புத்தாண்டு ஷாக்! டிரையம்ப் பைக் விலை உயர்வு! பிரீமியம் பைக் ரசிகர்களுக்கு அலர்ட்.!

டிரையம்ப் மோட்டார்சைக்கிள்ஸ், 2026 ஜனவரி 1 முதல் இந்தியாவில் தனது அனைத்து பைக் மாடல்களின் விலையையும் உயர்த்துவதாக அறிவித்துள்ளது. இந்த விலை உயர்வு ஸ்பீட் 400 மற்றும் ஸ்க்ராம்ப்ளர் 400 எக்ஸ் போன்ற பிரபலமான 400சிசி மாடல்களையும் பாதிக்கும்.

இந்திய இருசக்கர வாகன சந்தையில் முக்கிய அறிவிப்பை வெளியிட்டுள்ளது Triumph Motorcycles. 2026 புத்தாண்டு முதல், இந்தியாவில் விற்பனை செய்யப்படும் அனைத்து மாடல்களின் விலையையும் திருத்த உள்ளதாக நிறுவனம் அதிகாரப்பூர்வமாக உறுதி செய்துள்ளது. தற்போது நிலவும் எக்ஸ்-ஷோரூம் விலைகள் டிசம்பர் 31, 2025 வரை மட்டுமே செல்லுபடியாகும் என்றும், ஜனவரி 1, 2026 முதல் புதிய விலைகள் அமலுக்கு வரும் என்றும் டிரையம்ப் தெரிவித்துள்ளது.

இந்த விலை உயர்வு, குறிப்பாக இந்தியாவில் அதிகம் விற்பனையாகும் 400சிசி மாடல்களை நேரடியாகப் பாதிக்கும். ஸ்பீட் 400, டிராக்ஸ்டன் 400, ஸ்க்ராம்ப்ளர் 400 எக்ஸ் மற்றும் ஸ்பீட் T4 ஆகிய மாடல்கள் அனைத்தும் இதில் அடங்கும். இந்த பைக்குகள் அனைத்தும் டிரையம்ப் மற்றும் பஜாஜ் ஆட்டோ இணைந்து இந்தியாவில் தயாரித்து விற்பனை செய்யும் மாடல்களாகும். மாடல் வாரியான விலை உயர்வு விவரங்கள் இன்று வெளியாகாத நிலையில், அனைத்து மாடல்களுக்கும் ஒரே நேரத்தில் விலை மாற்றம் அமல்படுத்தப்படும் என அறிவிக்கப்பட்டுள்ளது.

விலை உயர்வுக்கான காரணமாக, மூலப்பொருட்களின் விலை, உற்பத்தி செலவுகள் மற்றும் செயல்பாட்டுச் செலவுகள் தொடர்ந்து அதிகரித்து வருவதை டிரையம்ப் சுட்டிக்காட்டியுள்ளது. இதுவரை, பண்டிகை கால சலுகைகள் மற்றும் நிறுவனத்தின் சொந்த செலவுகளை கொண்டு விலையை கட்டுப்படுத்தி வந்ததாகவும், ஆனால் நீண்டகால வணிக நிலைத்தன்மைக்காக இந்த முடிவு அவசியமானதாக மாறியுள்ளதாகவும் தெரிவிக்கப்பட்டுள்ளது.

இதனால், டிரையம்ப் பைக் வாங்கத் திட்டமிட்டுள்ள வாடிக்கையாளர்களுக்கு ஒரு முக்கிய ஆலோசனையும் வழங்கப்பட்டுள்ளது. தற்போதைய விலையில் பயனடைய விரும்புவோர், டிசம்பர் 2025 முடிவதற்குள் முன்பதிவு செய்து டெலிவரி பெறுவது நல்ல முடிவாக இருக்கும். ஏனெனில், ஜனவரி 1, 2026க்கு பிறகு வழங்கப்படும் அனைத்து டெலிவரிகளுக்கும் புதிய விலைகள் பொருந்தும்.

இந்த விலை உயர்வு குறித்து விளக்கம் அளித்த டிரையம்ப், வாடிக்கையாளர்களுக்கு பிரீமியம் தரமான தயாரிப்புகள் மற்றும் சேவைகளை தொடர்ந்து வழங்குவதாக உறுதியுடன் இருப்பதாக தெரிவிக்கப்பட்டுள்ளது. எனவே, டிரையம்ப் பைக்கை வாங்க நினைப்பவர்கள், புத்தாண்டுக்கு முன் முடிவு எடுப்பது செலவு சேமிப்பில் உதவும் என கூறப்படுகிறது.