Ram and Leela Movie Review : ராமச்சந்திரன் கண்ணன் இயக்கத்தில் ரியோ ராஜ், வர்த்திகா, சேத்தன் ஆகியோர் நடிப்பில் ரிலீஸ் ஆகி இருக்கும் ராம் அண்ட் லீலா திரைப்படத்தின் விமர்சனத்தை பார்க்கலாம்.
சின்னத்திரையில் இருந்து வெள்ளித்திரைக்கு வந்து ஹீரோவாக கலக்கி வருபவர் ரியோ ராஜ். தொடர்ந்து வித்தியாசமான கதையம்சம் கொண்ட படங்களை தேர்வு செய்து நடித்து வரும் ரியோ, தற்போது ராம் அண்ட் லீலா படத்தில் நடித்துள்ளார். இப்படத்தை ராமச்சந்திரன் கண்ணன் இயக்கி உள்ளார். இப்படத்தில் ரியோ உடன் வர்த்திகா, முனீஷ்காந்த், சேத்தன், மாளவிகா அவினாஷ், மாபாஃபா ஆனந்த், தீபா வெங்கட், பாலாஜி தியாகராஜன் தயாளன், கவின் ஜி.டி என மிகப்பெரிய நட்சத்திர பட்டாளமே நடித்துள்ளது. இப்படம் இன்று திரையரங்குகளில் ரிலீஸ் ஆகி உள்ளது. அதன் விமர்சனத்தை இந்த தொகுப்பில் பார்க்கலாம்.
தொடர்ந்து காதல் தோல்விகளை சந்தித்து வாழ்க்கையில் விரக்தியடைந்திருக்கும் ராம் (ரியோ), ஒரு ரயில் பயணத்தில் லீலாவை (வர்த்திகா) எதிர்பாராத விதமாக சந்திக்கிறார். முதல் சந்திப்பிலேயே இருவருக்குள்ளும் உருவாகும் ஈர்ப்பு, நாளடைவில் காதலாக மாறுகிறது. ராமின் வாழ்க்கையிலும் இந்த உறவு புதிய உற்சாகத்தை ஏற்படுத்துகிறது.
ஆனால், காதல் நெருக்கமாகும் நேரத்தில் லீலா விதிக்கும் ஒரு விசித்திரமான கட்டுப்பாடு கதைக்கு புதிய திருப்பத்தை ஏற்படுத்துகிறது. மாலை 6 மணிக்குப் பிறகு தன்னை ராம் சந்திக்கக் கூடாது என்பதுதான் அந்த நிபந்தனை. இதற்கான காரணம் என்ன? லீலாவின் வாழ்க்கையில் மறைந்திருக்கும் ரகசியம் என்ன? அந்த மர்மத்தை ராம் கண்டுபிடித்தாரா என்பதே படத்தின் மீதிக்கதை.
35
ராம் அண்ட் லீலா விமர்சனம்
காதல், நகைச்சுவை, மர்மம் மற்றும் சைக்காலஜிக்கல் த்ரில்லர் அம்சங்களை இணைத்து உருவாகியுள்ள இந்தப் படத்தில் ரியோ கதாநாயகனாக நடித்துள்ளார். இயல்பான உடல்மொழி, அப்பாவித்தனமான முகபாவனைகள் மற்றும் சரியான காமெடி டைமிங் மூலம் ராம் கதாபாத்திரத்தை ரசிக்க வைக்கிறார். காதல் காட்சிகளில் இளமைத் துள்ளலையும், உணர்வுப்பூர்வமான தருணங்களில் அமைதியான நடிப்பையும் வெளிப்படுத்தியிருப்பது அவரது கதாபாத்திரத்திற்கு கூடுதல் பலமாக அமைந்துள்ளது.
கதாநாயகியாக அறிமுகமாகும் வர்த்திகா, லீலா கதாபாத்திரத்தில் அழகையும் மர்மத்தையும் ஒருசேர வெளிப்படுத்துகிறார். குறிப்பாக அவரது கண்கள் வழியாக வெளிப்படும் உணர்வுகள் கதாபாத்திரத்தின் பின்னணியை அறிந்துகொள்ளும் ஆர்வத்தை பார்வையாளர்களிடம் உருவாக்குகின்றன. காதல் காட்சிகளிலும் உணர்ச்சிகரமான தருணங்களிலும் தனது நடிப்பால் கவனம் ஈர்க்கிறார்.
சேத்தன், மாளவிகா அவினாஷ் மற்றும் தீபா வெங்கட் ஆகியோர் அனுபவம் மிக்க நடிப்பால் கதையின் முக்கியமான பகுதிகளுக்கு வலு சேர்க்கின்றனர். அதேபோல், முனீஷ்காந்த் மற்றும் மாபாஃபா ஆனந்த் இணைந்து வரும் காட்சிகள் படத்தின் நகைச்சுவை பகுதிக்கு கூடுதல் சுவை சேர்க்கின்றன.
பாலாஜி தியாகராஜன் தயாளன், தாஃபியா அபு மற்றும் கவின் ஜி.டி உள்ளிட்டவர்களும் தங்களுக்கு வழங்கப்பட்ட கதாபாத்திரங்களை சிறப்பாக கையாண்டுள்ளனர். இவர்களின் பங்களிப்பு கதையின் நகர்வுக்கு துணை நிற்கிறது.
ஒளிப்பதிவாளர் மல்லிகார்ஜுனின் பணியில் காட்சிகளின் அழகு சிறப்பாக வெளிப்படுகிறது. கதையின் சூழலுக்கு ஏற்ப வெவ்வேறு கோணங்களில் காட்சிகளை பதிவு செய்திருப்பது திரையில் நல்ல அனுபவத்தை கொடுக்கிறது. அங்கித் மேனனின் இசை படத்தின் உணர்வுகளுடன் பயணிக்கிறது.
55
ராம் அண்ட் லீலா ரிவ்யூ
படத்தொகுப்பாளர் வை.என்.சி. சிவா, தேவையற்ற இழுவை இல்லாமல் காட்சிகளைத் தொகுத்து திரைக்கதையின் வேகத்தை தக்க வைத்துள்ளார். மர்மம் தொடர்பான பகுதிகள் அடுத்தடுத்த திருப்பங்களுடன் நகர்வதால் படத்தின் விறுவிறுப்பு குறையாமல் செல்கிறது.
இயக்குநர் ராமச்சந்திரன் கண்ணன், வழக்கமான காதல் கதையிலிருந்து மாறுபட்டு அதில் மர்மம் மற்றும் உளவியல் த்ரில்லர் அம்சங்களை இணைத்திருக்கிறார். காதலை மையமாக வைத்துக்கொண்டு, கதாநாயகி லீலாவைச் சுற்றி உருவாகும் கேள்விகளின் மூலம் திரைக்கதையை நகர்த்தியிருப்பது படத்தின் சுவாரஸ்யமான அம்சமாக உள்ளது.
மொத்தத்தில், ராம் அண்ட் லீலா காதல், காமெடி மற்றும் மர்மத்தை ஒன்றாகக் கலந்து உருவாக்கப்பட்டுள்ள இலகுவான பொழுதுபோக்கு படமாக அமைந்துள்ளது. குடும்பத்துடன் ரசிக்கக்கூடிய கலகலப்பான தருணங்களுடன், கதையின் மர்ம முடிச்சுகளையும் இணைத்து ரசிகர்களுக்கு ஒரு வித்தியாசமான டைம்பாஸ் அனுபவத்தை வழங்குகிறது.
