உலகப் புகழ்பெற்ற ஃபேஷன் நிறுவனமான டியோர் (Dior) மற்றும் ஐக்கிய நாடுகள் கல்வி, அறிவியல் மற்றும் பண்பாட்டு அமைப்பான யுனெஸ்கோ (UNESCO) இணைந்து 2026-27 ஆம் ஆண்டிற்கான 'Women@Dior' மெண்டார்ஷிப் திட்டத்திற்கான விண்ணப்பங்களை வரவேற்கின்றன. உயர்கல்வி பயிலும் இளம் பெண்களைத் தலைவர்களாக உருவாக்குவதே இத்திட்டத்தின் நோக்கம். 2017-ல் தொடங்கப்பட்ட இந்தத் திட்டம், இதுவரை வணிகம், பொறியியல், கலை மற்றும் ஃபேஷன் உள்ளிட்ட பல்வேறு துறைகளைச் சேர்ந்த 2,800-க்கும் மேற்பட்ட பெண்களுக்கு உதவியுள்ளது.
26
யாரெல்லாம் விண்ணப்பிக்கலாம்?
இத்திட்டத்தில் சேர விரும்பும் பெண்கள் 30 வயதுக்கு உட்பட்டவர்களாக இருக்க வேண்டும். தற்போது முழுநேர உயர்கல்வி பயிலும் மாணவியாக இருப்பது அவசியம். குறிப்பாக, இளங்கலைப் படிப்பின் (Undergraduate) இறுதி ஆண்டில் இருப்பவர்கள் அல்லது முதுகலை (Postgraduate) படித்துக் கொண்டிருப்பவர்கள் இதற்கு விண்ணப்பிக்கலாம். எந்தத் துறையைச் சார்ந்த மாணவியாகவும் இருக்கலாம். ஆனால், ஆங்கில மொழியில் நல்ல புலமை பெற்றிருப்பது கட்டாயம்.
36
தனிப்பட்ட வழிகாட்டுதல் (Mentorship)
தேர்வு செய்யப்படும் ஒவ்வொரு மாணவிக்கும், டியோர் நிறுவனத்தைச் சேர்ந்த ஒரு நிபுணர் வழிகாட்டியாக (Mentor) நியமிக்கப்படுவார். மாணவர்களின் ஆர்வம் மற்றும் தொழில்முறை இலக்குகளைப் பொறுத்து இந்த வழிகாட்டிகள் தேர்ந்தெடுக்கப்படுவார்கள். இவர்கள் மாணவர்களுக்குத் தொழில் திட்டமிடல் (Career Planning) மற்றும் நெட்வொர்க்கிங் குறித்த ஆலோசனைகளை வழங்குவார்கள்.
மெண்டார்ஷிப் மட்டுமின்றி, பிரத்யேக ஆன்லைன் தளம் மூலமாக 16-க்கும் மேற்பட்ட பாடப்பிரிவுகளை மாணவர்கள் கற்க வேண்டும். சுய விழிப்புணர்வு (Self-awareness), தன்னாட்சி (Autonomy), படைப்பாற்றல் (Creativity), உள்ளடக்கம் (Inclusion) மற்றும் நிலையான வளர்ச்சி (Sustainable Development) போன்ற தலைப்புகளில் இந்தப் பாடங்கள் அமைந்திருக்கும்.
56
'ட்ரீம் ஃபார் சேஞ்ச்' ப்ராஜெக்ட்
பாடநெறிகளை முடித்த பிறகு, மாணவர்கள் சிறு குழுக்களாகப் பிரிக்கப்பட்டு "Dream for Change" என்ற தலைப்பில் ஒரு ப்ராஜெக்ட்டை உருவாக்க வேண்டும். பெண்கள் மற்றும் சிறுமிகளின் முன்னேற்றத்திற்குத் தடையாக இருக்கும் உண்மையான சமூகப் பிரச்சினைகளுக்குத் தீர்வு காணும் வகையில் இந்தத் திட்டம் அமைய வேண்டும்.
66
விண்ணப்பிப்பது எப்படி?
விருப்பமுள்ளவர்கள் தங்கள் பயோடேட்டா (CV/Resume) மற்றும் 600 வார்த்தைகளுக்கு மிகாமல் எழுதப்பட்ட ஊக்கக் கடிதத்தை (Letter of Motivation) சமர்ப்பிக்க வேண்டும். அந்தக் கடிதத்தில், பெண்கள் முன்னேற்றத்தில் தங்களுக்கு உள்ள ஆர்வம் மற்றும் இத்திட்டத்தில் சேருவதற்கான காரணத்தைத் தெளிவாகக் குறிப்பிட வேண்டும். இத்துடன் கல்லூரிப் படிப்பிற்கான சான்றிதழையும் இணைக்க வேண்டும்.
முக்கிய குறிப்பு
இது ஒரு வழிகாட்டுதல் மற்றும் கல்வித் திட்டம் மட்டுமே. இதன் மூலம் டியோர் அல்லது யுனெஸ்கோவில் வேலைவாய்ப்போ அல்லது இன்டர்ன்ஷிப்போ (Internship) வழங்கப்படாது என்பதை மாணவர்கள் கவனத்தில் கொள்ள வேண்டும். அனைத்துப் பயிற்சிகளையும் முழுமையாக முடிப்பவர்களுக்கு மட்டுமே சான்றிதழ் வழங்கப்படும்.
