உலகில் முதல்முறை! சோமாலிலாந்தை தனி நாடாக அங்கீகரித்த இஸ்ரேல்.. கொதிக்கும் அரபு நாடுகள்!

சுமார் 34 ஆண்டுகளாகத் தனி நாடாக இயங்கி வரும் சோமாலிலாந்தை, இஸ்ரேல் அதிகாரப்பூர்வமாக ஒரு சுதந்திர நாடாக அங்கீகரித்துள்ளது. இந்த முடிவிற்கு சோமாலியா, அமெரிக்கா உள்ளிட்ட நாடுகள் எதிர்ப்பு தெரிவித்துள்ளன.

ஆப்பிரிக்காவின் ஹார்ன் ஆஃப் ஆப்பிரிக்கா (Horn of Africa) பகுதியில் அமைந்துள்ள சோமாலிலாந்தை ஒரு இறையாண்மை கொண்ட சுதந்திர நாடாக இஸ்ரேல் அதிகாரப்பூர்வமாக அங்கீகரித்துள்ளது. சுமார் 34 ஆண்டுகளாகத் தனி நாடாக இயங்கி வந்தாலும், உலக அளவில் சோமாலிலாந்தை அங்கீகரிக்கும் முதல் நாடு இஸ்ரேல் ஆகும்.

இஸ்ரேல் பிரதமர் பெஞ்சமின் நெதன்யாகு இந்த முடிவை உறுதிப்படுத்தியுள்ளார். மேலும், இரு நாடுகளுக்கும் இடையே தூதரக உறவுகளை ஏற்படுத்தவும் இஸ்ரேல் திட்டமிட்டுள்ளது.

சோமாலிலாந்த் உருவானது எப்படி?

சோமாலியாவில் ஏற்பட்ட உள்நாட்டுப் போர் மற்றும் மத்திய அரசு வீழ்ந்ததைத் தொடர்ந்து, 1991-ஆம் ஆண்டில் சோமாலிலாந்த் தன்னைப் பிரித்துக் கொண்டது.

அங்கீகாரம் இல்லாத போதிலும், கடந்த 30 ஆண்டுகளுக்கும் மேலாக சோமாலிலாந்த் தனக்கெனத் தனி நாடாளுமன்றம், அதிபர், காவல்துறை, ராணுவம், நாணயம் (சோமாலிலாந்த் ஷில்லிங்) மற்றும் பாஸ்போர்ட் ஆகியவற்றை வைத்துக்கொண்டு ஒரு முழுமையான நாடாகச் செயல்பட்டு வருகிறது.

ஏடன் வளைகுடாவில் உள்ள 'பெர்பெரா' (Berbera) துறைமுகம் மூலம் சர்வதேச வர்த்தகத்தில் இது முக்கியப் பங்கு வகிக்கிறது.

எதிர்ப்பு கிளம்பியது ஏன்?

சோமாலியாவின் ஒரு பகுதியாகவே சோமாலிலாந்தை ஐக்கிய நாடுகள் சபை (UN) மற்றும் ஆப்பிரிக்க ஒன்றியம் (AU) இதுவரை கருதி வருகின்றன. இஸ்ரேலின் இந்த அறிவிப்புக்கு கடும் எதிர்ப்பு கிளம்பியுள்ளது:

இது தனது இறையாண்மையை மீறும் செயல் என்றும், இஸ்ரேல் இந்த முடிவைத் திரும்பப் பெற வேண்டும் என்றும் ஆவேசமாகக் கூறியுள்ளது.

சவுதி அரேபியா, எகிப்து, கத்தார், குவைத், ஈராக் மற்றும் ஜோர்டான் உள்ளிட்ட நாடுகள் இது சர்வதேச சட்டத்திற்கு எதிரானது எனச் சாடியுள்ளன.

இஸ்ரேலின் இந்த முடிவை அமெரிக்கா பின்பற்றாது என அதிபர் டொனால்டு டிரம்ப் திட்டவட்டமாகத் தெரிவித்துள்ளார். "சோமாலிலாந்த் என்றால் என்னவென்று யாருக்காவது தெரியுமா?" என்று அவர் கிண்டலாகக் கேள்வி எழுப்பியுள்ளார்.

ஏன் இத்தனை காலதாமதம்?

சோமாலிலாந்த் அதிபர் அப்திரஹ்மான் முகமது அப்துல்லாஹி இஸ்ரேல் தங்களுக்கு அளித்துள்ள அங்கீகாரம் வரலாற்றுச் சிறப்புமிக்க வெற்றி எனக் கூறியுள்ளார். இஸ்ரேலுடன் மூலோபாயக் கூட்டுறவு ஏற்படப் போவதாகவும், மற்ற நாடுகளும் விரைவில் தங்களை அங்கீகரிக்கும் என நம்புவதாகவும் அவர் தெரிவித்துள்ளார்.

ஏற்கனவே இருக்கும் ஒரு நாட்டின் எல்லையை மாற்றினால், அது மற்ற பிரிவினைவாத இயக்கங்களுக்கு ஊக்கமளிக்கும். அது ஆப்பிரிக்கப் பிராந்தியத்தில் அமைதியைக் குலைக்கும். இதனால், இத்தனை ஆண்டுகளாக உலக நாடுகள் சோமாலிலாந்தை அங்கீகரிக்கத் தயங்கி வந்தன. இப்போது இஸ்ரேல் எடுத்துள்ள இந்தத் துணிச்சலான முடிவு உலக அரசியலில் ஒரு புதிய விவாதத்தைத் தொடங்கியுள்ளது.