இஸ்ரோவில் வேலை பார்க்க ஆசையா? அரிய வாய்ப்பு! தேர்வே இல்லாமல் ஆட்கள் தேர்வு - முழு விபரம் இதோ!

ISRO Mahendragiri நெல்லை மகேந்திரகிரி இஸ்ரோ மையத்தில் 100 அப்ரண்டிஸ் காலியிடங்கள் அறிவிப்பு. டிப்ளமோ, டிகிரி படித்தவர்கள் ஜனவரி 10, 11ல் நடக்கும் நேர்முகத் தேர்வில் பங்கேற்கலாம்.

ISRO Mahendragiri இஸ்ரோவில் பொன்னான வாய்ப்பு

இந்திய விண்வெளி ஆராய்ச்சி நிறுவனமான இஸ்ரோவின் (ISRO) கீழ், திருநெல்வேலி மாவட்டம் மகேந்திரகிரியில் செயல்பட்டு வரும் இஸ்ரோ உந்தும வளாகத்தில் (IPRC) காலியாக உள்ள பணியிடங்களை நிரப்புவதற்கான அறிவிப்பு வெளியாகியுள்ளது. பொறியியல், தொழில்நுட்பம் மற்றும் கலை அறிவியல் படித்தவர்களுக்கு அப்ரண்டிஸ் (Apprentice) பயிற்சிப் பணிக்கான இந்த வாய்ப்பு அறிவிக்கப்பட்டுள்ளது. மொத்தம் 100 பணியிடங்கள் நிரப்பப்பட உள்ளன.

பணிப்பிரிவுகள் என்னென்ன?

மொத்தம் அறிவிக்கப்பட்டுள்ள 100 காலியிடங்களில், பொறியியல் பட்டதாரிகளுக்கான கிராஜுவேட் அப்ரண்டிஸ் (Graduate Apprentice), டிப்ளமோ முடித்தவர்களுக்கான டெக்னீசியன் அப்ரண்டிஸ் (Technician Apprentice) மற்றும் கலை, அறிவியல் பட்டதாரிகளுக்கான நான்-இன்ஜினியரிங் அப்ரண்டிஸ் (Non-Engineering) என மூன்று பிரிவுகளாகப் பிரிக்கப்பட்டுள்ளன.

பொறியியல் பட்டதாரிகளுக்கான வாய்ப்புகள்

கிராஜுவேட் அப்ரண்டிஸ் (Engineering) பிரிவில் மொத்தம் 41 இடங்கள் காலியாக உள்ளன. மெக்கானிக்கல் (12), எலக்ட்ரானிக்ஸ் (10), எலக்ட்ரிக்கல் (5), சிவில் (4), இன்ஸ்ட்ருமென்டேஷன் (3), கெமிக்கல் (2), கம்ப்யூட்டர் சயின்ஸ் (5) ஆகிய துறைகளில் பி.இ அல்லது பி.டெக் (B.E/B.Tech) முடித்தவர்கள் விண்ணப்பிக்கலாம். இவர்களுக்கு மாதந்தோறும் ரூ.9,000 உதவித்தொகை வழங்கப்படும்.

டிப்ளமோ முடித்தவர்களுக்கு வாய்ப்பு

டெக்னீசியன் அப்ரண்டிஸ் பிரிவில் 44 இடங்கள் காலியாக உள்ளன. மெக்கானிக்கல் (15), எலக்ட்ரானிக்ஸ் (10), எலக்ட்ரிக்கல் (10), சிவில் (5), கெமிக்கல் (4) ஆகிய துறைகளில் டிப்ளமோ (Diploma) முடித்தவர்கள் கலந்து கொள்ளலாம். இவர்களுக்கு மாதந்தோறும் ரூ.8,000 உதவித்தொகை வழங்கப்படும்.

கலை மற்றும் அறிவியல் பிரிவினர்

பொறியியல் அல்லாத பட்டதாரிகளுக்கும் (Non-Engineering) இஸ்ரோவில் வாய்ப்பு வழங்கப்பட்டுள்ளது. பி.ஏ (Arts), பி.எஸ்சி (Science), பி.காம் (Commerce) போன்ற டிகிரிகளை முடித்தவர்களுக்கு 15 இடங்கள் ஒதுக்கப்பட்டுள்ளன. இவர்களுக்கும் மாத ஊக்கத்தொகையாக ரூ.9,000 வழங்கப்படும்.

வயது வரம்பு என்ன?

விண்ணப்பதாரர்கள் 20.12.2025 தேதியின்படி வயது வரம்பு கணக்கிடப்படும். அதன்படி, டெக்னீசியன் அப்ரண்டிஸ் பணிக்கு விண்ணப்பிப்பவர்கள் 35 வயதிற்குள்ளும், கிராஜுவேட் அப்ரண்டிஸ் பணிக்கு விண்ணப்பிப்பவர்கள் 28 வயதிற்குள்ளும் இருக்க வேண்டும். அரசு விதிகளின்படி வயது வரம்பில் தளர்வுகள் உண்டு.

தேர்வு முறை மற்றும் நேர்காணல் தேதி

இந்தப் பணியிடங்களுக்கு எழுத்துத் தேர்வு கிடையாது. தகுதியானவர்கள் நேரடியாகத் தேர்வு செய்யப்படுவார்கள். விருப்பமுள்ளவர்கள் தங்களது அசல் சான்றிதழ்களுடன் மகேந்திரகிரியில் உள்ள இஸ்ரோ வளாகத்திற்கு நேரில் செல்ல வேண்டும்.

• ஜனவரி 10, 2026 (சனிக்கிழமை): இன்ஜினியரிங் கிராஜுவேட் அப்ரண்டிஸ் மற்றும் டெக்னீசியன் அப்ரண்டிஸ் (டிப்ளமோ) பிரிவினருக்கு நேர்காணல் நடைபெறும்.

• ஜனவரி 11, 2026 (ஞாயிற்றுக்கிழமை): நான்-இன்ஜினியரிங் (Arts/Science/Commerce) பிரிவினருக்கு நேர்காணல் நடைபெறும்.