Road : சாலைகளில் வெள்ளை, மஞ்சள் நிறங்களில் காணப்படும் கோடுகள், பாதுகாப்பை உறுதிசெய்யும் விதிகள் மற்றும் வழிமுறைகளை நமக்கு உணர்த்துகின்றன. இந்தக் கோடுகளின் உண்மையான அர்த்தத்தைப் புரிந்துகொள்வது பாதுகாப்பான பயணத்திற்கு அத்தியாவசியம்.
நாம் தினமும் சாலையில் செல்லும்போது வெள்ளை கோடு, மஞ்சள் கோடு, உடைந்த கோடு, தொடர்ச்சியான கோடு என பல விதமான சாலைக் குறியீடுகளைப் பார்க்கிறோம். பெரும்பாலும் அவற்றை வெறும் சாலை அலங்காரம் போல கடந்து சென்று விடுகிறோம். ஆனால், இந்த ஒவ்வொரு கோட்டுக்கும் ஒரு குறிப்பிட்ட அர்த்தம் இருக்கிறது. எந்த இடத்தில் பாதை மாற்றலாம், எங்கு ஓவர் டேக்கிங் செய்யக்கூடாது, எங்கு வாகனத்தை நிறுத்த வேண்டும், எங்கு வாகனத்தை நிறுத்தவே கூடாது என்பதை இந்த சாலைக் கோடுகள் நமக்குத் தெரிவிக்கின்றன. இவை சாலைப் பயணிகளை வழிநடத்தும் ஒரு மொழியாகும். அடுத்த முறை சாலையில் செல்லும்போது, இந்தக் கோடுகளை வேறு பார்வையில் பார்ப்பீர்கள்.
இந்திய சாலைகளில் பொதுவாக வெள்ளை நிற குறியீடுகள், சாலையின் பாதைகள் மற்றும் போக்குவரத்து இயக்கத்தை வழிநடத்தப் பயன்படுத்தப்படுகின்றன. அவை பெரும்பாலும் பாதைகளைப் பிரிப்பதற்கோ அல்லது சாலையின் ஓரம் எங்கு முடிகிறது என்பதைக் காட்டவோ பயன்படுகின்றன. மஞ்சள் நிற குறியீடுகள் பொதுவாக சில கட்டுப்பாடுகளைக் குறிக்கப் பயன்படுத்தப்படுகின்றன. உதாரணமாக, சாலையின் ஓரத்தில் ஒரு தொடர்ச்சியான மஞ்சள் கோடு, அதனுடன் 'நோ பார்க்கிங்' குறியீடு இருந்தால், அந்தப் பகுதியில் வாகன நிறுத்தம் தடை செய்யப்பட்டிருப்பதைக் குறிக்கும். அதேபோல், மஞ்சள் கோடுகள் சாலையின் நடுவில் எதிர் திசை டிராபிக்கை பிரிக்கவும் பயன்படுத்தப்படுகின்றன. எனவே, கோட்டின் நிறம் மட்டும் அதன் முழு அர்த்தத்தை தீர்மானிக்காது என்பதை நினைவில் கொள்ள வேண்டும்.
உடைந்த கோடு vs தொடர்ச்சியான கோடு – எப்போது கடக்கலாம்?
