குளிர்காலத்தில் குழந்தைகள் தண்ணீர் குடிக்க மறுக்கிறார்களா..? இந்த 5 ட்ரிக்ஸ் நல்லா வொர்க் ஆகும்..!

குளிர்காலத்தில் குழந்தைகள் தண்ணீர் குடிப்பதைத் தவிர்க்கிறார்களா? இதனால் உடலில் நீர்ச்சத்துக் குறைபாடு ஏற்பட வாய்ப்புள்ளது. சூப் முதல் பழங்கள் வரை, குழந்தைகளுக்கு எளிதாக நீர்ச்சத்தை அதிகரிக்கும் 5 வழிகளைத் தெரிந்துகொள்ளுங்கள்.

குழந்தைகள் தண்ணீர் குடிக்க மறுத்தால்

குளிர்காலம் தொடங்கிவிட்டாலே பல குழந்தைகள் தண்ணீர் குடிப்பதை வெகுவாகக் குறைத்துவிடுவார்கள். குறிப்பாக, காலையில் எழுந்ததும் குளிர்ந்த தண்ணீரைக் குடிக்கச் சொன்னால் முகம் சுளிப்பதும், தாகம் எடுக்கவில்லை என்று தவிர்ப்பதும் பல வீடுகளில் அன்றாடப் பிரச்சினையாக இருக்கிறது. ஆனால், வெளியில் குளிராக இருக்கிறது என்பதற்காக உடலுக்குத் தேவையான தண்ணீரின் அளவு குறைந்துவிடாது. குழந்தைகளின் உடலில் நீர்ச்சத்து சீராக இருக்க வேண்டியது அவசியம்.

குழந்தைகளைத் தொடர்ந்து வற்புறுத்தித் தண்ணீர் குடிக்க வைப்பதற்குப் பதிலாக, அவர்களுக்குப் பிடித்தமான சில உணவுகள், சூடான பானங்கள் மற்றும் சிறிய பழக்கவழக்கங்கள் மூலம் நீர்ச்சத்து கிடைக்கச் செய்யலாம். அதிலும், வீட்டிலேயே எளிதாகப் பின்பற்றக்கூடிய 5 வழிகள் இருக்கின்றன. அவை என்னென்ன என்று பார்க்கலாம்.

1. குளிர்ந்த தண்ணீருக்குப் பதிலாக வெதுவெதுப்பான பானங்கள்!

குளிர்காலத்தில் ஐஸ் போன்ற குளிர்ந்த தண்ணீரைக் குழந்தைகள் விரும்பாமல் இருக்கலாம். இதற்குப் பதிலாக மிதமான சூட்டில் வெதுவெதுப்பான தண்ணீரைக் கொடுக்கலாம். குழந்தையின் வயதுக்கு ஏற்றவாறு, சிறிதளவு தேன் மற்றும் எலுமிச்சை சேர்த்த வெதுவெதுப்பான பானத்தையும் வழங்கலாம்.

மேலும், தக்காளி சூப், கீரை சூப், காய்கறி சூப் போன்றவற்றையும் உணவில் சேர்க்கலாம். இவை உடலுக்குத் தேவையான திரவத்தை வழங்குவதுடன், குளிரையும் சமாளிக்க உதவும். சிக்கன் சூப் போன்றவற்றையும் குழந்தைகளின் உணவுப் பழக்கத்திற்கு ஏற்ப கொடுக்கலாம்.

2. தண்ணீருக்குப் பதிலாக நீர்ச்சத்து நிறைந்த பழங்கள்!

குழந்தைகள் தண்ணீர் குடிக்க மறுத்தால், நீர்ச்சத்து அதிகமுள்ள பழங்கள் மற்றும் காய்கறிகளை உணவில் சேர்ப்பது நல்ல மாற்றமாக இருக்கும்.

குறிப்பாக, ஆரஞ்சு, சாத்துக்குடி, வெள்ளரிக்காய், கேரட், பீட்ரூட் போன்றவற்றைக் கொடுக்கலாம். இவற்றில் இயற்கையாகவே நீர்ச்சத்து உள்ளது. அதேபோல், பால், மோர் போன்ற பானங்களும் குழந்தைகளின் தினசரி திரவத் தேவைக்கு உதவுகின்றன.

காலை அல்லது மாலை சிற்றுண்டி நேரத்தில் பழங்களைத் துண்டுகளாக வெட்டிக் கொடுத்தால், குழந்தைகள் ஆர்வத்துடன் சாப்பிடுவார்கள்.

3. குழந்தைகளுக்குப் பிடித்தமான தண்ணீர் பாட்டில் வாங்கிக் கொடுங்கள்!

