Jothimani : அரசியல்ல இதெல்லாம் சாதாரணமப்பா... திமுகவில் இருந்து தவெக கூட்டணிக்கு தாவியது பற்றி ஜோதிமணி கருத்து

Congress TVK Alliance : தமிழ்நாட்டில் தவெக உடன் காங்கிரஸ் கூட்டணி அமைத்ததை திமுக விமர்சித்த நிலையில், 'அரசியலில் கூட்டணிகள் அமைவதும் பிரிவதும் சகஜம்' என்று காங்கிரஸ் எம்.பி. ஜோதிமணி பதிலடி கொடுத்துள்ளார்.

தமிழ்நாட்டில், நடிகர் விஜய்யின் தமிழக வெற்றி கழகத்துடன் (தவெக) காங்கிரஸ் கூட்டணி அமைத்ததை திராவிட முன்னேற்றக் கழகம் (திமுக) கடுமையாக விமர்சித்தது. இந்த நிலையில், "அரசியலில் கூட்டணிகள் அமைவதும், பிரிவதும் சகஜம்தான்" என்று கூறி, காங்கிரஸ் எம்.பி. ஜோதிமணி புதன்கிழமை அன்று தங்கள் கட்சியின் முடிவை நியாயப்படுத்தியுள்ளார்.

இதுகுறித்து X தளத்தில் ஒரு விரிவான பதிவை வெளியிட்ட ஜோதிமணி, 2014-ல் நடந்த ஒரு சம்பவத்தை நினைவுகூர்ந்தார். அப்போது, நீண்டகால கூட்டணியில் இருந்த காங்கிரஸை திமுக "வெளியேற்றியதால்", தனித்துப் போட்டியிட வேண்டிய கட்டாயம் ஏற்பட்டதாக அவர் குறிப்பிட்டார். அந்த நேரத்தில் நாங்கள் திமுகவை விமர்சிக்கவில்லை, அதை ஒரு "அரசியல் நகர்வாகவே" கருதினோம் என்றும் அவர் கூறியுள்ளார்.

"அரசியலில் கூட்டணிகள் அமைவதும் பிரிவதும் இயல்பானது. 2014 நாடாளுமன்றத் தேர்தலுக்கு ஒரு வாரத்திற்கு முன்பு கூட, நீண்டகால கூட்டணியில் இருந்து காங்கிரஸ் கட்சியை திமுக வெளியேற்றியது. நாங்கள் திடீரென தனித்துப் போட்டியிடும் நிலைக்குத் தள்ளப்பட்டோம். அதற்காக நாங்கள் திமுகவை கடுமையாக விமர்சிக்கவில்லை. அதை ஒரு அரசியல் நிலைப்பாடாகப் புரிந்துகொண்டோம்," என்று ஜோதிமணி தெரிவித்துள்ளார்.

காங்கிரஸ் எம்பி ஜோதிமணி பளீச் பதிலடி

ஒரு கூட்டணிக்குள் கட்சிகளிடையே "ஏற்ற இறக்கங்கள்" இருப்பது இயல்புதான் என்று சுட்டிக்காட்டிய ஜோதிமணி, தவெக உடனான இந்த கூட்டணி மாநிலத்தின் நலனுக்காகவே அமைக்கப்பட்டது என்று உறுதியாகக் கூறினார். "காங்கிரஸ் கட்சி நீண்ட காலமாக திமுகவுடன் கூட்டணியில் பயணித்து வருகிறது. கூட்டணியில் இருக்கும்போது ஏற்ற தாழ்வுகள் இருக்கத்தான் செய்யும். நானே பொதுவெளியில் மோதியிருக்கிறேன். இப்போது, தமிழ்நாட்டின் நலனையும் எதிர்காலத்தையும் மனதில் கொண்டு, தமிழக காங்கிரஸ் கமிட்டி ஒருமனதாக தவெகவுடன் கூட்டணி சேர முடிவு செய்துள்ளது," என்று ஜோதிமணி எழுதியுள்ளார்.

கூட்டணியில் இருந்து "பரஸ்பர மரியாதையுடன்" பிரிவதன் முக்கியத்துவத்தை வலியுறுத்திய கரூர் எம்.பி., இந்த நிகழ்வுக்குப் பிறகு காங்கிரஸும் திமுகவும் கடுமையான வார்த்தைகளைப் பயன்படுத்தக் கூடாது என்று குறிப்பிட்டார்.

திமுக தலைவர் மு.க. ஸ்டாலின் அவர்களே தேர்தலில் தோல்வியடைந்திருக்கும் இந்த நேரத்தில், நேற்று வரை கூட்டணியில் இருந்துவிட்டு, இன்று மிகக் கடுமையாக விமர்சிப்பது காங்கிரஸின் "அரசியல் நாகரிகமோ அல்லது கலாச்சாரமோ" அல்ல என்றும் அவர் கூறினார்.

