வேலை இல்லனு கவலையே வேண்டாம்! ஓமன் சுல்தான் வெளியிட்ட சர்ப்ரைஸ் அறிவிப்பு!

ஓமன் அரசு, 2026-ஆம் ஆண்டில் 60,000 புதிய வேலைவாய்ப்புகளை உருவாக்க ஒரு மெகா திட்டத்தை அறிவித்துள்ளது. அரசு, தனியார் மற்றும் அரசு ஆதரவு திட்டங்கள் என மூன்று பிரிவுகளில் இந்த வாய்ப்புகள் வழங்கப்படும்.

ஓமன் வேலைவாய்ப்பு

ஓமன் நாட்டின் பொருளாதாரத்தை மேம்படுத்தவும், உள்நாட்டு இளைஞர்களுக்கு வேலைவாய்ப்பை உறுதி செய்யவும், 2026-ஆம் ஆண்டில் மட்டும் 60,000 புதிய வேலைவாய்ப்புகளை உருவாக்க அந்நாட்டு அரசு அதிரடித் திட்டம் தீட்டியுள்ளது. ஓமன் சுல்தான் ஹைதம் பின் தாரிக் (His Majesty Sultan Haitham bin Tarik) அவர்களின் நேரடி வழிகாட்டுதலின்படி இந்த அறிவிப்பு வெளியாகியுள்ளது.

மூன்று பிரிவுகளில் வேலைவாய்ப்பு

ஓமன் தொழிலாளர் அமைச்சகம் வெளியிட்டுள்ள இந்த விரிவான திட்டத்தின் கீழ், வேலைவாய்ப்புகள் மூன்று முக்கியப் பிரிவுகளாகப் பிரிக்கப்பட்டுள்ளன:

• அரசுத் துறை (10,000 இடங்கள்): சிவில், ராணுவம் மற்றும் பாதுகாப்புத் துறைகளில் உள்ள காலிப்பணியிடங்கள் நிரப்பப்படும்.

• அரசு ஆதரவு திட்டங்கள் (17,000 இடங்கள்): சம்பள மானியத் திட்டங்கள், பயிற்சியுடன் கூடிய வேலைவாய்ப்பு மற்றும் பணியின் போதே கற்றுக்கொள்ளும் (On-the-job training) திட்டங்கள் மூலம் இவை வழங்கப்படும்.

• தனியார் துறை (33,000 இடங்கள்): இத்திட்டத்தின் முதுகெலும்பாகத் தனியார் துறை கருதப்படுகிறது. தொழில் துறை, எண்ணெய் மற்றும் எரிவாயு, சுற்றுலா, வங்கி, ஐடி (IT), கட்டுமானம் மற்றும் டெலிகாம் உள்ளிட்ட பல்வேறு துறைகளில் இந்த வாய்ப்புகள் உருவாக்கப்படும்.

ஓமன் விஷன் 2040

இந்த 60,000 வேலைவாய்ப்புகள் என்பது ஒரு தொடக்கமே. ஓமனின் 'பதினோராவது ஐந்தாண்டு வளர்ச்சித் திட்டத்தின்' (2026–2030) ஒரு பகுதியாக இது அமைந்துள்ளது. அடுத்த ஐந்து ஆண்டுகளில் சுமார் 7 லட்சம் வேலைவாய்ப்புகளை உருவாக்க ஓமன் அரசு இலக்கு நிர்ணயித்துள்ளது. இதற்காக ஆண்டுதோறும் சுமார் 500 மில்லியன் ஓமன் ரியால் பட்ஜெட் ஒதுக்கீடு செய்யப்பட்டுள்ளது.

திறன் மேம்பாட்டிற்கு முக்கியத்துவம்

வெறும் எண்களை மட்டும் இலக்காகக் கொள்ளாமல், தரமான வேலைவாய்ப்புகளை உருவாக்க ஓமன் அரசு முயல்கிறது. குறிப்பாக:

• கல்வி நிறுவனங்களின் பாடத்திட்டங்களை வேலைவாய்ப்புச் சந்தைக்கு ஏற்ப மாற்றுவது.

• செயற்கை நுண்ணறிவு (AI) போன்ற வளர்ந்து வரும் தொழில்நுட்பங்களில் பயிற்சி அளிப்பது.

• பயிற்சி மற்றும் தகுதிக்கேற்ப வேலைவாய்ப்புகளை உறுதி செய்வது.

தொலைநோக்கு பார்வை

"இது வெறும் வேலைவாய்ப்புத் திட்டம் மட்டுமல்ல, ஓமானியர்களின் திறமையை உலகத்தரம் வாய்ந்த போட்டித் திறனுக்கு உயர்த்துவதற்கான தொலைநோக்குப் பார்வை." என ஓமன் தொழிலாளர் துறை அமைச்சர் டாக்டர் மஹத் பின் சைத் பாவைன் கூறுகிறார்.

இந்தத் திட்டம் வெற்றியடையும் பட்சத்தில், ஓமன் நாட்டின் வேலையில்லாத் திண்டாட்டம் பெருமளவு குறைவதோடு, அந்நாட்டின் பொருளாதாரம் எண்ணெய் வளத்தை மட்டுமே நம்பியிருக்காமல் பன்முகத்தன்மை கொண்டதாக மாறும் என எதிர்பார்க்கப்படுகிறது.