நிலை கவலைக்கிடம்! அடுத்த போப் யார்? எப்படி தேர்வு செய்யப்படுவார்?

போப் பிரான்சிஸ் உடல்நிலை தொடந்து கவலைக்கிடமாக உள்ளது. அடுத்த போப் யார்? எப்படி தேர்வு செய்யப்படுவார்? என்பது குறித்து விரிவாக பார்க்கலாம்.  

போப் பிரான்சிஸ் உடல்நிலை கவலைக்கிடம் 

கத்தோலிக்க திருச்சபை மதத் தலைவரும், வாடிகன் தலைவருமான போப் பிரான்சிஸ் உடல்நிலை கவலைக்கிடமாக உள்ளதாக அறிவிக்கப்பட்டுள்ளது. நிமோனியாவால் பாதிக்கப்பட்ட 88 வயதானா போப் பிரான்சிஸ் கடந்த 14ம் தேதி ரோம் நகரில் உள்ள ஜெமெல்லி மருத்துவமனையில் சிகிச்சைக்காக அனுமதிக்கப்பட்டார்.

''நிமோனியா மற்றும் சிக்கலான நுரையீரல் தொற்றுடன் போப் பிரான்சிஸ் ஒரு வாரமாக மருத்துவமனையில் அனுமதிக்கப்பட்டுள்ளார். இரத்த சோகையுடன் தொடர்புடைய குறைந்த பிளேட்லெட் எண்ணிக்கையை சோதனைகள் காட்டிய பின்னர் அவருக்கு இரத்தமாற்றமும் செய்யப்பட்டது'' என்று வாடிகன் அதிகாரப்பூர்வமாக தெரிவித்துள்ளது.

கிறிஸ்தவர்கள் பிரார்த்தனை 

ரோம் ஜெமெல்லி மருத்துவமனையின் அறுவை சிகிச்சைத் தலைவர் டாக்டர் செர்ஜியோ அல்ஃபியேரி கூறுகையில், ''போப் பிரான்சிஸ் எதிர்கொள்ளும் மிகப்பெரிய அச்சுறுத்தல் சில கிருமிகள் அவரது சுவாச அமைப்பில் இரத்த ஓட்டத்தில் சென்று செப்சிஸை ஏற்படுத்துகின்றன. செப்சிஸ் உறுப்பு செயலிழப்பு மற்றும் மரணத்திற்கு வழிவகுக்கும்'' என்று தெரிவித்துள்ளார். 

போப் பிராசின்ஸ் உடல்நிலை தொடர்ந்து கவலைக்கிடமாக உள்ள நிலையில், உலகமெங்கும் உள்ள கத்தோலிக்க கிறிஸ்தவர்கள் அவர் குணமடைய வேண்டி பிரார்த்தனையில் ஈடுபட்டு வருகின்றனர்.

ராஜினாமா செய்வாரா?

நாளுக்கு நாள் உடல்நிலை மோசமடைந்து வருவதால் போப் பிரான்சிஸ் தனது பதவியை ராஜினாமா செய்வார் என தகவல்கள் வெளியாகி இருக்கின்றன. அவர் ராஜினாமா செய்தால், கடந்த 600 ஆண்டுகளில் போப் பதவியை விட்டு வெளியேறும் இரண்டாவது நபராக அவர் மாறுவார்.  மிகச் சில போப்கள் மட்டுமே தங்கள் பதவியை ராஜினாமா செய்துள்ளனர். 

போப் பெனடிக்ட் XVI 2013 இல் முதுமையை காரணம் காட்டி ராஜினாமா செய்தார். 600 ஆண்டுகளில் ஒரு போப்பின் முதல் ராஜினாமா இதுவாகும். அவருக்கு முன் போப் கிரிகோரி XII 1415ல் ராஜினாமா செய்தார், போப் செலஸ்டின் V 1294ம் ஆன்டிலும் மற்றும் போப் பெனடிக்ட் 1045ம் ஆண்டிலும் ராஜினாமா செய்தனர்.

போப்பின் ராஜினாமா செயல்முறை

போப் ராஜினாமா செயல்முறையின் ஒரு பகுதியாக கார்டினல்கள் கல்லூரிக்கு போப் ராஜினாமா கடிதத்தை சமர்ப்பிக்க வேண்டும். நியதிச் சட்டத்தின் கீழ், இந்த ராஜினாமா விருப்பத்தை சுதந்திரமாக வெளிப்படுத்தப்பட வேண்டும். பயம் அல்லது மோசடியின் கீழ் கொடுக்கப்படும் ராஜினாமா செல்லாது என அறிவிக்கப்படும் அல்லது ஏற்றுக் கொள்ளப்படாது. 

அடுத்த போப் எப்படி தேர்வு செய்யப்படுவார்?

ராஜினாமா செய்வதற்கு போப் மனரீதியாக ஆரோக்கியமாக இருப்பதும் அவசியம். போப் பிரான்சிஸ் ராஜினாமா செய்தால் அடுத்த போப்பை தேர்வு செய்ய ஒரு மாநாடு கூட்டப்படும். போப்பின் மரணம் அல்லது ராஜினாமாவுக்குப் பிறகு கார்டினல்கள் மத்தியில் இருந்து அடுத்த போப் தேர்வு செய்யப்படுவார். அதாவது போப்பின் நெருங்கிய ஆலோசகர்களான கார்டினல்களில் ஒருவரே அடுத்த போப் ஆக மாறுவார். 

போப் பிரான்சிஸ் 2013ல் போப்பாக தேர்ந்தெடுக்கப்பட்ட உடனேயே ஒரு ராஜினாமா கடிதத்தை அப்போதைய வாடிகன் வெளியுறவு செயலாளர் கார்டினல் டார்சிசியோ பெர்டோனிடம் கொடுத்தார். அதில் 'மருத்துவ காரணங்களுக்காகவோ அல்லது வேறு ஏதேனும் காரணத்திற்காகவோ நான் ராஜினாமா செய்ய வந்தால் அதை ஏற்றுக்கொள்ள வேண்டும்' என்று கூறப்பட்டுள்ளது. 

போப் கத்தோலிக்க திருச்சபையின் உச்ச மதத் தலைவராகக் கருதப்படுகிறார். அவர் எடுக்கும் முடிவுகளை உலகெங்கிலும் உள்ள மில்லியன் கணக்கான கத்தோலிக்கர்கள் பின்பற்றி வருவது குறிப்பிடத்தக்கது.