பாகிஸ்தான் நேரடிப் போர் நடத்துகிறது.. இந்தியாவை வெல்ல முடியாது ; பிரதமர் மோடி பேச்சு

காந்திநகரில் நடைபெற்ற கூட்டத்தில், பாகிஸ்தான் நடத்துவது மறைமுகப் போர் அல்ல, நேரடிப் போர் என்று பிரதமர் நரேந்திர மோடி குற்றம் சாட்டினார். பாகிஸ்தானால் நேரடிப் போரில் இந்தியாவை வெல்ல முடியாது என்பதை அறிந்தே, தீவிரவாதத்தை ஒரு யுத்த நடவடிக்கையாகப் பயன்படுத்துகிறது என்றும், அதற்குத் தகுந்த பதிலடி கொடுக்கப்படும் என்றும் அவர் தெரிவித்தார்.

பிரதமர் மோடி பேச்சு

1947-ல் இந்தியப் பிரிவினையின்போது நடந்த முதல் தீவிரவாதத் தாக்குதலைக் குறிப்பிட்ட மோடி, அப்போதே முஜாஹிதீன்களை அழித்திருந்தால் இன்றைய நிலை ஏற்பட்டிருக்காது என்றார். சர்தார் படேலின் விருப்பத்திற்கு மாறாக, பாகிஸ்தான் ஆக்கிரமிப்பு காஷ்மீர் மீட்கப்படவில்லை என்றும் சுட்டிக்காட்டினார்.

பாகிஸ்தானுக்கு தக்க பதிலடி

75 ஆண்டுகளாக நாம் சகித்துக் கொண்டிருக்கிறோம். மூன்று முறை நேரடிப் போரில் பாகிஸ்தானை தோற்கடித்திருக்கிறோம். அதனால்தான் மறைமுகப் போரைத் தொடங்கியது. இனி தோட்டாவுக்குத் தோட்டாவா, அல்லது கோளா என்று நாம் முடிவு செய்ய வேண்டும். தீவிரவாதத்தை வேரறுக்க வேண்டும் என்றார்.

பாகிஸ்தான் நேரடிப் போர் நடத்துகிறது

நாம் அண்டை நாடுகளுடன் அமைதியாக வாழ விரும்புகிறோம். ஆனால், நம்மைத் தொடர்ந்து சீண்டினால், நாம் வீரர்களின் நாடு என்பதை நினைவில் கொள்ள வேண்டும். மே 6-ம் தேதிக்குப் பிறகு, இதை மறைமுகப் போர் என்று சொல்ல முடியாது. 9 தீவிரவாத முகாம்களை 22 நிமிடங்களில் அழித்தோம். இப்போது அனைத்தும் வெளிப்படையாக நடக்கிறது. பாகிஸ்தான் தீவிரவாதிகளுக்கு அரசு மரியாதை செய்தது. இது நேரடிப் போர் என்பதை உறுதிப்படுத்துகிறது. அதற்கு தகுந்த பதிலடி கொடுக்கப்படும் என்றார்.