சாலையில் ஒருஉடைந்த கோடு இருந்தால், போக்குவரத்து சூழ்நிலை பாதுகாப்பாக இருக்கும் பட்சத்தில் அந்தக் கோட்டை கடந்து செல்லவோ அல்லது பாதை மாற்றுவதோ அனுமதிக்கப்படும். இது வாகன ஓட்டிகளுக்கு குறிப்பிட்ட சமயங்களில் நெகிழ்வுத்தன்மையை அளிக்கிறது. ஆனால் தொடர்ச்சியான கோடு இருந்தால், அதை கடப்பது பொதுவாக அனுமதிக்கப்படாது. அதாவது, உங்கள் பாதையில் இருந்து வெளியேறவோ அல்லது ஓவர்டேக்கிங் செய்யவோ பெரும்பாலும் அனுமதியில்லை. இரண்டு கோடுகளில் ஒன்று தொடர்ச்சியானது, மற்றொன்று உடைந்தது ஆக இருக்கும்போது, உங்கள் பக்கத்தில் இருக்கும் கோடுதான் முக்கியம். உங்கள் பக்கத்தில் உடைந்த கோடு இருந்தால், பாதுகாப்பாக இருக்கும் போது கடக்கலாம்; தொடர்ச்சியான கோடு உங்கள் பக்கத்தில் இருந்தால் கடக்கக் கூடாது. இது ஓர் அத்தியாவசியமான சாலை விதி.
இரட்டை கோடு மற்றும் ஜீப்ரா கிராஸிங் - இவற்றின் அர்த்தம் என்ன?
இரண்டு தொடர்ச்சியான கோடுகள் இருந்தால், பொதுவாக இரு திசைகளிலிருந்தும் அந்தக் கோட்டை கடக்கவோ, ஓவர்டேக்கிங் செய்யவோ கூடாது. இது அதிக ஆபத்து உள்ள இடங்களிலோ அல்லது குறைந்த பார்வைத்திறன் உள்ள பகுதிகளிலோ பயன்படுத்தப்படும் முக்கியமான குறி. டிராபிக் சிக்னல் அல்லது சந்திப்பு அருகே இருக்கும் வெள்ளை தொடர்ச்சியான கோட்டை (நிறுத்தக் கோடு) அனைவரும் அறிவோம். சிக்னல் அல்லது போக்குவரத்து அதிகாரி நிறுத்தச் சொன்னால், இந்தக் கோட்டிற்கு முன்பாகவே வாகனத்தை நிறுத்த வேண்டும். மேலும், ஜீப்ரா கிராஸிங் என்பது பாதசாரிகள் சாலையை கடக்கும் பகுதி. இங்கு பாதசாரிகளுக்கு எப்போதும் வழிவிட வேண்டும். இவை அத்தனையும சாலைப் பாதுகாப்பிற்கு உதவுகின்றன.
சாலையில் இருக்கும் மஞ்சள் பெட்டிக்கு என்ன அர்த்தம்?
சந்திப்புகளில் காணப்படும் மஞ்சள் நிற சதுரப் பெட்டிக்குள் குறுக்காக வரையப்பட்ட கோடுகள் மஞ்சள் பெட்டி சந்திப்பு அல்லது கீப் கிளியர் மார்க்கிங் என அழைக்கப்படுகின்றன. இந்தப் பகுதியில் ஒருபோதும் வாகனத்தை நிறுத்தக் கூடாது. முன்னால் செல்ல போதுமான இடம் இருந்தால் மட்டுமே அந்த மஞ்சள் பெட்டிக்குள் வாகனத்தை எடுத்துச் செல்ல வேண்டும். முன்னால் இடமில்லாத நிலையில் உள்ளே சென்று டிராபிக்கை பிளாக் செய்யக்கூடாது. இது போக்குவரத்து நெரிசலைத் தவிர்க்க உதவும் ஒரு முக்கியமான குறியீடு. எனவே, அடுத்த முறை சாலையில் வெள்ளை, மஞ்சள், உடைந்தது, தொடர்ச்சியானது, இரட்டைக் கோடுகள் அல்லது மஞ்சள் பெட்டி போன்றவற்றை நீங்கள் பார்க்கும்போது, அவை வெறும் கோடுகள் அல்ல என்பதை நினைவில் கொள்ளுங்கள். “சாலையின் இந்தக் கோடுகளைப் புரிந்துகொள்வது, சாலை விதிகளைப் புரிந்துகொள்வதன் ஒரு அத்தியாவசியமான பகுதிதான்.”
