AI ரெஸ்யூம் வைச்சிருக்கீங்களா? உஷார்! நிறுவனங்கள் சொல்வது இதுதான்.

LinkedIn லிங்க்ட்இன் 2026 அறிக்கையின்படி, 74% இந்திய நிறுவனங்கள் திறமையான ஊழியர்களைக் கண்டறிய சிரமப்படுகின்றன. AI மூலம் தயாரிக்கப்படும் ரெஸ்யூம்கள் வேலைவாய்ப்பைப் பாதிக்கிறதா? முழு விவரம் உள்ளே.

LinkedIn

இந்தியாவில் வேலைவாய்ப்பு நடவடிக்கைகள் கொரோனாவுக்கு முந்தைய காலத்தை விட 40% அதிகரித்துள்ளன. ஆனால், வேலை கொடுக்கும் நிறுவனங்களுக்கு (Recruiters) இது ஒரு பெரிய தலைவலியாக மாறியுள்ளது. லிங்க்ட்இன் (LinkedIn) வெளியிட்டுள்ள சமீபத்திய 2026 அறிக்கையின்படி, 74% இந்திய நிறுவனங்கள் தகுதியான விண்ணப்பதாரர்களைக் கண்டறிய முடியாமல் திணறுகின்றன. வேலைக்கு ஆட்கள் தேவை, ஆனால் சரியான ஆட்கள் கிடைப்பதில்லை என்ற நிலை உருவாகியுள்ளது.

AI ரெஸ்யூம்: வரமா? சாபமா?

செயற்கை நுண்ணறிவு (AI) தொழில்நுட்பம் வளர்ந்துவிட்டதால், பலரும் இப்போது சாட்ஜிபிடி (ChatGPT) போன்ற கருவிகள் மூலம் நொடியில் ரெஸ்யூம்களை (Resume) தயார் செய்து விடுகிறார்கள். இதுவே இப்போது பெரிய பிரச்சனையாக மாறியுள்ளது.

• கூட்டம் அதிகம், தரம் குறைவு: ஒரு வேலைக்கு ஆயிரக்கணக்கான விண்ணப்பங்கள் குவிகின்றன. ஆனால், அதில் பெரும்பாலானவை AI மூலம் உருவாக்கப்பட்டவை என்பதால், விண்ணப்பதாரரின் உண்மையான திறமையை (Genuine Skills) அறிவது நிறுவனங்களுக்குச் சவாலாக உள்ளது.

• நம்பகத்தன்மை கேள்விக்குறி: 50%-க்கும் மேற்பட்ட நிறுவனங்கள், AI மூலம் வரும் விண்ணப்பங்களில் எது உண்மையானது, எது போலியானது என்று கண்டுபிடிப்பது கடினமாக இருப்பதாகக் கூறுகின்றன.

திறமைக்கும் தேவைக்கும் உள்ள இடைவெளி (Skill Gap)

ஒரு பக்கம் AI கருவிகள் வேலை தேடுவதை எளிதாக்கினாலும், மறுபுறம் நிறுவனங்கள் எதிர்பார்ப்பது வேறு ஒன்றாக உள்ளது. "எங்களுக்கு வெறும் பட்டங்கள் (Degrees) அல்லது பழைய வேலை அனுபவம் முக்கியமல்ல; வேலையைச் செய்து முடிக்கும் திறமை (Skills) தான் முக்கியம்" என்று லிங்க்ட்இன் அதிகாரி ருச்சி ஆனந்த் கூறுகிறார். ஆனால், விண்ணப்பதாரர்களோ இந்த மாற்றத்திற்குத் தயாராக இல்லை என்பதே வருத்தமான செய்தி.

AI-ஐ எப்படி சரியாகப் பயன்படுத்துவது?

பிரச்சனை AI-ல் இல்லை, அதை எப்படிப் பயன்படுத்துகிறோம் என்பதில் தான் உள்ளது. நிறுவனங்களும் இப்போது சரியான ஆட்களைத் தேர்வு செய்ய AI-ஐயே நம்பத் தொடங்கியுள்ளன.

• 2026-ல் சுமார் 80% நிறுவனங்கள் ஆட்களைத் தேர்வு செய்ய AI கருவிகளைப் பயன்படுத்தத் திட்டமிட்டுள்ளன.

• வீடியோ நேர்காணல்கள் (Screening Interviews) மற்றும் திறனறித் தேர்வுகள் நடத்த AI பெரிதும் உதவும் என்று எதிர்பார்க்கப்படுகிறது.

வேலை தேடுபவர்களுக்கு டிப்ஸ்

1. AI-ஐ நம்பி ஏமாறாதீர்கள்: ரெஸ்யூமை AI மூலம் உருவாக்கினாலும், அதை உங்கள் சொந்த வார்த்தைகளில் திருத்தி, உங்கள் உண்மையான திறமைகளைச் சேருங்கள்.

2. திறமையை வளருங்கள்: வெறும் படிப்பை மட்டும் நம்பாமல், துறை சார்ந்த புதிய தொழில்நுட்பங்களைக் கற்றுக்கொள்ளுங்கள்.

3. நேர்மை முக்கியம்: இல்லாத திறமையை இருப்பதாகக் காட்டுவது, நேர்காணலில் சிக்கலை உண்டாக்கும்.