இந்தியாவில் வசிக்கும் 5,800 யூதர்களையும் திரும்ப அழைக்கும் இஸ்ரேல்: நெதன்யாகு அதிரடி..!

பினி மெனாஷே என்பது வடகிழக்கு இந்தியாவின் மணிப்பூர், மிசோரம் பகுதிகளில் வசிக்கும் யூதர்கள். நீண்ட காலமாக, இந்த சமூகம் யூதராக அங்கீகரிக்கப்படவில்லை.

இஸ்ரேலின் பெஞ்சமின் நெதன்யாகு அரசு வடகிழக்கு இந்தியாவில் வசிக்கும் 5,800 யூதர்களை மீண்டும் அழைத்து வர திட்டமிட்டுள்ளது. அதன்படி இந்தப் பகுதியைச் சேர்ந்த அனைத்து யூதர்களும் அடுத்த ஐந்து ஆண்டுகளில் இஸ்ரேலுக்குக் கொண்டு வரப்படுவார்கள். இஸ்ரேலுக்கான யூத நிறுவனம் இந்தத் தகவலை கூறியுள்ளது. இந்தியாவிலிருந்து இடம்பெயரத் திட்டமிடப்பட்ட யூதர்கள் பினி மெனாஷே என்று அழைக்கப்படுகிறார்கள். இந்த வரலாற்றுச் சிறப்புமிக்க முடிவு 2030 ஆம் ஆண்டுக்குள் பினி மெனாஷே சமூகத்தைச் சேர்ந்த சுமார் 5,800 யூதர்களையும் இஸ்ரேலுக்குக் கொண்டு வரும் எனக் கூறியுள்ளது. இதில் 2026 ஆம் ஆண்டுக்கு ஏற்கனவே அங்கீகரிக்கப்பட்ட 1,200 பேர் திரும்பச் செல்ல உள்ளனர்.

யூத நிறுவனம் குடியேற்றத்திற்கு முந்தைய முழு செயல்முறையையும் வழிநடத்துவது, தகுதியானவர்களுக்கு விமானங்களை ஏற்பாடு செய்வது, இஸ்ரேலில் குடியேற அவர்களுக்கு உதவுவது இதுவே முதல் முறை. இந்த முழு செயல்முறை, பிற சிறப்பு சலுகைகளுக்கான மதிப்பிடப்பட்ட செலவு 90 மில்லியன் இஸ்ரேலிய ஷெக்கல்கள், அல்லது தோராயமாக $27 மில்லியன் ஆகும்.

இஸ்ரேலிய மதத் தலைவர்களான ரபீக்கள் அடங்கிய தொழில்முறை, பெரிய குழு ஒன்று இந்தியாவிற்கு பயணம் செய்ய உள்ளது. இது இதுவரை அனுப்பப்பட்ட மிகப்பெரிய குழுவாகவும், பத்தாண்டுகளுக்கும் மேலாக முதல் முறையாகவும் இருக்கும் என்று அறிவிப்பில் கூறப்பட்டுள்ளது. இஸ்ரேலில் முதல் நிலை உறவினர்களைக் கொண்ட சுமார் 3,000 பினி மெனாஷே சமூகத்தினரை இந்தக் குழு நேர்காணல் செய்யும்.

இந்த சமூகத்தைச் சேர்ந்த 1,200 உறுப்பினர்கள் ஏற்கனவே இஸ்ரேலில் மறுகுடியேற்றத்திற்கு ஒப்புதல் அளிக்கப்பட்டிருந்தனர். அவர்களில் பெரும்பாலோர் ஆரம்பத்தில் மேற்குக் கரையில் குடியேறினர். சமீபத்தில், அவர்கள் வடக்கு இஸ்ரேலில் உள்ள நகரங்களுக்கு மாற்றப்பட்டுள்ளனர். இவற்றில், நாசரேத்துக்கு அருகிலுள்ள யூத-அரபு கலப்பு நகரமான நோஃப் ஹகலில் ஒரு முக்கிய இடமாகும். அமைச்சரவை முடிவின்படி, வரும் ஆண்டுகளில் இந்தியாவில் இருந்து வரும் ஆயிரக்கணக்கான மக்கள் இங்கு மறு குடியேற்றப்படுவார்கள்.

பினி மெனாஷே என்பது வடகிழக்கு இந்தியாவின் மணிப்பூர், மிசோரம் பகுதிகளில் வசிக்கும் யூதர்கள். நீண்ட காலமாக, இந்த சமூகம் யூதராக அங்கீகரிக்கப்படவில்லை. ஆனால் 2005 ஆம் ஆண்டில், அப்போதைய தலைமை ரப்பி அவர்களை இஸ்ரேலியர்களின் சந்ததியினர் என்று அங்கீகரித்தார். இந்த சமூகம் தன்னை மெனாஷே பழங்குடி என்று அடையாளப்படுத்துகிறது. இது 2,700 ஆண்டுகளுக்கு முன்பு அசீரியர்களால் நாட்டிலிருந்து விரட்டியடிக்கப்பட்ட 10 பழங்குடியினரில் ஒன்று. இந்த சமூகத்தின் சுமார் 2,500 பேர் ஏற்கனவே இஸ்ரேலில் வசிக்கின்றனர்.