பிறந்த 15 நாளில் புதைக்கப்பட்ட குழந்தை... கதறல் கேட்டு மீட்ட கிராம மக்கள்!

கோதப்பூர் கிராமத்தில் உயிருடன் புதைக்கப்பட்ட 15 நாள் பச்சிளம் பெண் குழந்தை ஒன்று காவல்துறையினரால் மீட்கப்பட்டது. குழந்தையின் அழுகுரல் கேட்டதால், அந்தக் குழந்தை மீட்கப்பட்டது. தற்போது குழந்தை மருத்துவமனையில் சிகிச்சை பெற்று வருகிறது.

உத்தரப் பிரதேச மாநிலம் கோதப்பூர் கிராமத்தில் உயிருடன் புதைக்கப்பட்ட 15 நாள் பச்சிளம் பெண் குழந்தை ஒன்று காவல்துறையினரால் மீட்கப்பட்டது. இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.

ஞாயிற்றுக்கிழமை அன்று, கோதப்பூர் கிராமத்தைச் சேர்ந்த ஒருவர், சில சிறிய மரங்களுக்கு இடையே குழந்தையின் கை மண்ணிலிருந்து வெளியே நீட்டிக்கொண்டிருப்பதைக் கண்டார். மேலும், குழந்தையின் அழுகுரலும் அவருக்குக் கேட்டது. உடனடியாக அவர் காவல்துறையினருக்கு தகவல் தெரிவித்தார்.

குழந்தையை மீட்ட போலீஸ்

தகவலின் பேரில் சம்பவ இடத்திற்கு விரைந்து வந்த காவல்துறை குழுவினர், உடனடியாக குழந்தையை மீட்டனர். "குழந்தை உயிருடன் இருந்தது. உடனடியாக உள்ளூர் அரசு மருத்துவமனைக்கு கொண்டு செல்லப்பட்டாள். அங்கு முதலுதவி அளிக்கப்பட்ட பிறகு, மேல் சிகிச்சைக்காக மருத்துவக் கல்லூரிக்கு மாற்றப்பட்டாள்," என்று மாவட்ட காவல்துறை கண்காணிப்பாளர் (SP) ராஜேஷ் துவேதி தெரிவித்தார்.

அரசு மருத்துவக் கல்லூரியின் முதல்வர் ராஜேஷ் குமார் கூறுகையில், "குழந்தை ஞாயிற்றுக்கிழமை மதியம் மிகவும் மோசமான நிலையில் அனுமதிக்கப்பட்டாள். அவள் தீவிர சிகிச்சைப் பிரிவில் (ICU) வைக்கப்பட்டுள்ளாள். அவளது சிகிச்சைக்காக ஒரு பிரத்யேக மருத்துவர் நியமிக்கப்பட்டுள்ளார். குழந்தைக்கு சுமார் 15 நாட்கள் இருக்கும் என்று மதிப்பிடப்பட்டுள்ளது," என்றார்.

 குழந்தையின் பெற்றோர் யார்?

குழந்தையின் பெற்றோரை கண்டறியவும், இந்தக் கொடூர செயலுக்கு காரணமானவர்களை அடையாளம் காணவும் தீவிர முயற்சிகள் மேற்கொள்ளப்பட்டு வருவதாக காவல்துறை கண்காணிப்பாளர் ராஜேஷ் துவேதி தெரிவித்தார். "இந்த முழு விஷயமும் விசாரணையில் உள்ளது," என்றும் அவர் மேலும் கூறினார்.