7 மணி ஆனா ஊரே ஆஃப் ஆயிடும்! தினமும் 2 மணி நேரம் டிஜிட்டல் விரதம் இருக்கும் வினோத கிராமம்!

கர்நாடகாவின் ஹலகா கிராம மக்கள், தினமும் இரவு 7 முதல் 9 மணி வரை 'டிஜிட்டல் விரதம்' மேற்கொள்கின்றனர். சைரன் ஒலித்தவுடன், கிராம மக்கள் டிவி, மொபைல்களை அணைத்துவிட்டு, படிப்பதிலும் உரையாடுவதிலும் நேரத்தைச் செலவிடுகின்றனர்.

கர்நாடக மாநிலம் பெலகாவி அருகே உள்ள ஹலகா (Halaga) கிராம மக்கள், தங்கள் குழந்தைகளின் கல்வி மற்றும் குடும்ப உறவுகளை மேம்படுத்துவதற்காக தினமும் இரண்டு மணி நேரம் மொபைல் மற்றும் தொலைக்காட்சிகளைத் தவிர்த்து 'டிஜிட்டல் விரதம்' கடைபிடித்து வருகின்றனர்.

7 மணிக்கு சைரன்!

இந்த கிராமத்தில் சுமார் 12,000 மக்கள் வசிக்கின்றனர். இங்குள்ள கிராம பஞ்சாயத்து அலுவலகத்தில் ஒரு பிரத்யேக சைரன் கருவி பொருத்தப்பட்டுள்ளது.

இரவு 7:00 மணி: சைரன் ஒலித்தவுடன், கிராமத்தில் உள்ள அனைத்து வீடுகளிலும் தொலைக்காட்சி, செல்போன், லேப்டாப் மற்றும் டேப்லெட் போன்ற அனைத்து டிஜிட்டல் திரைகளும் அணைக்கப்படுகின்றன.

இரவு 9:00 மணி: மீண்டும் சைரன் ஒலிக்கும் வரை, இந்த இரண்டு மணி நேரமும் யாரும் மொபைல் பயன்படுத்துவதில்லை (அவசர காலங்களைத் தவிர).

திட்டத்தின் நோக்கம் என்ன?

"டிவி இல்லை, மொபைல் இல்லை, படிப்பு மற்றும் உரையாடல் மட்டுமே" என்பதுதான் இந்தத் திட்டத்தின் தாரக மந்திரம்.

மாணவர்களின் படிப்பு: மாலை நேரங்களில் டிவி சீரியல்கள் மற்றும் மொபைல் கேம்களால் மாணவர்களின் படிப்பு பாதிக்கப்படுவதைத் தடுக்க இந்த முடிவு எடுக்கப்பட்டுள்ளது.

குடும்ப உரையாடல்: இயந்திரத்தனமான வாழ்க்கையில் குடும்ப உறுப்பினர்கள் ஒருவருக்கொருவர் பேசிக்கொள்ள இந்த நேரம் ஒதுக்கப்படுகிறது.

இந்த முயற்சி கடந்த டிசம்பர் 17 முதல் அமலுக்கு வந்துள்ளது.

முன்னுதாரணமான மகாராஷ்டிர கிராமம்

மகாராஷ்டிராவின் சாங்லி மாவட்டத்தில் உள்ள அக்ரான் துல்கான் கிராமத்தில் வெற்றிகரமாகச் செயல்படுத்தப்பட்ட இதே போன்ற ஒரு திட்டத்தைப் பார்த்து, ஹலகா கிராம மக்கள் இதைக் கையில் எடுத்துள்ளனர்.

கிராம பஞ்சாயத்து உறுப்பினர்களும் ஆசிரியர்களும் ஒவ்வொரு வீடாகச் சென்று, பெற்றோர்கள் இந்தத் திட்டத்தைச் சரியாகப் பின்பற்றுகிறார்களா என்பதை உறுதி செய்கின்றனர்.

இந்தத் திட்டத்தின் மூலம், தங்கள் கிராமத்து மாணவர்கள் படிப்பில் அதிக கவனம் செலுத்துவதாகவும், கிராம மக்களிடையே சமூகப் பிணைப்பு அதிகரித்துள்ளதாகவும் ஹலகா கிராம மக்கள் பெருமிதத்துடன் தெரிவிக்கின்றனர். கர்நாடகாவிலேயே இத்தகைய முயற்சியை மேற்கொண்டுள்ள முதல் கிராமம் இது என்பது குறிப்பிடத்தக்கது.