திடீர் ட்விஸ்ட்.. 3வது இடத்திற்கு தள்ளப்பட்ட பாஜக.. ராஜஸ்தானில் நடந்த அதிரடி மாற்றம்

ராஜஸ்தானின் அன்டா மற்றும் தெலங்கானாவின் ஜூப்ளி ஹில்ஸ் ஆகிய தொகுதிகளில் நடைபெற்ற இடைத்தேர்தல்களில் காங்கிரஸ் கட்சி முன்னிலை பெற்றுள்ளது.

பீகார் தேர்தலில் காங்கிரஸ் கட்சி பெரிய பின்னடைவை சந்தித்துள்ளது. இந்த நிலையில் ராஜஸ்தானில் நடைபெற்ற இடைத்தேர்தல் முடிவுகள், காங்கிரஸ் கட்சிக்கு ஒரு முக்கிய ஆறுதலாக அமைந்துள்ளது. 

அன்டா தொகுதியில் நடைபெற்ற வாக்கு எண்ணிக்கையில், காங்கிரஸ் வேட்பாளர் பிரமோத் ஜெயின் முதல் 11 சுற்றுகளிலேயே 7,000-க்கும் அதிகமான வாக்குகள் வித்தியாசத்தில் முன்னிலை வகிக்கிறார். இந்த தொகுதியில் பாஜக மூன்றாவது இடத்திற்கு தள்ளப்பட்டிருப்பது அரசியல் வட்டாரத்தை அதிர வைத்துள்ளது. 

சுயேச்சை வேட்பாளர் நரேஷ் மீனா எதிர்பாராத முறையில் இரண்டாவது இடத்தில் உள்ளார். பாஜகவின் மோர்மால் சுமன் கடுமையாக பின்தங்கியிருப்பது பாஜக தரப்பு ஆதரவாளர்களை கவலையில் ஆழ்த்தியுள்ளது. இந்த இடைத்தேர்தலுக்குக் காரணமான முக்கிய நிகழ்வு அன்டா தொகுதியின் பாஜக எம்எல்ஏ கன்வர்லால் மீனாவுக்கு ஏற்பட்ட தகுதி நீக்கம் ஆகும். 

2005-ஆம் ஆண்டு ஊராட்சித் தலைவர் தேர்தலில் தேர்தல் அதிகாரியை துப்பாக்கியால் மிரட்டியதாக மீனா மீது வழக்கு தொடரப்பட்டது. நீண்ட காலமாக நீதிமன்றங்களில் ஓடிய இந்த வழக்கில், இறுதியாக 3 ஆண்டுகள் சிறைத்தண்டனை விதிக்கப்பட்டது. உச்ச நீதிமன்றம் அவரின் மேல்முறையீட்டை தள்ளுபடி செய்ததைத் தொடர்ந்து, கன்வர்லால் மீனா நீதிமன்றத்தில் சரணடைந்தார். 

இதன் பின்னணியில்தான் அன்டா தொகுதியில் இடைத்தேர்தல் நடைபெற்றது. இந்த வழக்கு காலத்தின் அரசியல் விளைவுகள் இன்றும் தொடர்வதை இது மீண்டும் நிரூபிக்கிறது. இதே நேரத்தில், தெலங்கானாவின் ஜூப்ளி ஹில்ஸ் தொகுதியிலும் காங்கிரஸ் முன்னிலை பெற்றிருப்பது அந்தக் கட்சிக்கு மகிழ்ச்சியைக் கொடுத்துள்ளது. 

முதல் மூன்று சுற்று வாக்கு எண்ணிக்கையில் காங்கிரஸ் வேட்பாளர் நவீன் யாதவ் 2,995 வாக்குகள் வித்தியாசத்தில் முன்னிலையில் உள்ளார். பிஆர்எஸ் முன்னாள் எம்எல்ஏ மாகந்தி கோபிநாத்தின் மறைவால் இந்த இடைத்தேர்தல் நடத்தப்பட்டது. பாஜக மீண்டும் லங்காலா தீபக் ரெட்டியை போட்டியிடச் செய்திருந்தாலும், ஆரம்ப கணக்கெடுப்பிலேயே காங்கிரஸ் முன்னிலையில் உள்ளது.