Old Bank Account: 2 ஆண்டுகளாக வங்கிக் கணக்கைப் பயன்படுத்தவில்லையா? உங்கள் பணம் என்ன ஆகும்?

Old Bank Account: வேலை மாறுவது, வேறு வங்கியில் புதிய கணக்கு தொடங்குவது போன்ற காரணங்களால் பழைய வங்கிக் கணக்கைப் பலரும் பயன்படுத்தாமல் விட்டுவிடுகிறார்கள். ஆனால், அந்தக் கணக்கில் இருக்கும் பணம் என்னவாகும் தெரியுமா?

செயலற்ற வங்கிக் கணக்கு என்னவாகும்?

வங்கியில் சேமிப்புக் கணக்கு அல்லது நடப்புக் கணக்கைத் தொடங்கிய பிறகு, சில காரணங்களால் அதை நீண்ட காலம் பயன்படுத்தாமல் விட்டிருக்கலாம். வேலை மாறும்போது புதிய வங்கிக் கணக்கைத் தொடங்குவது, சம்பளக் கணக்கை மாற்றுவது, பழைய கணக்கின் விவரங்களை மறந்துவிடுவது போன்றவை இதற்குக் காரணங்களாக இருக்கலாம். ஆனால், அந்தக் கணக்கில் பணம் இருந்தால் அது தானாகவே காணாமல் போய்விடாது. இந்திய ரிசர்வ் வங்கியின் (RBI) விதிகளின்படி, இரண்டு ஆண்டுகளுக்கு மேலாக வாடிக்கையாளரால் தொடங்கப்பட்ட பரிவர்த்தனைகள் இல்லாத சேமிப்புக் கணக்கு அல்லது நடப்புக் கணக்கு செயலற்ற கணக்காக வகைப்படுத்தப்படும். வாடிக்கையாளர் நேரடியாகச் செய்யும் பரிவர்த்தனைகள் மட்டுமின்றி, அவர் சார்பாக மற்றவர்கள் மேற்கொள்ளும் சில பரிவர்த்தனைகளும் கணக்கில் எடுத்துக்கொள்ளப்படலாம். அதே நேரத்தில், வங்கி வரவு வைக்கும் சேமிப்புக் கணக்குக்கான வட்டி அல்லது வங்கி பிடித்தம் செய்யும் சேவைக் கட்டணம் மட்டும் கணக்கு செயல்பாட்டில் இருப்பதற்கான ஆதாரமாகக் கருதப்படாது. எனவே, வட்டித் தொகை வரவு வைக்கப்படுவதால் மட்டுமே கணக்கு செயலற்ற நிலைக்குச் செல்லாது என்று நினைக்கக் கூடாது. கணக்கின் நிலையைத் தெரிந்துகொள்ள சம்பந்தப்பட்ட வங்கியை அணுகுவது சிறந்தது.

செயலற்ற வங்கிக் கணக்கை மீண்டும் செயல்படுத்துவது எப்படி?

பழைய வங்கிக் கணக்கை மீண்டும் பயன்படுத்த வேண்டும், சம்பந்தப்பட்ட வங்கியை அணுகி கணக்கின் தற்போதைய நிலையைத் தெரிந்துகொள்ள வேண்டும். அதன் பிறகு, வாடிக்கையாளரை அடையாளம் காணும் நடைமுறையான கேஒய்சி (KYC) விவரங்களைப் புதுப்பித்து, கணக்கை மீண்டும் செயல்படுத்தக் கோரலாம். அடையாளச் சான்று, முகவரிச் சான்று உள்ளிட்ட ஆவணங்களை வங்கி கேட்கலாம். இந்திய ரிசர்வ் வங்கியின் வழிகாட்டுதலின்படி, செயலற்ற கணக்குகளை மீண்டும் செயல்படுத்துவதற்கான கேஒய்சி புதுப்பிப்பு வசதியை வங்கிகள் அனைத்துக் கிளைகளிலும், வாடிக்கையாளரின் சொந்தக் கிளை அல்லாத பிற கிளைகளிலும் வழங்க வேண்டும். வசதி உள்ள இடங்களில் காணொளி மூலம் வாடிக்கையாளரை அடையாளம் காணும் நடைமுறையையும் பயன்படுத்தலாம். மேலும், அங்கீகரிக்கப்பட்ட வங்கி வணிகத் தொடர்பாளர்கள் மூலமாகவும் கேஒய்சி புதுப்பிப்பை மேற்கொள்ளும் வசதியை வங்கிகள் வழங்கலாம். தேவையான ஆவணங்கள் மற்றும் சரிபார்ப்பு நடைமுறைகள் முடிந்த பிறகு, மூன்று வேலை நாட்களுக்குள் கணக்கை மீண்டும் செயல்படுத்த வேண்டும் என்பது ஆர்பிஐயின் வழிகாட்டுதலாகும். இதற்காக வாடிக்கையாளரிடம் தனியாகக் கட்டணம் வசூலிக்கக் கூடாது.

பத்து ஆண்டுகளாகப் பயன்படுத்தாவிட்டால் பணம் பறிபோய்விடுமா?

