மிஷன் 2026! தேர்தலைக் குறிவைக்கும் கேரள பாஜக தலைவர் ராஜீவ் சந்திரசேகர்!

முன்னாள் மத்திய அமைச்சர் ராஜீவ் சந்திரசேகர் இன்று கேரள மாநில பாஜக தலைவராகப் பொறுப்பேற்றுள்ளார். கட்சி அமைப்பை வலுப்படுத்தவும், கேரள சட்டசபை தேர்தலுக்கு தயாராகவும் 'மிஷன் 2026' என்ற திட்டத்தை அவர் தொடங்கவுள்ளதாகக் கூறப்படுகிறது.

திருவனந்தபுரம்: புதிதாக நியமிக்கப்பட்டுள்ள கேரள பாஜக மாநில தலைவர், முன்னாள் மத்திய அமைச்சர் ராஜீவ் சந்திரசேகர், வரவிருக்கும் சட்டசபை தேர்தலை மையமாக வைத்து "மிஷன் 2026" ஐ தொடங்கவுள்ளார். மூத்த தலைவர்களையும், இளைஞர் தலைவர்களையும் ஒன்றிணைத்து கட்சியின் கட்டமைப்புக்கு புத்துயிர் அளிக்க திட்டமிட்டுள்ளார். மேலும், வரவிருக்கும் உள்ளாட்சி தேர்தலுக்கான மாவட்ட வாரியான வியூகங்களையும் சந்திரசேகர் வகுத்துள்ளார்.

ராஜீவ் சந்திரசேகர் கேரள பாஜக தலைவராக நியமிக்கப்பட்ட அதிகாரப்பூர்வ அறிவிப்பு இன்று காலை 11 மணிக்கு மத்திய பார்வையாளர் பிரஹலாத் ஜோஷி அவர்களால் வெளியிடப்படும். கே. சுரேந்திரனுக்கு பதிலாக ராஜீவ் சந்திரசேகர் நியமிக்கப்பட்டுள்ளார். கே. சுரேந்திரன் ஐந்து வருடங்களாக கட்சியின் மாநில தலைவராக பதவி வகித்தார். முன்னாள் மத்திய அமைச்சர் இனி கேரளாவில் பாஜகவின் தலைமைப் பொறுப்பை வகிப்பார்.

ஞாயிற்றுக்கிழமை (மார்ச் 23), ராஜீவ் சந்திரசேகர் மாநில தலைவர் பதவிக்கு வேட்புமனுக்களை தாக்கல் செய்தார். இந்த நிகழ்வின்போது கேரளாவைச் சேர்ந்த முக்கிய பாஜக தலைவர்கள் மற்றும் மத்திய அமைச்சர்கள் சுரேஷ் கோபி மற்றும் ஜார்ஜ் குரியன் ஆகியோர் உடனிருந்தனர். இந்த வேட்புமனுவை மாநில தலைமை ஒருமனதாக ஆதரித்தது. குமணன் ராஜசேகரன், வி. முரளிதரன், பி. கே. கிருஷ்ணதாஸ் மற்றும் எம். டி. ரமேஷ் போன்ற முக்கிய தலைவர்கள் வேட்புமனு தாக்கல் செய்யும் போது உடனிருந்தனர்.

இது குறித்து பேசியுள்ள பாஜக தலைவர் ஷோபா சுரேந்திரன், கட்சித் தலைமையின் முடிவை வரவேற்பதகாவும் ராஜீவ் சந்திரசேகர் கேரளாவில் கட்சியை திறம்பட வழிநடத்தும் திறன்கொண்டவர் என்றும் தெரிவித்தார். இது ஒருமனதான முடிவு என்றும் அவர் குறிப்பிட்டார். ராஜீவ் சந்திரசேகர் கேரளாவில் நன்கு அறிமுகமானவர், அனைவராலும் மதிக்கப்படும் நபர். அவரது தலைமையில் கட்சி குறிப்பிடத்தக்க வெற்றியை அடையும் என்று எம்.டி. ரமேஷ் கூறினார்.

சந்திரசேகர் (60) 20 வருட அரசியல் அனுபவம் கொண்டவர். முன்னதாக, எலக்ட்ரானிக்ஸ் மற்றும் தகவல் தொழில்நுட்பம், திறன் மேம்பாடு மற்றும் தொழில் முனைவு, ஜல் சக்தி ஆகிய துறைகளின் மத்திய இணை அமைச்சராக பதவி வகித்துள்ளார்.

கர்நாடகாவை பிரதிநிதித்துவப்படுத்தி மூன்று முறை ராஜ்யசபா உறுப்பினராக இருந்துள்ளார். மேலும் பாஜகவின் தேசிய செய்தி தொடர்பாளராகவும் பணியாற்றியுள்ளார். கூடுதலாக, அவர் கேரளாவில் என்டிஏவின் துணைத் தலைவராகவும் உள்ளார்.

கேரளாவில் பாஜகவை வலுப்படுத்தும் திட்டம்:

பிரதமர் நரேந்திர மோடியின் தொலைநோக்கு பார்வைக்கு ஏற்ப, நவீன, வளர்ச்சி சார்ந்த கேரளாவின் முகமாக பாஜகவின் மத்திய தலைமை அவரை நிலைநிறுத்தியுள்ளது. திருவனந்தபுரம் மக்களவைத் தொகுதியில் அவர் போட்டியிட்டபோது, சிக்கலான கருத்துக்களை திறம்பட தொடர்புகொள்ளும் திறனும், இளைஞர்கள் உட்பட புதிய வாக்காளர் குழுக்களுடன் ஈடுபடும் திறனும் தெளிவாக தெரிந்தது.

கார்ப்பரேட் பின்னணி மற்றும் கொள்கை நிபுணத்துவம் பெற்ற சந்திரசேகரின் தலைமை பாணி, வழக்கமான அரசியல் சொல்லாட்சிகளை விட தரவு சார்ந்த அணுகுமுறைகள் மற்றும் விளக்கங்களை உள்ளடக்கியது. மோடியின் வளர்ச்சி அரசியலின் கேரளாவுக்கான ஒரு குறிப்பிட்ட மாதிரியை உருவாக்கும் ஒரு பெரிய முயற்சியின் ஒரு பகுதியாக அவரது நியமனத்தை பாஜக தலைமை கருதுகிறது.

ராஜீவ் சந்திரசேகர் தலைமையில் கேரள பிரிவு தனது ஆதரவு தளத்தை விரிவுபடுத்தி, உள்ளாட்சி மற்றும் மாநில அளவிலான தேர்தல்களில் தனது செயல்திறனை மேம்படுத்தும் என்று கட்சி நம்புகிறது. அவரது நியமனம் கட்சிக்கு புதிய ஆற்றலைக் கொண்டு வருவதற்கும், நிர்வாகம் மற்றும் வளர்ச்சி சார்ந்த முயற்சிகளில் அவரது அனுபவத்தை பயன்படுத்துவதற்கும் ஒரு முயற்சியாக பரவலாக பார்க்கப்படுகிறது.