Monarc Tracer Electric Cycle: ஒருமுறை முழுமையாக சார்ஜ் செய்தால் 209 கி.மீ வரை பயணிக்க முடியும் எனக் கூறப்படும் புதிய எலக்ட்ரிக் சைக்கிள் கவனம் ஈர்த்துள்ளது. இந்த சைக்கிளின் விலை, சிறப்பம்சங்கள் என்னென்ன? பார்க்கலாம்.
எலக்ட்ரிக் வாகனத் துறையில் புதிய முயற்சிகள் தொடர்ந்து அறிமுகமாகி வருகின்றன. அந்த வரிசையில் அமெரிக்காவைச் சேர்ந்த மோனார்க் நிறுவனம் தனது ட்ரேசர் எலக்ட்ரிக் சைக்கிளை அறிமுகப்படுத்தியுள்ளது. இதன் முக்கிய சிறப்பம்சம் இரண்டு நீக்கக்கூடிய பேட்டரிகள் வழங்கப்படுவதுதான். ஒவ்வொரு பேட்டரியும் 48 வோல்ட், 15.2 ஆம்பியர் மணி திறன் கொண்டது. மொத்தமாக 1,440 வாட் மணி மின்சக்தி கிடைக்கிறது. நிறுவனத்தின் கணக்கீட்டின்படி, ஒரு பேட்டரியில் 104 கி.மீ வரையும், இரண்டு பேட்டரிகளையும் பயன்படுத்தினால் அதிகபட்சம் 209 கி.மீ வரையும் பயணிக்கலாம்.
25
750W மோட்டார், 45 கி.மீ வேகம்
இந்த சைக்கிளில் Bafang நிறுவனத்தின் 750W பின்புற மைய மோட்டார் பொருத்தப்பட்டுள்ளது. இது அதிகபட்சமாக 1,638W திறனையும், 85Nm முறுக்குவிசையையும் வழங்கும் என நிறுவனம் தெரிவிக்கிறது. 30 ஆம்பியர் கட்டுப்பாட்டியுடன் இணைந்து செயல்படும் இந்த மோட்டார், மேடான சாலைகளிலும் பயணிக்க உதவும். மிதியுதவி மற்றும் கைப்பிடி முடுக்கி என இரண்டு வகையான இயக்க வசதிகள் உள்ளன. மிதியுதவி முறையில் அதிகபட்சமாக மணிக்கு 45 கி.மீ வேகத்தை எட்டும் வகையில் வடிவமைக்கப்பட்டுள்ளது. இருப்பினும், சைக்கிள் விற்பனை செய்யப்படும் நாட்டின் வாகன விதிகளுக்கு ஏற்ப வேகக் கட்டுப்பாடுகள் மாறுபடலாம்.
35
வேகமான சார்ஜிங், டச்ஸ்க்ரீன் வசதி
இரண்டு பேட்டரிகளையும் சைக்கிளில் இருந்து தனியாகக் கழற்றி வீட்டிலோ அலுவலகத்திலோ சார்ஜ் செய்யலாம். இதனுடன் 48V, 5A அதிவேக சார்ஜர் வழங்கப்படுகிறது. பேட்டரியின் ஆயுளைப் பாதுகாக்க அதிகபட்ச சார்ஜ் அளவைத் தேர்வு செய்யும் வசதியும் உள்ளது. கைப்பிடியின் மையத்தில் 3.5 அங்குல வண்ணத் டச்ஸ்க்ரீன் கொடுக்கப்பட்டுள்ளது. இதில் வேகம், பேட்டரி அளவு, பயணித்த தூரம் உள்ளிட்ட விவரங்களைப் பார்க்கலாம். கைப்பேசி செயலி இணைப்பு, மென்பொருள் அப்டேட், USB வழியாகக் மொபைலை சார்ஜ் செய்யும் வசதி ஆகியவையும் இடம்பெற்றுள்ளன.
பாதுகாப்புக்காக நான்கு பிஸ்டன் கொண்ட ஹைட்ராலிக் டிஸ்க் பிரேக்குகள் வழங்கப்பட்டுள்ளன. முன்புறத்தில் 80 மி.மீ பயணத் திறன் கொண்ட அதிர்வுகளைத் தாங்கும் அமைப்பும், 27.5 அங்குல அகலமான டயர்களும் உள்ளன. பின்புறத்தில் பொருட்களை வைப்பதற்கான சுமைத் தாங்கியும், இரவு நேரப் பயணத்துக்கான விளக்குகளும் வழங்கப்பட்டுள்ளன. மொத்தம் 190 கிலோ வரை சுமையைத் தாங்கும் திறன் கொண்டது.
55
விலை எவ்வளவு? இந்தியாவில் கிடைக்குமா?
மோனார்க் ட்ரேசர் இரட்டை பேட்டரி மாடலின் வழக்கமான அமெரிக்க விலை 1,899 டாலர்கள். நவம்பர் மாத நிறுவன இணையதள விற்பனைச் சலுகையில் 1,799 டாலராகக் குறிப்பிடப்பட்டுள்ளது. இந்திய மதிப்பில் இது தோராயமாக ரூ.1.6 லட்சம் முதல் ரூ.1.7 லட்சம் வரையிலான தொகையாகும். இறக்குமதி வரி, போக்குவரத்துச் செலவு உள்ளிட்டவை இதில் சேர்க்கப்படவில்லை. இந்த சைக்கிளுக்கு ஐந்து ஆண்டுகள் உத்தரவாதமும் வழங்கப்படுவதாக நிறுவனம் தெரிவிக்கிறது. தற்போது அமெரிக்கச் சந்தையில் விற்பனை செய்யப்படும் இந்த மாடல் இந்தியாவில் அறிமுகமாகும் தேதி அல்லது விலை குறித்து அதிகாரப்பூர்வ அறிவிப்பு இல்லை. மேலும், 209 கி.மீ என்பது நிறுவனத்தின் அதிகபட்ச மதிப்பீடு மட்டுமே; நடைமுறையில் பயணத் தூரம் மாறுபடும்.