போர் விமானங்களுக்குள் ஏசி இருக்கா? வீரர்கள் வெப்பத்தைத் தாங்குவது எப்படி?

போர் விமானங்களில் விமானிகள் அதிக வெப்பநிலையிலும் எப்படி குளுமையாக இருக்கிறார்கள் என்பதை இந்தக் கட்டுரை விளக்குகிறது. ECS அமைப்பு விமான எஞ்சின்களில் இருந்து வெளிப்படும் வெப்பக் காற்றைக் குளிர்வித்து காக்பிட்-க்குள் செலுத்துகின்றன.

போர் விமானங்களில், அதன் கண்ணாடி கூண்டுக்குள் (cockpit) அடைபட்டிருக்கும் விமானிகள் எப்படி அதிக வெப்பநிலையில் பறக்கும்போது குளுமையாக இருக்கிறார்கள் என்ற கேள்வி பலருக்கும் எழும். போர் விமானங்களிலும் குளிர்சாதன வசதி (Air Conditioning) உள்ளது என்பதுதான் இதற்குப் பதில். இருப்பினும், நாம் பயன்படுத்தும் ஏசிகள் போல இவை நேரடியாக செயல்படுவதில்லை.

ECS  - ஒரு விரிவான அமைப்பு:

போர் விமானங்களில் உள்ள இந்த அமைப்புகள் பொதுவாக "Environmental Conditioning Systems" (ECS) என அழைக்கப்படுகின்றன. இவற்றின் முக்கியப் பணிகள் பின்வருமாறு:

காக்பிட் அழுத்த கட்டுப்பாடு (Cockpit Pressurization): அதிக உயரத்தில் பறக்கும்போது, விமானிகளுக்கு போதுமான ஆக்ஸிஜன் கிடைக்க காக்பிட் உள்ளே அழுத்தத்தை பராமரித்தல்.

வெப்பப்படுத்துதல் / குளிர்வித்தல் (Heating / Cooling): விமானிக்கு வசதியான வெப்பநிலையை உறுதி செய்தல்.

விண்ட்சீல்டு (Windshield): கண்ணாடிகளில் பனி படிவதைத் தடுத்து, தெளிவான காட்சியை வழங்குதல்.

எப்படி வேலை செய்கிறது?

இந்த அமைப்புகள் பெரும்பாலும் விமான எஞ்சின்களில் இருந்து வெளிப்படும் "ப்ளீட் ஏர்" (Bleed Air) எனப்படும் வெப்பமான காற்றைப் பயன்படுத்துகின்றன. இந்த உயர் அழுத்தக் காற்று வெப்பப் பரிமாற்றிகள் (heat exchangers) மற்றும் டர்பைன்கள் (turbines) வழியாக அனுப்பப்பட்டு குளிர்விக்கப்படுகின்றன. இவ்வாறு குளிர்விக்கப்பட்ட காற்று காக்பிட்-க்குள் செலுத்தப்படுகிறது.

பெரும்பாலான போர் விமானங்களில், விமானியே காக்பிட் வெப்பநிலையை கட்டுப்படுத்தும் வசதியைப் பெற்றுள்ளார். உதாரணமாக, F-15 போன்ற விமானங்களில் "TEMP" மற்றும் "FLOW" போன்ற சுவிட்சுகள் மூலம் வெப்பநிலை மற்றும் காற்றோட்டத்தை சரிசெய்ய முடியும்.

சவால்களும் தீர்வுகளும்:

விமானம் தரையில் இருக்கும்போது அல்லது மெதுவாக நகரும்போது, எஞ்சின்கள் முழு வேகத்தில் இயங்காததால், குளிர்விக்கும் அமைப்பின் செயல்திறன் குறைவாக இருக்கலாம். மேலும், ஒலியின் வேகத்தை விட வேகமாகப் பறக்கும்போது ஏற்படும் உராய்வு வெப்பமும், காக்பிட்-ஐ கணிசமாக சூடாக்கும்.

இருப்பினும், நவீன போர் விமானங்களில் உள்ள ECS அமைப்புகள் மிகவும் திறமையானவை. விமானிகள் விமான சீருடைகளுடன் (flight suits) கூடுதல் குளிர்ச்சியடையும் அமைப்புகளையும் பயன்படுத்துகின்றனர். இந்த தனித்துவமான குளிர்ச்சி வழிமுறைகள், விமானிகள் கடுமையான போர் சூழல்களிலும் கவனம் செலுத்தி, திறம்பட செயல்பட உதவுகின்றன.