மினிமம் பேலன்ஸ் இனி தேவையே இல்ல: ப்ரீ ஏ.டி.எம் கார்டுடன் ரிசர்வ் வங்கியின் BSBD அக்கவுண்ட் பற்றி தெரியுமா?

மினிமம் பேலன்ஸ் அவசியமில்லை, இலவச ஏடிஎம் கார்டுடன் ஜீரோ பேலன்ஸ் BSBD கணக்கு தொடங்குவது எப்படி? ரிசர்வ் வங்கியின் புதிய விதிகள் மற்றும் பலன்கள் பற்றி பார்ப்போம். ஏற்கனவே உள்ள வழக்கமான சேமிப்புக் கணக்கையும் எளிதாக BSBD கணக்காக மாற்றிக்கொள்ள முடியும்.

இலவச ஏ.டி.எம் கார்டுடன் ரிசர்வ் வங்கியின் BSBD அக்கவுண்ட்!

வங்கிச் சேமிப்புக் கணக்குகளில் குறைந்தபட்ச இருப்புத் தொகை (Minimum Balance) பராமரிக்காததற்காக அபராதக் கட்டணம் வசூலிக்கப்படுவதும், புதிய கணக்கு தொடங்குவதற்கு ஆரம்ப வைப்புத் தொகையாக (Initial Deposit) ரூ.1,000 முதல் ரூ.2,000 வரை தேவைப்படுவதும் வாடிக்கையாளர்கள் மத்தியில் பெரும் சுமையாக உள்ளது. குறிப்பாக, தனியார் வங்கிகளில் ரூ.2,500 முதல் ரூ.5,000 வரை மினிமம் பேலன்ஸ் பராமரிக்க வேண்டும் என்ற நிபந்தனைகள் விதிக்கப்படுகின்றன.

இத்தகைய சுமையைத் தவிர்க்கும் வகையில், 'பேசிக் சேவிங்க்ஸ் பேங்க் டெபாசிட்' (Basic Savings Bank Deposit - BSBD) எனப்படும் அடிப்படைக் கணக்குகள் குறித்த முக்கிய வழிகாட்டுதல்களை இந்திய ரிசர்வ் வங்கி (RBI) வெளியிட்டுள்ளது.

BSBD அக்கவுண்ட்-ன் முக்கியச் சிறப்பம்சங்கள் என்ன?

இக்கணக்கில் மினிமம் பேலன்ஸ் பராமரிக்க வேண்டிய கட்டாயம் இல்லை. எனவே, இருப்புத் தொகை இல்லாத காரணத்திற்காக வங்கிகள் அபராதம் விதிக்க முடியாது. புதிய BSBD கணக்கைத் தொடங்குவதற்கு எந்தவொரு ஆரம்ப டெபாசிட் தொகையையும் செலுத்த வேண்டியதில்லை.

ஏடிஎம்-கம்-டெபிட் கார்டு, பாஸ்புக், காசோலைப் புத்தகம், இணைய வழி (Internet Banking) மற்றும் கைபேசி வங்கி (Mobile Banking) போன்ற வசதிகள் வாடிக்கையாளர்களுக்கு முற்றிலும் இலவசமாக வழங்கப்படுகின்றன. வாடிக்கையாளரின் கோரிக்கையின் பேரில், ஏற்கனவே பயன்பாட்டில் உள்ள வழக்கமான சேமிப்புக் கணக்கை எளிதாக BSBD கணக்காக மாற்றிக்கொள்ள முடியும்.

அக்கவுண்ட் தொடங்குவதற்கான தகுதிகள் & விதிமுறைகள் என்ன?

ரிசர்வ் வங்கியின் அறிவிப்பின்படி, இந்த BSBD கணக்கை எந்தவொரு தனிநபரும் சுலபமாகத் தொடங்கலாம். குறிப்பிட்ட வயது வரம்போ அல்லது வருமான வரம்போ இதற்கு நிர்ணயிக்கப்படவில்லை. அடையாளச் சான்றாக ஆதார் அட்டை மற்றும் பான் கார்டு (PAN Card) அல்லது படிவம் எண் 60 (Form 60) சமர்ப்பித்து இக்கணக்கை எளிதில் தொடங்கிவிடலாம்.

BSBD அக்கவுண்ட்-ல் வரம்பின்றி எத்தனை முறை வேண்டுமானாலும் வாடிக்கையாளர்கள் பணத்தைச் செலுத்தலாம். ஒரு மாதத்தில் அதிகபட்சமாக 4 முறை கட்டணமின்றி பணம் எடுக்க அனுமதிக்கப்படுகிறது. ஏடிஎம் வழியே பணம் எடுப்பது, RTGS, NEFT, கிளியரிங், இன்டர்நெட் டெபிட், நிலையான ஆணை (Standing Order) மற்றும் இஎம்ஐ (EMI) பிடித்தங்கள் ஆகிய அனைத்தும் இந்த 4 பரிவர்த்தனைகளுக்குள் அடங்கும். ஒரு வாடிக்கையாளர் எந்த வங்கியில் BSBD கணக்கு வைத்திருக்கிறாரோ, அதே வங்கியில் வழக்கமான மற்றொரு சேமிப்புக் கணக்கை வைத்திருக்க முடியாது.