ஹிந்துஸ்தான் பவர் நிறுவனம் மூன்று சக்கர எலெக்ட்ரிக் ஸ்கூட்டரைக் கொண்டுவந்துள்ளது. ஸ்கூட்டர் சுசுகி ஆக்செஸ் 125 போல உள்ள இந்த ஸ்கூட்டரின் முழு விவரத்தையும் தெரிந்துகொள்ளலாம்.
2024ஆம் ஆண்டு மின்சார இரு சக்கர வாகனப் பிரிவுக்கு சிறப்பானதாக அமைந்தது. இந்த பிரிவின் விற்பனை மிகவும் அதிகரித்துள்ளது. அதிகரித்து வரும் போட்டி காரணமாக, பல நிறுவனங்கள் மலிவான மாடல்களையும் அறிமுகப்படுத்தியுள்ளன.
எலெகட்ரிக் ஸ்கூட்டர்கள் சந்தையில் ஓலா எலக்ட்ரிக், டிவிஎஸ் மோட்டார், பஜாஜ் சேடக், ஏதர் எனர்ஜி உள்ளிட்ட பல நிறுவனங்களின் ஆதிக்கம் காணப்படுகிறது. இந்த ஆண்டு, இந்த பட்டியலில் உத்தரபிரதேசத்தின் அலிகாரில் உள்ள ஹிந்துஸ்தான் பவர் பனானா சன்ஸ் நிறுவனம் இணைந்துள்ளது.
ஹிந்துஸ்தான் பவர் நிறுவனம் மூன்று சக்கர எலெக்ட்ரிக் ஸ்கூட்டரைக் கொண்டுவந்துள்ளது. இதன் பின்புறம் இரண்டு சக்கரங்கள் இருப்பதால் அதை பேலன்ஸ் செய்ய வேண்டிய அவசியமில்லை. இந்த மின்சார ஸ்கூட்டர் சமூக வலைதளங்களில் வைரலாக பரவி வருகிறது.
பள்ளி மாணவர்கள் முதல் முதியவர்கள் வரை இதை எளிதாகப் பயன்படுத்தலாம். அதன் இருக்கைகள் மிகவும் வசதியானவை. குறிப்பாக பின் இருக்கையில் சோபா போன்று இருபுறமும் ஆர்ம்ரெஸ்ட்கள் உள்ளன. பார்க்கவும் மிகவும் ஸ்டைலாக உள்ளது. இது அதிக அளவு சரக்குகளை ஏற்றி எடுத்துச் செல்லவும் நிறைய இடத்தைக் கொண்டிருக்கிறது.
இந்த எலக்ட்ரிக் ஸ்கூட்டரின் முன்புறம் எல்இடி ஹெட்லைட் உள்ளது. முற்றிலும் ஃபைபர் பாடி கட்டமைப்பைக் கொண்டுள்ளது. தூரத்தில் இருந்து பார்க்கும் போது, இந்த ஸ்கூட்டர் சுசுகி ஆக்செஸ் 125 போல உள்ளது. இதில் ஆலசன் டர்ன் இண்டிகேட்டர்கள் உள்ளன. இந்த எலக்ட்ரிக் ஸ்கூட்டருக்கு 10 இன்ச் முதல் அலாய் வீல்கள் உள்ளன. 190மிமீ டிஸ்க் பிரேக்கும் இருக்கிறது.
ஸ்கூட்டரின் இருக்கைகள் இரண்டு பிரிவுகளாக உள்ளன. பின் இருக்கை சற்று விசாலமாக உள்ளது. வசதிக்காக அதிக குஷனிங் கொடுக்கப்பட்டுள்ளது. முன் இருக்கையைப் போலவே, அதையும் அமரும் நபருக்கு ஏற்ப சரிசெய்யலாம். முன் மற்றும் பின் இருக்கைகள் இரண்டும் அட்ஜெஸ்ட் செய்யக்கூடிய ஆர்ம்ரெஸ்ட்களைப் பெற்றுள்ளன.
பொருள்களை வைப்பதற்கான ஸ்டோரேஜ் பாக்ஸ் உள்ளது. ஸ்கூட்டரின் சார்ஜிங் போர்ட் பின் இருக்கைக்கு முன்னால் உள்ளது. இந்த மின்சார ஸ்கூட்டரில் 60V 32AH லீட்-ஆசிட் பேட்டரி உள்ளது. விரும்பினால் இதை லித்தியம்-அயன் பேட்டரியாக மாற்றிக்கொள்ளலாம். ஆனால், அதற்கு தனியாகச் செலவிட வேண்டும்.
ஒருமுறை முழுமையாக சார்ஜ் செய்தால் 50 முதல் 60 கிமீ வரை செல்லும். இந்த ஸ்கூட்டர் 4 மணி நேரத்தில் முழுமையாக சார்ஜ் ஆகிவிடும். இதன் விலை ரூ.1.20 லட்சம்.
சேனலை கிளிக் செய்து பின்தொடரவும்