எடப்பாடி பழனிசாமியைப் பொறுத்தவரை, விஜய்யைச் சேர்ப்பது அதிமுகவின் தலைமையைக் கேள்விக்குறியாக்கும் எனப் பயப்படுகிறார். ஆனால், பாஜகவோ விஜய்யின்றி தமிழகத்தில் பெரிய அளவில் சாதிக்க முடியாது என நம்புகிறது.
தமிழக அரசியலில் 2026 சட்டமன்றத் தேர்தலுக்கான கூட்டணிக் கணக்குகள் தற்போதே அனல் பறக்கத் தொடங்கியுள்ளன. குறிப்பாக, அதிமுக மற்றும் பாஜக இடையிலான உறவு மற்றும் தொகுதிப் பங்கீட்டுப் பேச்சுவார்த்தைகளில் நீடிக்கும் இழுபறிக்கு பின்னால், வெறும் எண்கள் மட்டும் காரணமல்ல; நடிகர் விஜய்யின் தவெக குறித்த டெல்லி தலைமையின் பிடிவாதமே முக்கியக் காரணமாகப் பார்க்கப்படுகிறது.
24
பாஜகவின் விடாப்பிடி அழுத்தம்
அதிமுக - பாஜக கூட்டணிப் பேச்சுவார்த்தை நீண்ட நாட்களாகத் தட்டுத்தடுமாறி வருவதற்கு, தவெக தலைவர் விஜய்யை எப்படியாவது தங்களது அணிக்குள் கொண்டு வர வேண்டும் என்கிற அமித்ஷாவின் அழுத்தமே முதன்மையான காரணம். இஃப்தார் நோன்பு நிகழ்ச்சியில் பங்கேற்ற விஜய், "மதவாதக் கட்சிகளுடன் கூட்டணி இல்லை. மதச்சார்பற்ற கொள்கையில் சமரசம் கிடையாது. தனித்துப் போட்டி" என்று அதிரடியாக அறிவித்தார்.
விஜய்யின் இந்த அறிவிப்பு வெளியான மறுநாளே எடப்பாடி பழனிசாமி டெல்லிக்கு விரைந்தது அரசியல் வட்டாரத்தில் பெரும் பரபரப்பை ஏற்படுத்தியது. டெல்லியில் நடந்த சந்திப்பில், தொகுதிப் பங்கீடு குறித்துப் பேசப்பட்டாலும், அமித்ஷாவின் முழு கவனமும் விஜய்யை நோக்கியே இருந்ததாகத் தெரிகிறது.
கடந்த 2021 சட்டமன்றத் தேர்தலில் அதிமுகவின் தோல்விக்குக் காரணம், டி.டி.வி. தினகரன் மற்றும் சசிகலாவை ஒருங்கிணைக்கத் தவறியதே என்று அமித்ஷா நம்புகிறார். அந்தத் தவறை மீண்டும் செய்யக்கூடாது என்பதில் அவர் உறுதியாக இருக்கிறார். "விஜய்யின் வருகை என்பது இளைஞர்களின் வாக்குகளை மொத்தமாக அள்ளும் ஒரு பெரும் வாய்ப்பு. இந்த வாய்ப்பைத் தவறவிட்டால் வெற்றி இலக்கை அடைவது கடினம்" என்று எடப்பாடியிடம் அமித்ஷா வலியுறுத்தியுள்ளார்.
ஆனால், எடப்பாடி பழனிசாமி இதற்குச் சற்றும் இணங்கவில்லை. "விஜய்யின் கொள்கைகள் வேறு, நமது அரசியல் களம் வேறு. அவர் நமது கூட்டணிக்குச் செட் ஆகமாட்டார். அவரைச் சேர்க்காமல் நாம் தனித்து நின்றாலே அதிமுகவின் வாக்கு வங்கி சிதையாமல் இருக்கும், வெற்றி பெறுவது சுலபம்" என்று மிகத் தெளிவாகப் பதிலடி கொடுத்துள்ளார்.
விஜய் தன்னை "பாஜகவின் பி-டீம்" என்று அழைக்கப்படுவதை விரும்பாமல், மிகத் தெளிவாகப் பாஜகவை எதிர்த்து வரும் சூழலிலும், அமித்ஷா ஏன் அவரைத் துரத்துகிறார்? என்பதுதான் இங்குள்ள மில்லியன் டாலர் கேள்வி. பாஜக நேரடியாகத் தமிழ்நாட்டில் காலூன்ற முடியாத நிலையில், விஜய்யின் செல்வாக்கை ஒரு ஏணியாகப் பயன்படுத்திக் கொள்ளத் துடிக்கிறது. ஒருவேளை விஜய் கூட்டணிக்கு வர மறுத்தாலும், விஜய்யின் ஆதரவாளர்களின் வாக்குகளை அதிமுக - பாஜக கூட்டணிக்கு எப்படித் திருப்புவது என்கிற அரசியல் கணக்கை அமித்ஷா இன்னும் போட்டுக்கொண்டே இருக்கிறார்.
எடப்பாடி பழனிசாமியைப் பொறுத்தவரை, விஜய்யைச் சேர்ப்பது அதிமுகவின் தலைமையைக் கேள்விக்குறியாக்கும் எனப் பயப்படுகிறார். ஆனால், பாஜகவோ விஜய்யின்றி தமிழகத்தில் பெரிய அளவில் சாதிக்க முடியாது என நம்புகிறது. அழுத்தம் ஒருபுறம், எடப்பாடியின் பிடிவாதம் மறுபுறம் எனத் தமிழக அரசியல் களம் இப்போது ஒரு பெரும் 'த்ரில்லர்' படமாக மாறியுள்ளது.
