Detergent Price Hike: சாமானிய மக்களுக்கு அடுத்த அதிர்ச்சி..சோப்பு, சலவைத் தூள் விலை உயர்வு! புதிய விலைகள் இதோ

Detergent Price Hike: மளிகைப் பொருட்கள் வாங்குவதற்கான செலவு அதிகரித்து வரும் நிலையில், துணி துவைக்கப் பயன்படுத்தும் பொருட்களின் விலையும் உயர்ந்துள்ளது. சர்ஃப் எக்செல் முதல் ரின், வீல் வரை பல பொருட்களின் புதிய விலைகளை காணலாம்.

சலவைப் பொருட்களின் விலை உயர்வு

இந்தியாவில் வீடுகளில் அன்றாடம் பயன்படுத்தப்படும் சலவைத் தூள் மற்றும் சோப்புகளின் விலையை இந்துஸ்தான் யூனிலீவர் நிறுவனம் உயர்த்தியுள்ளது. சர்ஃப் எக்செல், ரின், வீல் உள்ளிட்ட தனது வீட்டு உபயோகப் பொருட்களின் அதிகபட்ச சில்லறை விலையை 11 சதவீதம் வரை மாற்றியமைத்துள்ளது. பொருளின் அளவைப் பொறுத்து ரூ.1 முதல் ரூ.10 வரை விலை உயர்ந்துள்ளது. இதனால் மாதந்தோறும் வீட்டு உபயோகப் பொருட்களை வாங்கும் குடும்பங்களின் செலவில் கூடுதல் சுமை ஏற்படலாம். இந்த விலை மாற்றங்கள் நவம்பர் 2026ல் வெளியாகியுள்ளன.

சர்ஃப் எக்செல் புதிய விலைகள்

சர்ஃப் எக்செல் க்விக் வாஷ் ஒரு கிலோ பாக்கெட்டின் விலை ரூ.235ல் இருந்து ரூ.245 ஆக உயர்ந்துள்ளது. 500 கிராம் பாக்கெட் ரூ.123ல் இருந்து ரூ.128 ஆக மாறியுள்ளது. சர்ஃப் எக்செல் ஈஸி வாஷ் ஒரு கிலோ பாக்கெட் ரூ.167ல் இருந்து ரூ.172 ஆகவும், 500 கிராம் பாக்கெட் ரூ.85ல் இருந்து ரூ.87 ஆகவும் உயர்ந்துள்ளது. 250 கிராம் சோப்புக் கட்டியின் விலை ரூ.42ல் இருந்து ரூ.45 ஆக அதிகரித்துள்ளது. தலா 200 கிராம் கொண்ட நான்கு சோப்புக் கட்டிகள் அடங்கிய தொகுப்பின் விலை ரூ.145ல் இருந்து ரூ.155 ஆக உயர்ந்துள்ளது.

ரின், வீல் பொருட்களின் விலை என்ன?

ரின் ஆலா 500 மில்லி பாட்டிலின் விலை ரூ.90ல் இருந்து ரூ.95 ஆக உயர்த்தப்பட்டுள்ளது. ரின் சலவைத் தூள் ஒரு கிலோ பாக்கெட் ரூ.120ல் இருந்து ரூ.123 ஆகவும், 500 கிராம் பாக்கெட் ரூ.61ல் இருந்து ரூ.63 ஆகவும் மாறியுள்ளது. வீல் சலவைத் தூள் ஒரு கிலோ பாக்கெட்டின் விலை ரூ.90ல் இருந்து ரூ.93 ஆக உயர்ந்துள்ளது. இதன் 500 கிராம் பாக்கெட் ரூ.46ல் இருந்து ரூ.47 ஆக அதிகரித்துள்ளது. இதனால் ரின் மற்றும் வீல் பொருட்களைத் தொடர்ந்து வாங்கும் வாடிக்கையாளர்களும் புதிய விலையை கவனிக்க வேண்டியுள்ளது.

விலை உயர்வுக்கு என்ன காரணம்?

மூலப்பொருட்களின் விலை உயர்வு மற்றும் உற்பத்திச் செலவு அதிகரிப்பு காரணமாகப் பொருட்களின் விலையை மாற்றியமைப்பதாக நிறுவனம் தெரிவித்துள்ளது. இந்துஸ்தான் யூனிலீவர் நிறுவனத்தின் நிர்வாக இயக்குநர் மற்றும் தலைமைச் செயல் அதிகாரி பிரியா நாயர், மூலப்பொருட்களின் விலை நிலவரத்திற்கு ஏற்ப படிப்படியாக விலை மாற்றங்கள் மேற்கொள்ளப்படும் என்று ஏற்கெனவே கூறியிருந்தார். அதிகரிக்கும் செலவுகளுக்கு ஏற்ப நிறுவனத்தின் லாப விகிதத்தைப் பாதுகாப்பதும் இந்த முடிவின் நோக்கங்களில் ஒன்றாகும். இதனால் மற்ற நுகர்வோர் பொருள் தயாரிப்பு நிறுவனங்களும் விலைகளை மாற்றுமா என்ற எதிர்பார்ப்பு எழுந்துள்ளது. இருப்பினும், மற்ற நிறுவனங்களின் விலை உயர்வு குறித்து இதுவரை உறுதியான அறிவிப்பு இல்லை.