பதவி காலியாகனுமா...? - அமைச்சர்களை எச்சரித்த தங்க தமிழ்செல்வன்...!

The inquiry into the death of J has to be transparent

ஜெ மரணம் குறித்து விசாரணை வெளிப்படை தன்மையுடன் நடைபெற வேண்டும் எனவும் அதிமுக வலுப்பெறுவதற்கு விசாரணை கமிஷன் உறுதுணையாக இருக்கும்  எனவும் டிடிவி ஆதரவாளர் தங்க தமிழ்செல்வன் தெரிவித்துள்ளார். 

முன்னாள் முதலமைச்சர் ஜெயலலிதா உடல்நலக்குறைவு காரணமாக சென்னையில் உள்ள அப்போலோ மருத்துவமனையில் கடந்த ஆண்டு செப்டம்பர் 22 ஆம் தேதி அனுமதிக்கப்பட்டார். 

அவர் 75 நாட்கள் அப்போலோ மருத்துவமனையில் சிகிச்சை பெற்று வந்தார். ஆனால் அந்த நாட்கள் முழுவதும் யாரும் மருத்துவமனைக்குள் அனுமதிக்கப்படவில்லை. 

இதனிடையே அதிமுக அமைச்சர்கள் ஜெயலலிதா உடல் நலம் தேறி வருவதாகவும், சிகிச்சையில் நல்ல முன்னேற்றம் இருப்பதாகவும், இட்லி போன்ற உணவுகள் உட்கொண்டார் எனவும் தகவல்களை வெளியிட்டனர்.

ஆனால் 75நாள் சிகிச்சைக்கு பிறகு ஜெயலலிதா இறந்த நிலையிலேயே மருத்துவமனையில் இருந்து வெளியே வந்தார். 

இதையடுத்து சசிகலாவிடம் பதவிக்காக சண்டை போட்டு வெளியேறிய ஒபிஎஸ் ஜெ மரணத்தில் மர்மம் இருப்பதாக தர்ம யுத்தத்தை நடத்தி வந்தார். 

சசிகலா சொத்து குவிப்பு வழக்கில் சிறைக்கு சென்றதும் அவரால் நியமிக்கப்பட்ட டிடிவியை ஓரங்கட்டிவிட்டு ஒபிஎஸ்சை சேர்த்து கொண்டார் முதலமைச்சராக தேர்வான எடப்பாடி. 

ஆனால் ஒபிஎஸ் விசாரணை கமிஷன் அமைக்க வேண்டும் என வலியுறுத்தி வந்தார். இதனால் விசாரணை கமிஷன் அமைக்கப்படும் என முதலமைச்சர் தெரிவித்தார். 

அதன்படி தற்போது ஓய்வு பெற்ற நீதிபதி ஆறுமுகசாமி தலைமயில் விசாரணை கமிஷன் அமைக்கப்பட்டுள்ளது. 

இந்நிலையில், செய்தியாளர்களை சந்தித்த டிடிவி ஆதரவாளர் தங்க தமிழ்செல்வன், ஜெ மரணம் குறித்து விசாரணை வெளிப்படை தன்மையுடன் நடைபெற வேண்டும் எனவும் அதிமுக வலுப்பெறுவதற்கு விசாரணை கமிஷன் உறுதுணையாக இருக்கும்  எனவும் தெரிவித்தார். 

மேலும், ஆளுநர் அமைச்சர்கள் எல்லாம் ஜெயலலிதாவை மருத்துவமனையில் சந்தித்ததாக கூறியிருந்தனர். ஆனால் அமைச்சர்கள் பேசுவதை பார்த்தால் எனக்கு சிரிப்பாகதான் வருகிறது எனவும், முன்னுக்கு பின் முரணாக பேசும் அமைச்சர்கள் பதவி விலக நேரிடும் எனவும் தமிழ்செல்வன் எச்சரித்தார்.