இந்தியாவில் சுமார் 62 லட்சம் எல்பிஜி (LPG) இணைப்புகள் அதிரடியாக ரத்து செய்யப்பட்டுள்ளன. இதனால் பலருக்கு சமையல் எரிவாயு மானியம் நிறுத்தப்பட்டுள்ளது. வாடிக்கையாளர்கள் உடனடியாக ஆதார் e-KYC செய்து தங்கள் இணைப்பை மீண்டும் பெறலாம்.
இந்தியாவில் சமையல் எரிவாயு பயன்படுத்தும் நுகர்வோருக்கு அதிர்ச்சியளிக்கும் விதமாக, நாடு முழுவதும் லட்சக்கணக்கான எல்பிஜி (LPG) இணைப்புகள் அதிரடியாகத் துண்டிக்கப்பட்டு வருகின்றன. மத்திய எண்ணெய் அமைச்சகத்தின் அதிகாரப்பூர்வத் தரவுகளின்படி, கடந்த ஏப்ரல் மாத தொடக்கத்தில் 33.39 கோடியாக இருந்த செயலில் உள்ள எல்பிஜி இணைப்புகளின் எண்ணிக்கை, செப்டம்பர் மாத தொடக்கத்தில் 32.77 கோடியாகக் குறைந்துள்ளது. அதாவது, குறுகிய இடைவெளியில் சுமார் 62 லட்சம் இணைப்புகள் பயன்பாட்டில் இருந்து நீக்கப்பட்டுள்ளன. இதனால் சம்பந்தப்பட்ட வாடிக்கையாளர்களுக்கு வழங்கப்பட்டு வந்த சமையல் எரிவாயு மானியமும் உடனடியாக நிறுத்தப்பட்டுள்ளது.
நீண்ட காலத்திற்குப் பிறகு இந்தியாவில் எல்பிஜி சந்தாதாரர்களின் எண்ணிக்கையில் இத்தகைய பிரம்மாண்ட சரிவு பதிவாகியுள்ளது பொதுமக்களிடையே பெரும் பரபரப்பை ஏற்படுத்தியுள்ளது. அரசாங்கத்தின் இந்த திடீர் அதிரடி நடவடிக்கை மற்றும் இணைப்புகள் ரத்து செய்யப்படுவதற்கான முதன்மை காரணங்களை இங்கே விரிவாகப் பார்ப்போம்.
25
இனி உண்மையான, தேவையானவர்களுக்கு மட்டுமே கேஸ்.!
எல்பிஜி இணைப்புகள் ரத்து செய்யப்படுவதற்கும் மானியம் நிறுத்தப்படுவதற்கும் மிக முக்கியமான காரணம், மத்திய அரசு கட்டாயமாக்கியுள்ள ஆதார் அடிப்படையிலான பயோமெட்ரிக் சரிபார்ப்பு (e-KYC) நடைமுறையாகும். போலி இணைப்புகளை ஒழிப்பது, ஒரே முகவரியில் விதிகளுக்குப் புறம்பாக உள்ள பல இணைப்புகளைக் கண்டறிவது மற்றும் தகுதியான பயனாளிகளுக்கு மட்டுமே அரசு மானியம் சென்றடைவதை உறுதி செய்வது ஆகியவையே இதன் முதன்மை நோக்கமாகும்.
செப்டம்பர் 19 நிலவரப்படி, நாட்டில் உள்ள 27.43 கோடி செயலில் உள்ள வாடிக்கையாளர்கள் தங்களது e-KYC சரிபார்ப்பை வெற்றிகரமாக முடித்துள்ளனர். ஆனால், செப்டம்பர் 30-ஆம் தேதிக்குள் இந்த பயோமெட்ரிக் சரிபார்ப்பை பூர்த்தி செய்யாத நுகர்வோரின் இணைப்புகள் தற்காலிகமாக முடக்கப்பட்டு, அக்டோபர் 1 முதல் அவர்களுக்கான கேஸ் மானியம் முற்றிலும் நிறுத்தப்பட்டு வருகிறது.
35
ரத்து செய்யப்பட்டோர் மற்றும் பாதிப்பு பட்டியலில் உள்ளவர்கள் யார்?
