புதுச்சேரி ஜிப்மர் மெடிக்கல் காலேஜ்ஜா.? இந்தி ஸ்கூல்லா..? கடுப்பில் வைகோ எடுத்த அதிரடி முடிவு..!

அந்தச் சுற்றறிக்கையை அவர் உடனே திரும்பப் பெற வேண்டும். அந்த இயக்குநரை இந்தி பேசும் மாநிலத்துக்குப் பணியிட மாற்றம் செய்ய வேண்டும்.

மருத்துவம் கற்பிப்பதற்குப் பதிலாக ஜிப்மர் மருத்துவ ஆராய்ச்சி நிறுவனத்தை இந்தி பள்ளிக்கூடம் ஆக்க முயற்சிக்கிறார் என்று மதிமுக பொதுச்செயலாளர் வைகோ தெரிவித்துள்ளார்.

ஜிப்மரில் இந்தி அலுவல் மொழி

இது தொடர்பாக வைகோ அறிக்கை ஒன்றை வெளியிட்டுள்ளார். அதில், “எப்பாடுபட்டேனும் தமிழர்கள் மீது இந்தியைத் திணித்துவிட வேண்டும் என்பதற்காக, நரேந்திர மோடி தலைமையிலான பாஜக அரசு அனைத்து வழிகளிலும் கடுமையான முயற்சிகளை மேற்கொண்டு வருகிறது. அதன் ஒரு கட்டமாக, புதுச்சேரியில் உள்ள ஜவஹர்லால் நேரு முதுகலை மருத்துவக் கல்வி மற்றும் ஆராய்ச்சி நிலையம் ஜிப்மர் இயக்குநர் ஒரு சுற்றறிக்கையை வெளியிட்டு இருக்கிறார். ஜிப்மர் அலுவலகக் கோப்புகள் அனைத்தையும், எதிர்காலத்தில் இந்தி மொழியில் மட்டுமே எழுத வேண்டும் என்று அவர் ஆணை பிறப்பித்து இருக்கிறார். 

மதிமுக கண்டன ஆர்ப்பாட்டம்

மருத்துவம் கற்பிப்பதற்குப் பதிலாக ஜிப்மர் மருத்துவ ஆராய்ச்சி நிறுவனத்தை இந்தி பள்ளிக்கூடம் ஆக்க முயற்சிக்கிறார். எந்த வழியில் நுழைய முயற்சித்தாலும் இந்தியை விரட்டியடித்து தமிழைக் காக்க வேண்டியது தமிழரின் கடமை  ஆகும். அந்தச் சுற்றறிக்கையை அவர் உடனே திரும்பப் பெற வேண்டும். அந்த இயக்குநரை இந்தி பேசும் மாநிலத்துக்குப் பணியிட மாற்றம் செய்ய வேண்டும் என்பதை வலியுறுத்தி வருகின்ற மே 10 செவ்வாய்க்கிழமை காலை 10 மணியளவில், புதுச்சேரி ஜிப்மர் நுழைவாயில் முன்பு மதிமுக சார்பில், துணைப் பொதுச் செயலாளர் செஞ்சி ஏ.கே. மணி தலைமையில் கண்டன ஆர்ப்பாட்டம் நடைபெறும்.

எதிரிகளுக்கு வைகோ எச்சரிக்கை

‘பொங்கு தமிழர்க்கு இன்னல் விளைவித்தால் சங்காரம் நிசமென்று சங்கே முழங்கு; எங்கள் பகைவர் எங்கோ மறைந்தார் இங்குள்ள தமிழர் ஒன்றாதல் கண்டே’ என்ற பாவேந்தர் வாழ்ந்த மண்ணில், தமிழ் உணர்வாளர்கள் அனைவரும் எழுச்சியுடன் ஆர்ப்பாட்டத்தில் பெருந்திரளாகப் பங்கேற்று, எதிரிகளுக்கு எச்சரிக்கை விடுக்க வேண்டும் எனக் கேட்டுக்கொள்கின்றேன்.'' என்று அறிக்கையில் வைகோ தெரிவித்துள்ளார்.