ரூ.2.26 லட்சம் கோடி சொத்து: இந்தியாவின் நம்பர் 1 பணக்கார கோவில் எது தெரியுமா? - டாப் 5 பட்டியல்!

இந்தியாவின் டாப் 5 பணக்கார கோவில்களின் பட்டியலில் ஆந்திராவின் திருப்பதி கோவில் சுமார் ரூ.2.26 லட்சம் கோடி சொத்து மதிப்புடன் முதலிடத்தை பிடித்துள்ளது. 2வது இடத்தில் ஸ்ரீ பத்மநாபஸ்வாமி கோவில் ரூ.1.2 லட்சம் கோடிக்கு அதிகமான சொத்துகளுடன் உள்ளது.

1. திருப்பதி வெங்கடாசலபதி கோவில் (ஆந்திரப் பிரதேசம்)

இந்தியாவில் உள்ள புகழ்பெற்ற வழிபாட்டுத் தலங்களில் பக்தர்களின் காணிக்கைகள், அசையும் மற்றும் அசையா சொத்துகளின் அடிப்படையில் நாட்டின் டாப் 5 பணக்கார கோவில்கள் குறித்த பட்டியல் வெளியாகியுள்ளது. இதில் ஆந்திராவில் உள்ள திருப்பதி ஏழுமலையான் கோவில் முதலிடத்தைப் பிடித்துள்ளது.

மதிப்பிடப்பட்ட சொத்து மதிப்பு: சுமார் ரூ.2.26 லட்சம் கோடிக்கும் அதிகம். அரசியல் தலைவர்கள், திரைத்துறையினர் மற்றும் கோடிக்கணக்கான பொதுமக்களின் விருப்பமான வழிபாட்டுத் தலமாக விளங்கும் இக்கோவிலில் தினசரி கோடிக்கணக்கில் காணிக்கைகள் குவிகின்றன.

2. ஸ்ரீ பத்மநாபஸ்வாமி கோவில் (கேரளா)

இப்பட்டியலில் 2-வது இடத்தில் கேரளா மாநிலம் திருவனந்தபுரம் மாவட்டத்தில் அமைந்துள்ள ஸ்ரீ பத்மநாபஸ்வாமி கோவில் உள்ளது.மதிப்பிடப்பட்ட சொத்து மதிப்பு: சுமார் ரூ.1.2 லட்சம் கோடிக்கும் அதிகம்.கோவிலின் பாதாள ரகசிய அறைகளில் தங்கம், வைரம், நவரத்தினங்கள் மற்றும் விலைமதிப்பற்ற பழங்கால ஆபரணங்கள் பெருமளவில் பாதுகாக்கப்பட்டு வருகின்றன.

3. ஷீரடி சாய்பாபா கோவில் (மகாராஷ்டிரா)

3-வது இடத்தில் மகாராஷ்டிரா மாநிலத்தில் அமைந்துள்ள புகழ்பெற்ற ஷீரடி சாய்பாபா கோவில் உள்ளது. மதிப்பிடப்பட்ட சொத்து மதிப்பு: சுமார் ரூ.2,500 கோடி முதல் ரூ.3,000 கோடி வரை. உலகம் முழுவதிலுமிருந்து வரும் லட்சக்கணக்கான சாய்பாபா பக்தர்களின் காணிக்கைகளால் இக்கோவில் பெரும் வருவாயைப் பெறுகிறது.

4. குருவாயூர் கோவில் (கேரளா)

4வது இடத்தில் கேரளா மாநிலம் திருச்சூர் மாவட்டத்தில் அமைந்துள்ள பிரசித்தி பெற்ற குருவாயூரப்பன் கோவில் உள்ளது. மதிப்பிடப்பட்ட சொத்து மதிப்பு: சுமார் ரூ.2,500 கோடிக்கும் அதிகம்.

கேரளாவின் மிக முக்கிய ஆன்மீகத் தலங்களில் ஒன்றாக விளங்கும் இக்கோவிலில் தங்க, வெள்ளி நகைகள் மற்றும் வங்கி வைப்பு நிதிகள் அதிகளவில் உள்ளன.

5. ஸ்ரீ மாதா வைஷ்ணோ தேவி கோவில் (ஜம்மு காஷ்மீர்)

5-வது இடத்தில் ஜம்மு காஷ்மீரில் திரிகூட மலையில் அமைந்துள்ள ஸ்ரீ மாதா வைஷ்ணோ தேவி கோவில் உள்ளது. மதிப்பிடப்பட்ட சொத்து மதிப்பு: சுமார் ரூ.2,000 கோடிக்கும் அதிகம். பல்வேறு அரசியல் மற்றும் சினிமா பிரபலங்கள் விரும்பிச் செல்லும் முக்கியத் தலமாக இது திகழ்கிறது.