அரசாங்கம் மற்றும் பொதுத்துறை எண்ணெய் சந்தைப்படுத்துதல் நிறுவனங்கள் (OMCs) வெளியிட்டுள்ள தகவலின்படி, தற்போதைய ரத்து நடவடிக்கையில் முதன்மையாக மூன்று பிரிவினர் பாதிக்கப்பட்டுள்ளனர்:
e-KYC செய்யாத நுகர்வோர்கள்: குறித்த காலக்கெடுவுக்குள் தங்களது ஆதார் பயோமெட்ரிக் சரிபார்ப்பை கேஸ் ஏஜென்சியில் பதிவு செய்யாதவர்கள்.
போலி மற்றும் இரட்டை இணைப்பாளர்கள்: ஒரே நபர் அல்லது ஒரே குடும்ப உறுப்பினர்களின் பெயரில் விதிகளுக்கு மாறாகப் பெறப்பட்ட கூடுதல் எல்பிஜி இணைப்புகள்.
நீண்ட நாட்களாகப் பயன்படுத்தாத கணக்குகள்: தொடர்ந்து பல மாதங்களாக சமையல் எரிவாயு உருளைகளை (Refill) முன்பதிவு செய்யாமல், செயலற்ற நிலையில் உள்ள இணைப்புகள்.
மத்திய கிழக்கு போரும் பிஎன்ஜி (PNG) பயன்பாட்டு மாற்றமும்
இணைப்புகள் குறைக்கப்படுவதற்கு நிர்வாக ரீதியான காரணங்கள் மட்டுமின்றி, சர்வதேச சூழ்நிலைகளும் ஒரு முக்கியக் காரணமாகும். மத்திய கிழக்கு பகுதியில் நடைபெற்று வரும் போர் காரணமாக, வளைகுடா நாடுகளில் இருந்தான எல்பிஜி இறக்குமதி பாதிக்கப்பட்டுள்ளது. இதனால் புதிய எல்பிஜி இணைப்புகள் வழங்குவதை எண்ணெய் நிறுவனங்கள் கணிசமாகக் குறைத்துள்ளன.
அதேவேளையில், நகர்ப்புறங்களில் குழாய் மூலம் வீடுகளுக்கே நேரடியாக விநியோகிக்கப்படும் இயற்கை எரிவாயு (PNG - Piped Natural Gas) பயன்பாடு வேகமெடுத்துள்ளது. இதுவரை சுமார் 6 லட்சத்திற்கும் மேற்பட்ட வாடிக்கையாளர்கள் பிஎன்ஜி இணைப்புக்கு மாறியுள்ளனர். இவர்கள் தங்களது பழைய எல்பிஜி இணைப்புகளை ஒப்படைத்து வருவதாலும் எல்பிஜி சந்தாதாரர் பட்டியலில் சரிவு ஏற்பட்டுள்ளது.
55
மானியத்தை மீட்க நுகர்வோர்கள் செய்ய வேண்டியது என்ன?
உங்கள் எல்பிஜி இணைப்பு துண்டிக்கப்படுவதைத் தவிர்க்கவும், நிறுத்தப்பட்ட மானியத்தை மீண்டும் பெறவும் உடனடியாகச் சில நடவடிக்கைகளை மேற்கொள்ள வேண்டும். நுகர்வோர்கள் தங்களது சமையல் எரிவாயு விநியோகஸ்தரை (Gas Agency) நேரில் அணுகி, விரல்ரேகை அல்லது விழித்திரை (Iris) மூலம் ஆதார் e-KYC சரிபார்ப்பை உடனடியாக முடிக்க வேண்டும்.
மேலும், எரிவாயு நிறுவனங்களின் அதிகாரப்பூர்வ செயலிகள் (Apps) அல்லது இணையதளங்கள் வாயிலாகவும் இந்த சரிபார்ப்பை நிலுவையின்றி முடிப்பதன் மூலம், உங்கள் இணைப்பை மீண்டும் செயலுக்குக் கொண்டுவந்து மானியத் தொகையைத் தொடர்ச்சியாகப் பெற முடியும்.
வணிகம் (Business Ideas in Tamil), வங்கிகள் (Banking News), நிதி, இந்திய பொருளாதாரம் , உலக சந்தை, பங்கு சந்தை, முதலீடு உள்ளிட்ட பல்வேறு தகவல்கள் மற்றும் சமீபத்திய நிதி செய்திகள் அனைத்தையும் ஏஷ்யாநெட் தமிழ் நியூஸில் படிக்கலாம்.
