Maruti Dzire Sales: செடான் மார்க்கெட்டில் மாஸ் காட்டும் டிசையர்; மற்ற கார்களின் நிலைமை என்ன?
சுருக்கம்
மார்ச் 2026 விற்பனை நிலவரப்படி, இந்திய செடான் கார் மார்க்கெட்டில் மாருதி சுஸுகி டிசையர் 37.28% வளர்ச்சியுடன் முதலிடத்தில் மாஸ் காட்டுகிறது. ஹூண்டாய் ஆரா, ஹோண்டா அமேஸ் கார்கள் நல்ல விற்பனையை பதிவு செய்துள்ளன. ஆனால், டாடா டிகோர், ஸ்கோடா ஸ்லாவியா போன்ற கார்களின் விற்பனை சரிவை சந்தித்துள்ளது.
இந்திய வாடிக்கையாளர்கள் மத்தியில் செடான் கார்களுக்கு எப்போதுமே ஒரு தனி மவுசு உண்டு. அந்த வகையில், கடந்த மார்ச் 2026 மாத விற்பனையில், மாருதி சுஸுகியின் பிரபலமான டிசையர் செடான் கார் மீண்டும் முதலிடத்தைப் பிடித்துள்ளது. கடந்த மாதம் மட்டும் மொத்தம் 21,224 டிசையர் கார்கள் விற்பனையாகியுள்ளன. இது கடந்த 2025 மார்ச் மாத விற்பனையை (15,460 யூனிட்கள்) விட 37.28% அதிகம். இதன் மூலம், செடான் செக்மென்ட்டில் மட்டும் டிசையர் கார் 55.13% சந்தைப் பங்கைக் கைப்பற்றி மாஸ் காட்டியுள்ளது. இந்த லிஸ்ட்டில் உள்ள மற்ற கார்களின் விற்பனை நிலவரம் எப்படி இருக்கிறது என்று விரிவாகப் பார்க்கலாம்.
ஹூண்டாய் ஆரா விற்பனை 31% அதிகரிப்பு
விற்பனைப் பட்டியலில் ஹூண்டாய் ஆரா இரண்டாவது இடத்தைப் பிடித்துள்ளது. மார்ச் மாதம் மொத்தம் 6,663 ஆரா கார்கள் விற்பனையாகியுள்ளன. இது 31.32% ஆண்டு வளர்ச்சி ஆகும். மூன்றாவது இடத்தில் ஹோண்டா அமேஸ் உள்ளது. இந்த கார் மொத்தம் 4,313 யூனிட்கள் விற்பனையாகி, 20.37% வளர்ச்சியைப் பதிவு செய்துள்ளது. ஃபோக்ஸ்வேகன் விர்டஸ் 2,009 யூனிட்கள் விற்பனையுடன் நான்காவது இடத்தில் உள்ளது. இதன் வளர்ச்சி 3.18% ஆகும்.
டாடா டிகோர் விற்பனை 33% சரிவு
இந்தப் பட்டியலில் ஹூண்டாய் வெர்னா ஐந்தாவது இடத்தில் உள்ளது. இந்த கார் 1,399 யூனிட்கள் விற்பனையாகி, 2.56% வளர்ச்சியைப் பதிவு செய்துள்ளது. டாடா டிகோர் ஆறாவது இடத்திற்கு தள்ளப்பட்டுள்ளது. மார்ச் மாதம் வெறும் 981 டிகோர் கார்கள் மட்டுமே விற்பனையாகியுள்ளன. இது 33.13% ஆண்டு சரிவாகும். இதேபோல், ஸ்கோடா ஸ்லாவியா 887 யூனிட்கள் விற்பனையுடன் ஏழாவது இடத்தில் உள்ளது. இதன் விற்பனை 25.15% குறைந்துள்ளது.
டொயோட்டா கேம்ரிக்கு 9-வது இடம்
மறுபுறம், ஹோண்டா சிட்டி கார் விற்பனைப் பட்டியலில் எட்டாவது இடத்தில் உள்ளது. மார்ச் மாதம் 805 யூனிட்கள் விற்பனையாகி, 31.20% சரிவைச் சந்தித்துள்ளது. இதற்கு அடுத்தபடியாக, டொயோட்டா கேம்ரி 219 யூனிட்கள் விற்பனையுடன் ஒன்பதாவது இடத்தில் உள்ளது. ஆனால், இதன் விற்பனை 7.88% அதிகரித்துள்ளது. ஒட்டுமொத்தமாக, கடந்த மார்ச் மாதம் இந்திய சந்தையில் மொத்தம் 38,500 செடான் கார்கள் விற்பனையாகியுள்ளன. இது கடந்த ஆண்டுடன் ஒப்பிடும்போது 22.40% அதிகமாகும்.
அதிக மைலேஜ், குறைவான விலை
புதிய டிசையர் காரில் 1.2 லிட்டர் Z-சீரிஸ் 3-சிலிண்டர் பெட்ரோல் இன்ஜின் பொருத்தப்பட்டுள்ளது. இந்த இன்ஜின் 80 bhp பவரையும், 112 Nm டார்க்கையும் வெளிப்படுத்துகிறது. இதன் மேனுவல் மாடல் ஒரு லிட்டருக்கு 24.79 கி.மீ மைலேஜும், ஆட்டோமேட்டிக் மாடல் 25.71 கி.மீ மைலேஜும் தருகிறது. சிஎன்ஜி மாடல் ஒரு கிலோவுக்கு 33.73 கி.மீ என்ற சிறப்பான மைலேஜை வழங்குகிறது. பாதுகாப்புக்கு 5-ஸ்டார் ரேட்டிங் பெற்றுள்ளது. புதிய டிசையரின் எக்ஸ்-ஷோரூம் விலை ரூ.6.65 லட்சத்தில் தொடங்கி ரூ.9.39 லட்சம் வரை செல்கிறது.