விடிஞ்சா வேலை போயிடுமா? அமேசான் ஊழியர்களுக்கு 'ஷாக்'! தவறுதலாக லீக் ஆன இமெயில் - 16,000 பேர் கதி என்ன?

Amazon அமேசான் தவறுதலாக அனுப்பிய மின்னஞ்சலால் 16,000 பேரின் வேலைக்கு ஆபத்து ஏற்பட்டுள்ளது. AWS மற்றும் பிற துறைகளில் பணிநீக்கம் இருக்கலாம். தவறுதலாக லீக் ஆன இமெயில் - 16,000 பேர் கதி என்ன?

Amazon

உலகின் முன்னணி நிறுவனமான அமேசான் (Amazon), தனது ஊழியர்களுக்குத் தவறுதலாக அனுப்பிய ஒரு மின்னஞ்சல் (Email) தற்போது பெரும் பரபரப்பை ஏற்படுத்தியுள்ளது. 'புராஜெக்ட் டான்' (Project Dawn) என்ற பெயரில் அனுப்பப்பட்ட இந்த மின்னஞ்சல் மூலம், சுமார் 16,000 ஊழியர்கள் பணிநீக்கம் செய்யப்படலாம் என்ற அதிர்ச்சி தகவல் வெளியாகியுள்ளது. ஏற்கனவே கடந்த ஆண்டு அக்டோபரில் 14,000 பேர் பணிநீக்கம் செய்யப்பட்ட நிலையில், இந்த செய்தி ஊழியர்கள் மத்தியில் பெரும் அச்சத்தை உருவாக்கியுள்ளது.

தவறுதலாக வந்த மின்னஞ்சல்

அமேசான் வெப் சர்வீசஸ் (AWS) பிரிவில் பணியாற்றும் சில ஊழியர்களுக்கு, கொலீன் ஆப்ரி (Colleen Aubrey) என்ற உயர் அதிகாரியின் பெயரில் ஒரு மின்னஞ்சல் வந்தது. அதில், "அமெரிக்கா, கனடா மற்றும் கோஸ்டாரிகாவில் உள்ள பாதிக்கப்பட்ட ஊழியர்களுக்குத் தகவல் தெரிவிக்கப்பட்டுவிட்டது" என்று குறிப்பிடப்பட்டிருந்தது. ஆனால், உண்மையில் யாருக்கும் அதிகாரப்பூர்வ அறிவிப்பு வரவில்லை. இந்த மின்னஞ்சல் தவறுதலாக முன்கூட்டியே அனுப்பப்பட்டதாகக் கூறப்படுகிறது.

எந்தெந்த துறைகள் பாதிப்பு?

வெளியான தகவல்களின்படி, இந்த முறை AWS (Cloud), பிரைம் வீடியோ (Prime Video), ரீடெயில் மற்றும் மனிதவள மேம்பாட்டுத் துறை (HR) ஆகியவற்றில் அதிக பணிநீக்கங்கள் இருக்கலாம் என்று தெரிகிறது. இந்தியா உள்ளிட்ட மற்ற நாடுகளிலும் இதன் தாக்கம் இருக்குமா என்பது குறித்துத் தெளிவான தகவல்கள் இன்னும் வெளியாகவில்லை. ஆனால், பெங்களூரு, சென்னை, ஹைதராபாத் அலுவலகங்களில் உள்ள ஊழியர்களும் கலக்கத்தில் உள்ளனர்.

காரணம் என்ன?

அமேசான் நிறுவனம் தனது நிர்வாக அடுக்குகளைக் குறைக்கவும் (Reducing Layers), தேவையற்ற நடைமுறைகளை நீக்கவும் இந்த நடவடிக்கையை எடுப்பதாகக் கூறப்படுகிறது. மேலும், செயற்கை நுண்ணறிவு (AI) தொழில்நுட்பத்தின் வளர்ச்சியும் இந்த பணிநீக்கங்களுக்கு ஒரு காரணமாக இருக்கலாம் என்று நிபுணர்கள் கருதுகின்றனர். இது குறித்து அமேசான் நிறுவனம் இதுவரை அதிகாரப்பூர்வ விளக்கம் எதையும் அளிக்கவில்லை.