Family Electric Scooter: இந்தியாவில் குடும்ப பயன்பாட்டுக்கான மின்சார ஸ்கூட்டர்களுக்கான போட்டி தொடர்ந்து அதிகரித்து வரும் நிலையில், ஏதர் எனர்ஜி நிறுவனம் கோனார்க் என்ற புதிய எலக்ட்ரிக் ஸ்கூட்டரை அறிமுகம் செய்துள்ளது. இதன் விலை, அம்சங்களை பார்க்கலாம்.
ஏதர் கோனார்க் ஸ்கூட்டரின் வடிவமைப்பு, முந்தைய ஏதர் ஸ்கூட்டர்களிலிருந்து சற்று மாறுபட்டதாக உள்ளது. குடும்ப பயன்பாட்டை கருத்தில் கொண்டு எளிமையான தோற்றத்துடன் இது உள்ளது. பக்கவாட்டு பேனல்களில் உலோகத்தை பயன்படுத்தியிருப்பது முக்கிய அம்சமாகும். முன்புறத்தில் பெரிய எல்இடி முகப்பு விளக்கு, சுற்றிலும் பகல்நேர விளக்குகள் மற்றும் பின்புறத்தில் உடலமைப்புடன் இணைந்த எல்இடி பின்விளக்கு ஆகியவை இடம்பெற்றுள்ளன. 14 அங்குல முன்சக்கரம் மற்றும் 12 அங்குல பின்சக்கரம் கொடுக்கப்பட்டுள்ளது.
24
7 அங்குல திரை மற்றும் ஸ்மார்ட் வசதிகள்
கோனார்க்கில் டீப்வியூ திரை வழங்கப்பட்டுள்ளது. உயர்நிலை வகைகளில் தொடுதிரை மற்றும் கூகுள் மேப்ஸ் அடிப்படையிலான வழிகாட்டி உள்ளிட்ட வசதிகள் கிடைக்கும். புளூடூத் இணைப்பு மூலம் அழைப்புகள், இசை மற்றும் வாட்ஸ்அப் அறிவிப்புகளை திரையில் பார்க்கலாம். ஆட்டோஹோல்ட், பாட்ஹோல் அலர்ட் மற்றும் வாகனம் கீழே விழும்போது மோட்டார் இயக்கத்தை நிறுத்தும் பாதுகாப்பு வசதிகள் உள்ளன. மேலும், ஏதர்ஸ்டாக் புரோ மூலம் வாகனத்தின் நிலை மற்றும் பயன்பாடு தொடர்பான தகவல்களையும் கண்காணிக்க முடியும். குடும்பங்களை மனதில் வைத்து அதிக சேமிப்பு இடமும் கொடுக்கப்பட்டுள்ளது. இருக்கைக்கு அடியில் 31 லிட்டர் கொள்ளளவு கிடைக்கிறது. மேஜிக்கீ வசதி கொண்ட உயர்நிலை வகைகளில் சாவியை பயன்படுத்தாமல் ஸ்கூட்டரை அணுகவும், டிக்கியை திறக்கவும் முடியும். ஆட்டோபாப் வசதி அறிமுகமாகும் இசட்-லைன் மாடலில், கைகள் பொருட்கள் நிறைந்திருக்கும் நேரத்திலும் டிக்கியை எளிதாக திறக்க உதவும். இந்த வசதி குறிப்பாக தினசரி குடும்பப் பயன்பாட்டில் பயனுள்ளதாக இருக்கும்.
34
பேட்டரி, ரேஞ்ச் மற்றும் செயல்திறன்
தற்போது விற்பனையில் உள்ள கோனார்க் எஸ் 2.1 கிலோவாட் ஹவர் மாடல் 100 கி.மீ. ஐடிசி ரேஞ்சையும், 2.7 கிலோவாட் ஹவர் மாடல் 125 கி.மீ. ரேஞ்சையும் வழங்குகிறது. 3.5 கிலோவாட் ஹவர் மாடலின் அதிகாரப்பூர்வ ஐடிசி ரேஞ்ச் 161 கி.மீ. ஆகும். இதன் அதிகபட்ச வேகம் மணிக்கு 70 கி.மீ. ஆகும். 450 வாட் உள்ளமைக்கப்பட்ட சார்ஜர் கொடுக்கப்பட்டுள்ளது. கூடுதல் சார்ஜரை பயன்படுத்தி சார்ஜிங் வேகத்தை அதிகரிக்க முடியும்.
ஏதர் கோனார்க் எஸ் 2.1 கிலோவாட் ஹவர் மாடலின் எக்ஸ்-ஷோரூம் விலை ரூ.99,999 ஆகும். 2.7 கிலோவாட் ஹவர் மாடலின் விலை ரூ.1,21,999 ஆகவும், 3.5 கிலோவாட் ஹவர் மாடலின் விலை ரூ.1,44,999 ஆகவும் உள்ளது. இவை எக்ஸ்-ஷோரூம் விலைகள் நகரம், வரி, காப்பீடு மற்றும் பிற கட்டணங்களைப் பொறுத்து ஆன்-ரோடு விலை மாறுபடும். 200 கி.மீ. ஐடிசி ரேஞ்ச் கொண்ட கோனார்க் மாடல் மற்றும் இசட்-லைன் மாடலுக்கான விலையை ஏதர் இன்னும் அறிவிக்கவில்லை. ஏதர் எனர்ஜியின் புதிய குடும்ப ஸ்கூட்டரான கொனார்க், மாறுபட்ட பேட்டரி பேக்குகள் மற்றும் மாறுபட்ட தேவைகளுடன் வாடிக்கையாளர்களுக்கு ஏற்ற வகையில் துடிப்பான வண்ண விருப்பங்களுடன் நான்கு அற்புதமான வகைகளில் வழங்கப்படுகிறது. ஏதர் கோனார்க் மெஜஸ்டிக் கிரே, குவார்ட்ஸ் ஒயிட், லுமென் காப்பர் மற்றும் செலஸ்டியல் கோல்ட் போன்ற வண்ணங்களில் வழங்கப்படுகிறது.
