தெரு நாய் ஆதரவாளர்களுக்கு உச்ச நீதிமன்றம் செம டோஸ்..! போற போக்குல பேசக்கூடாது என கடும் கோபம்

 நாய் கடி புள்ளிவிவரங்கள் குறித்த கடுமையான வாதங்களுக்கு மத்தியில், டெல்லி-NCRயில் தெருநாய்களை அகற்றுவது குறித்த உத்தரவை உச்ச நீதிமன்ற அமர்வு ஒத்திவைத்துள்ளது

Supreme Court Stray Dog Ruling : நாடு முழுவதும் தெரு நாய்கள் அதிகரித்து வருகிறது. இதன் காரணமாக சாலையில் மக்கள் நடந்து செல்லவே அச்சம் அடையும் நிலை உருவாகியுள்ளது. குறிப்பாக தெரு நாய்கள் சிறுவர்களை அதிகமாக கடிக்கும் நிலை நீடிக்கிறது. நீளமான துப்பட்டா, புர்கா போன்ற உடைகள் அணிந்திருந்த பெண் சிறுமிகளை அதிகம் தாக்குவதை பார்க்க முடிகிறது. இது மட்டுமில்ல ஒன்றுக்கு மேற்பட்ட நாய்கள் சேர்ந்தாலே அடுத்தவர்களை தாக்குவதை வாடிக்கையாக கொண்டுள்ளது.

இந்த நிலையில் தான் தெரு நாய்களை அகற்ற உச்சநீதிமன்றத் உத்தரவு பிறப்பித்தது. இதற்கு விலங்கு நல ஆர்வலர்கள் எதிர்ப்பு தெரிவித்து வருகிறார்கள். இந்த நிலையில் டெல்லி-NCRயில் தெருநாய்களை அகற்றுவது குறித்த உத்தரவை உச்ச நீதிமன்றத்தின் மூன்று நீதிபதிகள் கொண்ட அமர்வு வியாழக்கிழமை ஒத்திவைத்தது. நீதிபதிகள் விக்ரம் நாத், சந்தீப் மேத்தா மற்றும் என்.வி. அஞ்சாரியா ஆகியோர் அடங்கிய அமர்வு, அனைத்து தெருநாய்களையும் பிடித்து தங்குமிடங்களுக்கு மாற்ற வேண்டும் என்ற நீதிமன்றத்தின் முந்தைய உத்தரவை எதிர்த்த மனுக்கள் மீது விசாரணை நடத்தியது. முந்தைய உத்தரவு வெளியிடப்படுவதற்கு முன்பே அதிகாரிகள் எவ்வாறு நாய்களைப் பிடிக்கத் தொடங்கினர் என்று அமர்வு கேள்வி எழுப்பியது.

நாய்களைக் கையாள்வது குறித்து கேள்வி

தெருநாய்களை அகற்றுவதில் “மந்தநிலை” இருக்கக்கூடாது என ஏற்கனவே அறிவித்த உத்தரவுக்கு தடை விதிக்கப்பட வேண்டும் என்று மூத்த வழக்கறிஞர் கபில் சிபல் கூறினார். பிடிபட்ட நாய்கள் எங்கு கொண்டு செல்லப்படும் என்று அவர் கேள்வி எழுப்பினார்.

சொலிசிட்டர் ஜெனரல் துஷார் மேத்தாவின் முந்தைய கருத்துகள் “முன்கூட்டியே பாரபட்சத்தை” உருவாக்கியதாக அபிஷேக் மனு சிங்வி வாதிட்டார், மேலும் இந்த ஆண்டு டெல்லியில் பூஜ்ஜிய நாய் கடி வழக்குகள் இருப்பதாக அரசாங்கமே பாராளுமன்றத்தில் கூறியதாகக் குறிப்பிட்டார்.

அரசாங்கத்திற்காக அல்ல, தனக்காகப் பேசிய துஷார் மேத்தா, தெருநாய்கள் காரணமாக குழந்தைகள் வெளியே பாதுகாப்பாக விளையாட முடியாது என்று கூறி, நீதிமன்றம் ஒரு தீர்வைக் காண வேண்டும் என்று வலியுறுத்தினார்.