வியட்நாமைச் சேர்ந்த பிரபல வாகன உற்பத்தி நிறுவனமான வின்ஃபாஸ்ட் (VinFast), இந்தியாவில் ஓலா மற்றும் ஏத்தர் நிறுவனங்களுக்குச் சவாலாகத் தனது புதிய எலெக்ட்ரிக் ஸ்கூட்டரின் டிசைனைப் பேடன்ட் செய்துள்ளது.
வியட்நாமைச் சேர்ந்த வாகன உற்பத்தி நிறுவனமான வின்ஃபாஸ்ட் (VinFast), இந்தியாவில் அடுத்தடுத்து தனது இருசக்கர வாகனங்களின் டிசைன்களை பேடன்ட் செய்து வருகிறது. ஏற்கனவே இந்நிறுவனம் பதிவு செய்த 'ரசாத்' (Razzat) மற்றும் 'சுலாத்' (Sulat) கான்செப்ட் எலெக்ட்ரிக் மோட்டார்சைக்கிள் வரிசையில், தற்போது புதிய ஸ்கூட்டர் ஒன்றின் டிசைன் பேடன்ட்டும் இணைந்துள்ளது.
சர்வதேச சந்தைகளில் விற்பனையாகும் எந்தவொரு வின்ஃபாஸ்ட் மாடலுடனும் இது ஒத்துப்போகவில்லை என்பதால், இது இந்திய சந்தைக்காகவே பிரத்யேகமாக உருவாக்கப்படும் ஸ்கூட்டராக இருக்கலாம் என்று எதிர்பார்க்கப்படுகிறது.
24
மாடர்ன் டிசைன் & தோற்றம்
பேடன்ட் டிசைனை வைத்துப் பார்க்கும்போது இந்த எலெக்ட்ரிக் ஸ்கூட்டர் மிகவும் நேர்த்தியான வளைவுகளுடன் கூடிய மாடர்ன் தோற்றத்தைப் பெற்றுள்ளது: இருக்கை மற்றும் ரைடிங் பொசிஷன்: ரைடருக்கு தட்டையான இருக்கையும், பின்னால் அமர்பவருக்கு சற்று உயரமான பில்லியன் சீட்டும் வழங்கப்பட்டுள்ளன. உயரமான ஹேண்டில்பார் கொடுக்கப்பட்டுள்ளதால், ரைடர்கள் நிமிர்ந்து அமர்ந்து சௌகரியமாக ஓட்டுவதற்கு ஏதுவான ரைடிங் பொசிஷன் இதில் கிடைக்கும்.
முன்பக்க வடிவமைப்பு: முன்பக்க ஏப்ரானில் நிறுவனத்தின் லோகோ இடம்பெற்றுள்ளதுடன் அதன் முன்பகுதி எந்தவித ஆர்ப்பாட்டமும் இல்லாமல் மினிமலிஸ்டிக் லுக்கில் காட்சியளிக்கிறது. மேலும் ஏப்ரானிலேயே ஹெட்லேம்ப் பொருத்தப்பட்டிருக்கும் விதம் தனித்துவமாக இருப்பதுடன், இண்டிகேட்டர்களும் இதிலேயே ஒருங்கிணைக்கப்பட்டு மிக நேர்த்தியாக வடிவமைக்கப்பட்டுள்ளன.
பக்கவாட்டுத் தோற்றம்: சைடு ஸ்கர்ட்டுகளுடன் கச்சிதமாகப் பொருந்தும் வகையில் பில்லியன் ஃபுட்ரெஸ்ட் அமைக்கப்பட்டுள்ளதால் இந்த இ-ஸ்கூட்டரின் பக்கவாட்டுத் தோற்றம் மிகவும் ஷார்ப்பாக இருக்கிறது.
34
செயல்திறன் & பேட்டரி
இந்த ஸ்கூட்டரின் செயல்திறன் மற்றும் பேட்டரி விவரங்களை நிறுவனம் இன்னும் அதிகாரப்பூர்வமாக வெளியிடவில்லை. இருப்பினும், நகரப் போக்குவரத்திற்கு தாராளமாகப் பயன்படும் வகையிலான போதுமான ரேஞ்சை இது வழங்கும் என நம்பலாம்.
இந்த எலெக்ட்ரிக் ஸ்கூட்டரின் வெளியீடு குறித்து வின்ஃபாஸ்ட் தரப்பில் இதுவரை எந்தவித அதிகாரப்பூர்வ அறிவிப்பும் வெளியாகவில்லை. சர்வதேச அளவில் விற்பனையாகும் மாடல்களில் இருந்து இது முற்றிலும் மாறுபட்டிருப்பதால், இது வரவிருக்கும் புதிய மாடலாக இருக்கலாம். அதே நேரத்தில், பேடன்ட் பதிவு செய்துவிட்டாலே ஒரு வாகனம் நிச்சயம் சந்தைக்கு வந்துவிடும் என்று சொல்லிவிட முடியாது; டிசைன் திருடப்படாமல் இருப்பதற்கான பதிப்புரிமைப் பாதுகாப்பிற்காகவும் வின்ஃபாஸ்ட் இதைச் செய்திருக்கலாம்.
சமீபத்தில் 50-க்கும் மேற்பட்ட டீலர் பார்ட்னர்களுடன் புரிந்துணர்வு ஒப்பந்தத்தில் கையெழுத்திட்டுள்ள இந்த நிறுவனம் இந்திய EV சந்தையில் மிக பிரம்மாண்டமாக களமிறங்கத் தயாராகி வருகிறது. எனவே இந்தியாவில் தொடக்கத்திலேயே இந்நிறுவனம் எந்தெந்த ஸ்கூட்டர்களை அறிமுகம் செய்யப்போகிறது என்பதைப் பொறுத்திருந்துதான் பார்க்க வேண்டும்.
