கேலக்ஸி நோட் 7 வாடிக்கையாளர்களுக்கு சாம்சங் புதிய சலுகை அறிவிப்பு

கேலக்ஸி நோட் 7 வாடிக்கையாளர்களுக்கு கேலக்ஸி நோட் 8 ஸ்மார்ட்போனை பாதிவிலைக்கு வழங்க உள்ளதாக சாம்சங் நிறுவனம் அறிவித்துள்ளது.

தென்கொரிய நிறுவனமான சாம்சங்கின் கேலக்ஸி நோட் 7 மாடலில் பயன்படுத்தப்படும் பேட்டரிகள் தீப்பிடித்து எரிந்ததாக பல்வேறு புகார்கள் எழுந்தன. இதனால் சுமார் 2.5 மில்லியன் வாடிக்கையாளர்களிடமிருந்து கேலக்ஸி நோட் 7 மாடல் போனை சாம்சங் நிறுவனம் திரும்பப்பெற்றது. மேலும், கேலக்ஸி நோட் 7 விற்பனையை நிரந்தரமாகத் தடை செய்த சாம்சங், அந்த மாடல் போனைப் பயன்படுத்த வேண்டாம் என்றும் வாடிக்கையாளர்களைக் கேட்டுக்கொண்டது.

இந்நிலையில், கேலக்ஸி நோட் 7 மாடல் போன்களைப் பயன்படுத்திய வாடிக்கையாளர்களுக்கு இழப்பீடு வழங்கும் நோக்கில் புதிய சலுகையை சாம்சங் அறிவித்துள்ளது. அந்த மாடல் போன்களைப் பயன்படுத்திய வாடிக்கையாளர்களுக்கு இழப்பீடாக 88.39 அமெரிக்க டாலர் பணம் அல்லது கேலக்ஸி நோட் 8 மாடல் போன்களை பாதி விலைக்கு வழங்க உள்ளதாக அறிவித்துள்ளது. சாம்சங் கேலக்ஸி நோட் 8 விரைவில் சந்தைக்கு வரவுள்ளது. கேலக்ஸி நோட் 7 மூலம் இழந்த மதிப்பை நோட் 8 மாடல் மூலம் மீட்டெடுக்கலாம் என்று சாம்சங் நிறுவனம் நம்பிக்கையுடன் காத்திருக்கிறது.