iPhone Effects : ஐபோனால் உலகளவில் குறைந்த பிறப்பு விகிதம் - அதிர்ச்சியூட்டும் ஆய்வு முடிவுகள்!

iPhone Effects : அண்மையில் வெளியாகியுள்ள இரண்டு முக்கியமான ஆய்வுகள், ஸ்மார்ட்போன்களின் பயன்பாடு, குறிப்பாக ஐபோன் (iPhone) பயன்படுத்துவது பிறப்பு விகித வீழ்ச்சிக்கு ஒரு முக்கிய காரணமாக இருக்கலாம் என்று சுட்டிக்காட்டியுள்ளன.

ஆய்வின் பின்னணி

பொதுவாகவே வாழ்க்கைத்தரம் உயரும்போது பிறப்பு விகிதம் குறையும் என்பது சமூகவியல் விதி. ஆனால், கடந்த 20 ஆண்டுகளில் இந்த வீழ்ச்சி ஒரு குறிப்பிட்ட வேகத்தில், உலகம் முழுவதும் ஒரே மாதிரியாக நிகழ்ந்திருப்பது ஆராய்ச்சியாளர்களை ஆச்சரியப்படுத்தியுள்ளது. 2007-ம் ஆண்டு ஐபோன் அறிமுகப்படுத்தப்பட்ட காலத்திலிருந்தே, இந்த வீழ்ச்சி பெரும் தாக்கத்தை ஏற்படுத்தியுள்ளது என்று ஆய்வுகள் கூறுகின்றன.

ஐபோன் எப்படிக் காரணமாகிறது?

அமெரிக்காவின் தேசிய பொருளாதார ஆராய்ச்சி பணியகம் (National Bureau of Economic Research) மேற்கொண்ட ஆய்வில், 2007 முதல் 2011 வரை ஐபோன் பயன்பாடு பரவிய பகுதிகளை ஆராய்ந்தனர். அப்போது, AT&T நெட்வொர்க் வசதி இருந்த இடங்களில் மற்ற இடங்களை விட பிறப்பு விகிதம் கணிசமாகக் குறைந்திருப்பது கண்டறியப்பட்டது.

ஆராய்ச்சியாளர்களின் கூற்றுப்படி, இதற்குப் பின்னால் உள்ள காரணங்கள் இவை:

• சமூக உறவுகளில் மாற்றம்: மக்கள் நேருக்கு நேர் நேரடியாகச் சந்தித்துப் பேசுவதைக் குறைத்துக்கொண்டு, டிஜிட்டல் உலகில் அதிக நேரம் செலவிடத் தொடங்கியுள்ளனர்.
• பாலியல் நடவடிக்கைகளில் சரிவு: நேருக்கு நேர் பழகுவது குறைந்ததாலும், ஆபாச இணையதளங்களின் பயன்பாடு அதிகரித்ததாலும் நிஜ வாழ்க்கையில் பாலியல் ஈடுபாடு குறைந்துள்ளதாகக் கருதப்படுகிறது.
• தகவல் அணுகல்: கருத்தடை மற்றும் குடும்பக் கட்டுப்பாடு குறித்த விழிப்புணர்வு மற்றும் தகவல்கள் இணையத்தின் மூலம் எளிதாகக் கிடைப்பது, இளம் வயதினரிடையே கர்ப்பத்தைத் தவிர்க்கும் வாய்ப்பை அதிகரித்துள்ளது.

உலகளாவிய தொழில்நுட்ப அதிர்ச்சி

சின்சினாட்டி பல்கலைக்கழகப் பொருளாதார நிபுணர்கள் 128 நாடுகளில் நடத்திய மற்றொரு ஆய்வு, ஸ்மார்ட்போன் பரவலையும் பதின்ம வயதினரின் பிறப்பு விகிதத்தையும் ஒப்பிட்டது. இதில், வளர்ந்த நாடுகள் முதல் வளரும் நாடுகள் வரை, கலாச்சாரம் மற்றும் சட்டங்கள் மாறுபட்டிருந்தாலும், ஸ்மார்ட்போன் பயன்பாடு அதிகரித்த வேகத்தில் பிறப்பு விகிதம் குறைந்திருப்பது பொதுவான ஒன்றாக உள்ளது. இது ஒரு "பொதுவான உலகளாவிய தொழில்நுட்ப அதிர்ச்சி" (common global technology shock) என்று ஆராய்ச்சியாளர்கள் குறிப்பிடுகின்றனர்.

ஸ்மார்ட்போன் மட்டுமே பிறப்பு விகித வீழ்ச்சிக்கு முழு முதற்காரணம் என்று ஆய்வாளர்கள் வாதிடவில்லை. 2008-ம் ஆண்டு ஏற்பட்ட நிதி நெருக்கடி, வேலைவாய்ப்பு சூழல், மன அழுத்தம் மற்றும் வாழ்க்கை முறை மாற்றங்கள் போன்ற பிற காரணிகளும் இதில் பெரும் பங்கு வகிக்கின்றன. இருப்பினும், ஸ்மார்ட்போன்களின் வரவு மனித நடத்தை மற்றும் சமூக தொடர்புகளில் மிகப்பெரிய மாற்றத்தை ஏற்படுத்தியுள்ளது என்பதை மறுக்க முடியாது.

இந்தியாவிலும் பிரேசிலும் போன்ற நடுத்தர வருமானம் கொண்ட நாடுகளில் கூட இப்போது பிறப்பு விகித வீழ்ச்சி வேகமாகப் பதிவாகி வருவது, இந்த உலகளாவிய மாற்றத்தை உறுதிப்படுத்துவதாக உள்ளது.

தொழில்நுட்பம் நம் கைகளில் உலகத்தையே கொண்டு வந்து சேர்த்தாலும், அது நம் அடிப்படை மனித உறவுகளிலும், இயற்கை நிகழ்வுகளிலும் ஏற்படுத்தியுள்ள தாக்கம், எதிர்காலத்தில் பெரும் சவாலாக மாறக்கூடும் என்று இந்த ஆய்வுகள் எச்சரிக்கின்றன.