வங்கியில் கிரெடிட் ஸ்கோர் சராசரியாக எவ்வளவு இருக்க வேண்டும்? குறைவாக இருக்கும் கிரெடிட் ஸ்கோரை எவ்வாறு மேம்படுத்துவது? சிறப்பான கிரெடிட் ஸ்கோர் இருந்தால் கிடைக்கும்நன்மைகள் என்னென்ன? இந்தக் கேள்விகளுக்கான பதிலை இத்தொகுப்பில் தெரிந்துகொள்ளலாம்.
கிரெடிட் ஸ்கோர் என்பது இந்தியாவின் நிதித் துறையில், பல்வேறு வகைகளில் கடன் வழங்கும்போது கவனிக்கப்படும் குறிப்பிடத்தக்க அம்சம் ஆகும். கடன் வாங்க விரும்பினாலும் கிரெடிட் கார்டுக்கு விண்ணப்பிக்க விரும்பினாலும், உங்கள் கிரெடிட் ஸ்கோர் சிறப்பாக இருப்பது அவசியம். இந்த க்ரெடிட் ஸ்கோர் பொதுவாக 300 முதல் 900 வரை இருக்கும்.
கிரெடிட் ஸ்கோர் என்பது உங்கள் கடன் வரலாற்றின் அடிப்படையில் உங்களுக்கான கடன் தகுதியைப் பிரதிபலிக்கும் மூன்று இலக்க எண்ணாகும். இந்த ஸ்கோர் அதிகமாக இருந்தால் நல்லது. கடன் வாங்கியதைத் திருப்பிச் செலுத்திய வரலாறு, கடன் பயன்பாடு, கடன் வரலாற்றின் காலம் , கடன் வகைகள் மற்றும் சமீபத்திய கடன் கோரிக்கைகள் போன்ற காரணிகளால் கிரெடிட் ஸ்கோர் தீர்மானிக்கப்படும்.
கிரெடிட் ஸ்கோரை பாதிக்கக்கூடிய காரணிகளைப் புரிந்துகொள்வது, கடன் மற்றும் கிரெடிட் கார்டு பெறுவதற்கான வாய்ப்புகளை மேம்படுத்தவும் உதவும். பொதுவாக கிரெடிட் ஸ்கோர்களை பல வரம்புகளாக வகைப்படுத்தலாம்.
750 முதல் 900 வரை: கிரெடிட் ஸ்கோர் இந்த வரம்பிற்குள் இருப்பது மிகவும் சிறப்பானது. இந்த ஸ்கோர் உள்ளவர்கள் குறைந்த வட்டி விகிதத்தில் கடன் பெறலாம். கடன் விரைவாகக் கிடைக்கவும் அதிக வாய்ப்பு உள்ளது.
700 முதல் 749 வரை: இதுவும் நல்ல கிரெடிட் ஸ்கோர்தான். நம்பகமான கடன் வரலாற்றைப் பிரதிபலிக்கும் அதே வேளையில், கடன் கிடைப்பதற்கான வாய்ப்பும் அதிகம்.
650 முதல் 699 வரை: இந்த வரம்புக்குள் உள்ள கிரெடிட் ஸ்கோர் சுமாரானதாக இருந்தாலும் கடன் கிடைக்கும். ஆனால், கடன் மீதான வட்டி பெரும்பாலும் அதிகமாக இருக்கும்.
600 முதல் 649: இந்த அளவிற்குக் குறைவான கிரெடிட் ஸ்கோர் இருப்பது மோசமானதாகக் கருதப்படுகிறது. இந்த ஸ்கோரை வைத்து பெர்சனல் லோன் எடுப்பது சிரமம். ஒரு வேளை கடன் அல்லது கிரெடிட் கார்டு பெற்றாலும் அதிக வட்டி விகிதங்கள் விதிக்கப்படும்.
600க்குக் கீழ்: இவ்வளவு கம்மியான கிரெடிட் ஸ்கோர் இருக்கும் கணக்கை வங்கி அபாயகரமானதாகக் கருதும். எனவே உடனடி நடவடிக்கை எடுத்து ஸ்கோரை உயர்த்த வேண்டும்.
டிரான்ஸ் யூனியன் (TransUnion) வெளியிட்டுள்ள சிபில் (CIBIL) அறிக்கையின்படி, தங்கள் கிரெடிட்டைத் தீவிரமாகக் கண்காணிக்கும் நுகர்வோர் சராசரியாக 729 கிரெடிட் ஸ்கோரைக் கொண்டுள்ளனர். அதே சமயம் கிரெடிட்டைக் கண்காணிக்காதவர்களின் சராசரி ஸ்கோர் 712 ஆக உள்ளது.
கிரெடிட் நிலவரத்தைக் கண்காணிப்பதில் கவனம் செலுத்தாமல் இருக்கும் 41% பேருடன் ஒப்பிடும்போது, தொடர்ந்து கண்காணிக்கும் 46% பேர் விரைவாக கிரெடிட் ஸ்கோரை உயர்த்தியுள்ளனர் என்றும் இந்த அறிக்கை கூறுகிறது.
கிரெடிட் ஸ்கோரை மேம்படுத்துவதற்கு, அதை பாதிக்கும் காரணிகள் பற்றிய கவனமாக கவனம் தேவை. கிரெடிட் கார்டு பில்கள் மற்றும் கடன் EMIகளை சரியான நேரத்தில் திருப்பிச் செலுத்துவதை உறுதி செய்துகொள்ளுங்கள். தாமதமாக EMI செலுத்துவது அல்லது செலுத்தாமலே இருப்பது கிரெடிட் ஸ்கோரைப் பாதிக்கும்.
ஒரே நேரத்தில் பல கடன் விண்ணப்பங்களைச் சமர்ப்பிப்பதைத் தவிர்க்கவும். இது நீங்கள் கடன் பெற அதிக ஆர்வமாக இருக்கிறீர்கள் என்ற எண்ணத்தை ஏற்படுத்தும். உங்கள் கடன் அறிக்கையை தவறாமல் மதிப்பாய்வு செய்து, ஏதேனும் பிழைகள் இருந்தால் உடனடியாக சரிசெய்யுங்கள்.
கிரெடிட் ஸ்கோரைக் கண்காணிக்க பல்வேறு மொபைல் செயலிகள் உள்ளன. அவற்றில் விரிவான கடன் அறிக்கையையும் இலவசமாகப் டவுன்லோட் செய்யலாம். உங்கள் கடன் பயன்பாட்டு விகிதத்தை உங்கள் மொத்த கடன் வரம்பில் 30% க்கும் குறைவாக வைத்திருப்பது ஆரோக்கியமானது என்று வல்லுநர்கள் பரிந்துரைக்கின்றனர்.
சிறந்த கடன் சலுகைகள் மற்றும் கிரெடிட் கார்டுகளைப் பெற வலுவான கிரெடிட் ஸ்கோர் முக்கியமானது. மேலும் வலுவான கிரெடிட் ஸ்கோர் சிறந்த நிதி வாய்ப்புகளுக்கான கதவுகளைத் திறக்கும்.
சேனலை கிளிக் செய்து பின்தொடரவும்