இது சிறிய விஷயமாகத் தோன்றலாம். ஆனால், குழந்தைகளின் தண்ணீர் குடிக்கும் பழக்கத்தில் பாட்டிலுக்கும் பங்கு இருக்கிறது.

அவர்களுக்குப் பிடித்த கார்ட்டூன் கதாபாத்திரங்கள் இடம்பெற்ற வண்ணமயமான பாட்டில்கள் அல்லது நேரத்தைக் குறிக்கும் அளவீடுகள் கொண்ட பாட்டில்களை வாங்கிக் கொடுக்கலாம். தண்ணீர் நீண்ட நேரம் குளிர்ச்சியாக இல்லாமல், அறை வெப்பநிலையில் இருக்கும்படி பார்த்துக்கொள்ளலாம்.

பள்ளிக்குச் செல்லும்போதும் விளையாடும்போதும் பாட்டிலை அருகில் வைத்திருப்பது, அவ்வப்போது தண்ணீர் குடிக்கும் பழக்கத்தை உருவாக்கும்.

4. காய்ச்சல், சளி இருக்கும்போது கவனம் தேவை!

குழந்தைகளுக்குச் சளி, காய்ச்சல் ஏற்படும்போது தண்ணீர் குடிப்பதை மேலும் தவிர்க்கலாம். இதனால் உடலில் நீர்ச்சத்து குறையும் அபாயம் உள்ளது.

இத்தகைய நேரங்களில் மருத்துவரின் ஆலோசனையுடன் குழந்தைகளுக்கான எலக்ட்ரோலைட் கரைசல் அல்லது ORS வழங்கலாம். இது உடலில் இழக்கப்படும் நீர் மற்றும் அத்தியாவசிய உப்புகளை ஈடுசெய்ய உதவும்.

குறிப்பாக, வாந்தி அல்லது வயிற்றுப்போக்கு ஏற்பட்டால் நீர்ச்சத்து இழப்பு அதிகரிக்கலாம். எனவே, சுயமாக எந்தவொரு எலக்ட்ரோலைட் பானத்தையும் தேர்வு செய்யாமல், குழந்தை நல மருத்துவரின் ஆலோசனையைப் பெறுவது நல்லது.

5. நீர்ச்சத்துக் குறைபாட்டின் அறிகுறிகளை அலட்சியம் செய்யாதீர்கள்!

குழந்தைகள் போதுமான அளவு தண்ணீர் குடிக்கிறார்களா என்பதைப் பெற்றோர்கள் கவனிப்பது அவசியம். குறிப்பாக, உடலில் நீர்ச்சத்து குறையும்போது சில அறிகுறிகள் வெளிப்படலாம்.

• உதடுகள் மற்றும் வாய் வறண்டு காணப்படுதல்.

• வழக்கத்தைவிட குறைவாகச் சிறுநீர் கழித்தல்.

• சிறுநீர் அடர் மஞ்சள் நிறத்தில் வெளியேறுதல்.

• வழக்கத்திற்கு மாறாக எரிச்சல் அல்லது கோபம் அடைதல்.

• அதிக சோர்வு மற்றும் கவனக்குறைவு.

குழந்தைகளுக்கு சிறுநீர் மிகக் குறைவாக வெளியேறுதல், கண்கள் குழிவிழுதல், வழக்கத்திற்கு மாறான மந்தநிலை போன்ற அறிகுறிகள் இருந்தால் உடனடியாக மருத்துவ உதவியை நாட வேண்டும்.

பெற்றோர்கள் கவனிக்க வேண்டியது என்ன?

குளிர்காலத்தில் குழந்தைகளுக்குத் தண்ணீர் குடிக்கும் பழக்கத்தை உருவாக்குவது என்பது ஒவ்வொரு முறையும் வற்புறுத்துவதில் இல்லை. அவர்களுக்குப் பிடித்தமான வெதுவெதுப்பான பானங்கள், நீர்ச்சத்து நிறைந்த பழங்கள், சூப் மற்றும் சரியான தண்ணீர் பாட்டில் போன்ற சிறிய மாற்றங்களே உதவியாக இருக்கும்.

ஒரே நேரத்தில் அதிக அளவு தண்ணீர் குடிக்க வைப்பதற்குப் பதிலாக, நாள் முழுவதும் சிறிய இடைவெளிகளில் குடிக்கப் பழக்கப்படுத்துங்கள். குழந்தையின் வயது, உடல் செயல்பாடு மற்றும் உடல்நிலைக்கு ஏற்ப திரவத் தேவை மாறுபடும் என்பதையும் நினைவில் கொள்ளுங்கள். நீர்ச்சத்துக் குறைபாட்டின் ஆரம்ப அறிகுறிகளை அடையாளம் கண்டுகொண்டால், சரியான நேரத்தில் கவனம் செலுத்த முடியும்.