வங்கிக் கணக்கு அல்லது வைப்புத்தொகையில் பணம் தொடர்ந்து பத்து ஆண்டுகள் கோரப்படாமல் இருந்தால், சம்பந்தப்பட்ட வங்கி அந்தத் தொகையை வைப்புதாரர் கல்வி மற்றும் விழிப்புணர்வு நிதிக்கு (டிபாசிட்டர் கல்வி மற்றும் விழிப்புணர்வு நிதி) மாற்ற வேண்டும். இந்த நிதியை இந்திய ரிசர்வ் வங்கி நிர்வகிக்கிறது. ஆனால், பணம் இந்த நிதிக்கு மாற்றப்பட்டுவிட்டதால் அந்த உரிமையை வாடிக்கையாளர் இழந்துவிடுகிறார் என்பது அர்த்தமில்லை. அசல் கணக்குதாரர் அல்லது கணக்குதாரர் உயிரிழந்திருந்தால் தகுதியுள்ள சட்டபூர்வ வாரிசு, சம்பந்தப்பட்ட வங்கியை அணுகி தேவையான ஆவணங்களுடன் பணத்தைக் கோரலாம். வங்கி ஆவணங்களைச் சரிபார்த்து உரிமையை உறுதிப்படுத்திய பிறகு, விதிகளுக்கு ஏற்ப தொகையை வழங்கும். வட்டியைப் பெறத் தகுதியுள்ள வைப்புத்தொகைகளுக்கு, பொருந்தக்கூடிய விதிகளின்படி வட்டியும் வழங்கப்படலாம். அத்தகைய தொகையைத் திரும்பப் பெறுவதற்காக நேரடியாக ஆர்பிஐ அலுவலகத்துக்குச் செல்வதற்குப் பதிலாக, பணம் இருந்த வங்கியையே அணுக வேண்டும்.

பழைய வங்கிக் கணக்கில் பணம் இருக்கிறதா என்பதை எப்படிக் கண்டுபிடிப்பது?

பழைய வங்கிக் கணக்கு விவரங்கள் நினைவில் இல்லை என்றாலும், இந்திய ரிசர்வ் வங்கியின் UDGAM இணையதளம் உதவியாக இருக்கும். UDGAM இணையதளத்தை இங்கே திறக்கலாம். இந்தத் தளத்தில் பதிவு செய்த பிறகு, கணக்குதாரரின் பெயர், வங்கியின் பெயர், பிறந்த தேதி அல்லது கிடைக்கக்கூடிய அடையாள விவரங்களைப் பயன்படுத்தி கோரப்படாத வைப்புத்தொகைகள் தொடர்பான தகவல்களைத் தேடலாம். ஆனால், இந்த இணையதளம் பணத்தை நேரடியாக வழங்காது. கோரப்படாத தொகை தொடர்பான விவரங்களைக் கண்டறிந்து, அடுத்து எந்த வங்கியை அணுக வேண்டும் என்பதைக் கண்டுபிடிக்க மட்டுமே உதவும். தற்போது இந்த வசதி பங்கேற்கும் வங்கிகளுக்கான தகவல்களை வழங்குவதால், தேடும் வங்கி அந்தத் தளத்தில் இடம்பெற்றுள்ளதா என்பதை சரிபார்க்க வேண்டும். தகவல் கிடைத்தவுடன் சம்பந்தப்பட்ட வங்கியைத் தொடர்புகொண்டு அந்தக் கோரிக்கை நடைமுறையைப் பின்பற்ற வேண்டும். வங்கியின் அதிகாரப்பூர்வ இணையதளத்திலும் கோரப்படாத வைப்புத்தொகைகளைத் தேடுவதற்கான வசதி இருக்கலாம்.

வங்கிக் கணக்கைத் தொடர்ந்து கவனிப்பது ஏன் முக்கியம்?

பழைய வங்கிக் கணக்கில் பணம் வைத்திருப்பவர்கள், அந்த நிலையை எப்போதாவது சரிபார்ப்பது நல்லது. கணக்கைப் பயன்படுத்த வேண்டிய அவசியம் இருந்தால், கேஒய்சி விவரங்களைப் புதுப்பித்து மீண்டும் செயல்படுத்தலாம். முதலில் வங்கியைத் தொடர்புகொள்ளலாம். விவரங்கள் கிடைக்கவில்லை என்றால் UDGAM இணையதளத்திலும் தேடலாம். கணக்குதாரர் உயிரிழந்திருந்தால், உரிய ஆவணங்களுடன் சட்டபூர்வ வாரிசுகள் கோரிக்கை அளிக்கலாம். முக்கியமாக, செயலற்ற கணக்கு, கோரப்படாத வைப்புத்தொகை ஆகியவை பல்வேறு நிலைகளைக் குறிக்கின்றன. இரண்டு ஆண்டுகளாக வாடிக்கையாளர் பரிவர்த்தனை செய்யாததால் கணக்கு செயலற்றதாக மாறலாம். பத்து ஆண்டுகளாகத் தொடர்ந்து கோரப்படாத தொகை ஆர்பிஐ நிர்வகிக்கும் நிதிக்கு மாற்றப்படலாம். இந்த இரு நிலைகளிலும் பணத்தைத் திரும்பப் பெறுவதற்கான நடைமுறைகள் உள்ளன. எனவே, பழைய கணக்கை மறந்துவிட்டால் பணம் கிடைக்காது என்று நினைக்க வேண்டாம். சரியான வங்கியை அணுகி, தேவையான ஆவணங்களைச் சமர்ப்பித்து, அதிகாரப்பூர்வ நடைமுறையைப் பின்பற்றுவது முக்கியம்.