விரைவில் விமானப்படைக்கு 12 புதிய Mk1A ரக போர் விமானம்!

ஹிந்துஸ்தான் ஏரோநாட்டிக்ஸ் லிமிடெட் (HAL) தயாரித்துள்ள முதல் LCA Mk1A ரக போர் விமானம் விரைவில் வெளியிடப்படும். இந்த ஆண்டு இறுதிக்குள் 12 விமானங்கள் இந்திய விமானப்படைக்கு வழங்கப்படும். 2029க்குள் மொத்தம் 83 விமானங்கள் வழங்கப்படும்.

ஹிந்துஸ்தான் ஏரோநாட்டிக்ஸ் லிமிடெட் (HAL) நிறுவனம் தயாரித்துள்ள முதல் LCA Mk1A ரக போர் விமானம் இன்னும் சில மாதங்களில் வெளியிடப்படும் என்று தெரிவித்துள்ளது. மேலும், இந்த ஆண்டு இறுதிக்குள் 12 விமானங்கள் இந்திய விமானப்படைக்கு (IAF) வழங்கப்படும் என்றும் அந்நிறுவனம் கூறியுள்ளது.

HAL நிறுவனம் தனது பெங்களூரு ஆலையில் உற்பத்தியை அதிகரித்துள்ளது. கூடுதலாக, நாசிக்கில் புதிதாக ஒரு உற்பத்திப் பிரிவை அமைத்துள்ளது. இதன் மூலம் ஆண்டு உற்பத்தி 16 விமானங்களில் இருந்து 24 ஆக உயரும். ஜெனரல் எலக்ட்ரிக் (GE) ஏரோஸ்பேஸ் நிறுவனத்திடம் இருந்து என்ஜின் டெலிவரி தொடங்கியுள்ளதால், முன்பு நிலவிய விநியோகச் சிக்கல் தற்போது தீர்ந்துள்ளது.

இந்திய விமானப்படை மொத்தம் 83 LCA Mk1A விமானங்களுக்கு ஆர்டர் செய்துள்ளது. இந்த விமானங்களின் டெலிவரி 2029 ஆம் ஆண்டுக்குள் நிறைவடையும் என எதிர்பார்க்கப்படுகிறது.

LCA Mk1A போர் விமானம் மேம்படுத்தப்பட்ட போர் உபகரணங்கள், வான்வழி எரிபொருள் நிரப்பும் வசதி மற்றும் பல நவீன தொழில்நுட்பங்களைக் கொண்டுள்ளது. இது இந்திய விமானப்படையின் போர் திறனை மேலும் வலுப்படுத்தும் என்று நம்பப்படுகிறது. HAL நிறுவனம் இந்திய விமானப்படை மற்றும் கடற்படைக்காக மேலும் பல போர் விமானங்களுக்கான ஆர்டர்களையும் பெற்றுள்ளது குறிப்பிடத்தக்கது.