அயோத்தி ராமர் கோவில் கும்பாபிஷேக விழா: 7 நாள் சடங்குகள் இன்று முதல் தொடக்கம்...

அயோத்தி ராமர் கோவில் கும்பாபிஷேக விழாவிற்கான 7 நாள் சடங்குகள் இன்று தொடங்குகின்றன.

அயோத்தியில் பிரம்மாண்டமாக கட்டப்பட்டுள்ள ராமர் கோயிலின் கும்பாபிஷேகம் வரும் 22-ம் தேதி நடைபெற உள்ளது. இந்த விழாவுக்கான 7 நாள் சடங்குகள் இன்று தொடங்க உள்ளது. வரும் 22 ஆம் தேதி நடைபெற உள்ள கும்பாபிஷேக விழாவுடன் இந்த சடங்குகள் முடிவடையும். அன்றைய தினம் கோயில் கருவறையில் ராமரின் சிலை பிரதிஷ்டை செய்யப்பட உள்ளது. இந்த பிரம்மாண்ட விழாவில் பிரதமர் நரேந்திர மோடி தலைமையில் ஆயிரக்கணக்கான விவிஐபி விருந்தினர்கள் கலந்துகொள்ள உள்ளனர். 

2019 நவம்பரில் அயோத்தியில் பல தசாப்தங்களாக நிலவி வந்த சர்ச்சையை உச்சநீதிமன்றம் தீர்த்து வைத்த பிறகு ராமர் கோவில் கட்டும் பணி தொடங்கியது. 33 ஆண்டுகளுக்கு முன்பு, பாஜகவின் மூத்த தலைவர் எல்.கே அத்வானி, அயோத்தியில் ராமர் கோயில் கட்டுவதற்காக குஜராத்தில் உள்ள சோம்நாத்திலிருந்து ரத யாத்திரையைத் தொடங்கினார். அப்போதைய பாஜக தலைவருடன் சென்றவர்களில் இப்போது பிரதமராக இருக்கும் நரேந்திர மோடியும் ஒருவர்.

குஜராத் பாஜகவின் பொதுச் செயலாளராக இருந்த பிரதமர் மோடி, 1990ல் யாத்திரையை ஏற்பாடு செய்ததில் முக்கியப் பங்காற்றினார். 30 ஆண்டுகளுக்குப் பிறகு 2020ல் ராமர் கோவிலின் ‘பூமி பூஜையில்’ கலந்து கொண்டார். ராமர் கோயில் கும்பாபிஷேக விழாவுக்கு முன்னதாக, 11 நாள் அனுஷ்டானத்தை (சிறப்பு சடங்கு) மேற்கொள்வதாக மோடி கடந்த வெள்ளிக்கிழமை அறிவித்தார்.

இந்த சூழலில் ராமர் கோயில் கும்பாபிஷேக விழாவை முன்னிட்டு இன்று முதல் 7 நாள் சடங்குகள் நடைபெற உள்ளது. அடுத்த ஏழு நாட்களில், இந்து மரபுகளின்படி சடங்கு சம்பிரதாயங்கள் அடங்கிய பூர்வாங்க பூஜைகள் நடைபெறும். அதன்படி இன்று (ஜனவரி 16) ஆம் தேதி, ஸ்ரீ ராம் ஜென்மபூமி தீர்த்த க்ஷேத்ராவால் நியமிக்கப்பட்ட ஆச்சார்யா பரிகார விழாவை நடத்துவார்.

ஜனவரி 17 ஆம் தேதி, ராம் லல்லா சிலையின் பரிசார் பிரவேசம் விழா நடைபெற உள்ளது. ஜனவரி 18ஆம் தேதி தீர்த்த பூஜை, ஜல யாத்திரை, கந்தாதிவாஸ் ஆகிய சடங்குகள் நடைபெறும். ஜனவரி 19-ம் தேதி காலை ஔஷததிவாஸ், கேசராதிவாஸ், கிருதாதிவாஸ் ஆகிய சடங்குகள் நடைபெறும். பின்னர் மாலையில் தான்யாதிவாஸ் சடங்கு நடைபெறும். ஜனவரி 20ம் தேதி காலை ஷர்கராதிவாஸம், பலாத்வாஸ் சடங்குகள் நடக்கும். மாலையில் புஷ்பதீபம் நடக்கும். ஜனவரி 21-ம் தேதி காலை மத்யாதிவாஸ் சடங்கும், மாலையில் ஷியாதிவாஸமும் நடைபெறும்.

ஜனவரி 22-ம் தேதி பிரம்மாண்ட கும்பாபிஷேக விழா

பிரதமர் நரேந்திர மோடி, ஆர்எஸ்எஸ் தலைவர் மோகன் பகவத், உத்தரபிரதேச ஆளுநர் ஆனந்திபென் படேல், முதல்வர் யோகி ஆதித்யநாத் மற்றும் முக்கிய பிரமுகர்கள் முன்னிலையில் ராமர் கோயிலின் பிரம்மாண்ட கும்பாபிஷேக விழா நடைபெற உள்ளது. கோவில் அறக்கட்டளை 7,000 பேருக்கு அழைப்பு விடுத்துள்ளது, கிரிக்கெட் ஜாம்பவான்கள் சச்சின் டெண்டுல்கர், எம்எஸ் தோனி மற்றும் விராட் கோலி, பாலிவுட் சூப்பர் ஸ்டார் அமிதாப் பச்சன் மற்றும் பெரும்பணக்கார தொழிலதிபர்கள் முகேஷ் அம்பானி மற்றும் கௌதம் அதானி ஆகியோர் அடங்குவர்.

நாடு முழுவதும் அயோத்திக்கு வரும் பரிசுகள்

பல்வேறு மாநிலங்களில் இருந்து மக்கள் தண்ணீர், மண், தங்கம், வெள்ளி, ரத்தினங்கள், ஆடைகள், நகைகள், பெரிய மணிகள், டிரம்ஸ், வாசனை/வாசனைப் பொருட்கள் போன்ற தனித்துவமான பரிசுகளுடன் தொடர்ந்து அயோத்திக்கு அனுப்பப்பட்டு வருகின்றன.