"இப்போது, காங்கிரஸ் கட்சி ஒரு அரசியல் நிலைப்பாட்டை எடுக்க வேண்டிய கட்டாயத்தில் உள்ளது. எனவே, நாம் பரஸ்பர மரியாதையுடன் கூட்டணியில் இருந்து பிரிவது நல்லது. இரு தரப்பிலும் கடுமையான வார்த்தைகளைப் பயன்படுத்துவதைத் தவிர்க்க வேண்டும். குறிப்பாக, திமுக தேர்தலில் தோல்வியை சந்தித்துள்ள தற்போதைய சூழ்நிலையில் - அதுவும் மாண்புமிகு முதலமைச்சர், அண்ணன் திரு. மு.க. ஸ்டாலின் அவர்களே தோல்வியடைந்திருக்கும் போது - நேற்று வரை கூட்டணியில் இருந்துவிட்டு, இன்று மிகக் கடுமையாக விமர்சிப்பது அரசியல் நாகரிகமும் அல்ல, காங்கிரஸின் கலாச்சாரமும் அல்ல," என்று ஜோதிமணி கூறியுள்ளார்.

காங்கிரஸ் கட்சி கடந்த மூன்று நாடாளுமன்றத் தேர்தல்களில் சந்தித்த தொடர் தோல்விகளையும் சுட்டிக்காட்டிய அவர், அதற்கு "பல்வேறு காரணங்கள்" இருந்ததாகவும், இந்த காரணத்திற்காக எந்தக் கட்சியாவது எங்களுடன் கூட்டணி வைக்க மாட்டோம் என்று சொன்னால், எங்களால் தேசிய அளவில் 'இந்தியா' கூட்டணியை வழிநடத்த முடியாது என்றும் குறிப்பிட்டார். "காங்கிரஸ் கட்சியும் தொடர்ந்து மூன்று நாடாளுமன்றத் தேர்தல்களில் தோல்விகளைச் சந்தித்துள்ளது. அதற்குக் தேசிய அளவில் பல்வேறு காரணங்கள் உள்ளன. அதன் காரணமாக யாரும் கூட்டணி அமைக்கக் கூடாது என்ற நிலைப்பாட்டை எடுத்தால், காங்கிரஸ் கட்சியால் தேசிய அளவில் 'இந்தியா' கூட்டணியை வழிநடத்த முடியாது," என்றார் ஜோதிமணி.

மேலும், மக்களவை எதிர்க்கட்சித் தலைவர் ராகுல் காந்திக்கு யாரிடமிருந்தும் "நற்சான்றிதழ்" தேவையில்லை என்றும், அவரது பலம் நாட்டுக்கே தெரியும் என்றும் ஜோதிமணி வலியுறுத்தினார். "அதேபோல், எங்கள் தலைவர் ராகுல் காந்திக்கு யாரிடமிருந்தும் நாங்கள் நற்சான்றிதழ் எதிர்பார்க்கவில்லை. இந்த நாட்டில் பாஜகவின் பாசிச ஆட்சியை சமரசமின்றி எதிர்த்து வீழ்த்தும் பலம் கொண்ட ஒரே தலைவர் அவர்தான் என்பது நாட்டுக்கே தெரியும். இதை நினைவில் கொள்ளுங்கள்: யாராக இருந்தாலும் சரி, அவரைப் பற்றி அவதூறாகப் பேசினால் நாங்கள் அதை ஏற்றுக்கொள்ளவோ, அமைதியாகப் பார்த்துக் கொண்டிருக்கவோ மாட்டோம்," என்றார் அவர்.

மாநிலத்தில் அடுத்த அரசாங்கத்தை அமைப்பதற்கு தவெக-வுக்கு காங்கிரஸ் தனது ஆதரவை அறிவித்ததைத் தொடர்ந்து இந்த கருத்துக்கள் வந்துள்ளன. மாநிலத் தலைவர் கே.செல்வபெருந்தகை, பொறுப்பாளர் கிரிஷ் சோடங்கர் உள்ளிட்ட தமிழக காங்கிரஸின் பல மூத்த தலைவர்கள், தவெக தலைவர் விஜய்யை அவரது கட்சித் தலைமையகத்தில் சந்தித்து கூட்டணியை உறுதி செய்தனர். காங்கிரஸின் 5 இடங்கள் மற்றும் தவெக-வின் 108 இடங்களுடன், இந்த கூட்டணியின் பலம் 113 ஆக உள்ளது. பெரும்பான்மைக்கு 118 இடங்கள் தேவைப்படும் நிலையில், இன்னும் 5 இடங்கள் குறைவாக உள்ளது. அதற்கு யாருடன் தவெக கூட்டணி அமைக்கப் போகிறது என்பதை பொறுத்திருந்து பார்க்கலாம்.