கோழிகளைத் தாக்கும் மிகவும் ஆபத்தான இந்த தொற்று நோயை தடுக்க இதுதான் ஒரே வழி...
| First Published Nov 21, 2017, 1:00 PM ISTசிறு மூச்சுக்குழல் நோய்
நோயின் தன்மை
** கோழிகளைத் தாக்கும் முக்கியமான தொற்று நோய் சிறு மூச்சுக்குழல் நோயாகும்.இந்நோய் முட்டை உற்பத்தியாகும் குழாயினையும், சில வைரஸ்கள் கோழிகளின் சிறுநீரகத்தையும் பாதிக்கும்.
** இந்நோய் கோழிக்குஞ்சுகளின் எந்த வயதிலும் ஏற்படும். ஆனால் ஆறு வார வயதிற்கு குறைவாக உள்ள கோழிக்குஞ்சுகள் இந்நோயினால் அதிகம் பாதிக்கப்படுகின்றன.
** இந்நோயினால் பாதிக்கப்பட்ட கோழிகளில் முட்டை உற்பத்தியும், முட்டையின் தரமும் முட்டைக்கோழிகளில் பாதிக்கப்படுவதுடன், இறைச்சிக்கோழிகளில் உற்பத்தித்திறனும் பாதிக்கப்படுகிறது.
** மைக்கோபிளாஸ்மா மற்றும் ஈ.கோலை போன்ற நுண்கிருமிகளும் சிறு மூச்சுக்குழல் நோயுடன் சேர்ந்து நோயின் தாக்குதலை அதிகரித்து நோய் தாக்கும் காலத்தை நீட்டிக்கும்.
நோய்க்கான காரணங்கள்
** கரோனா வைரஸ் இந்நோயினை ஏற்படுத்தும் ஒரு முக்கியமான காரணியாகும்.
** கரோனா வைரஸ் பொதுவான ரசாயனங்கள் மற்றும் இயற்பியல் காரணிகளால் எளிதில் கொல்லப்பட்டு விடும்.
** காற்று மூலம், நோய்க்கிருமியினால் அசுத்தமடைந்த தீவனம், தண்ணீர், பாதிக்கப்பட்ட கோழிகளுடன் ஏற்படும் நேரடித் தொடர்பு, நோய்க்கிருமியால் அசுத்தமடைந்த உபகரணங்கள், துணிகள் மற்றும் மனிதர்களால் இந்நோய் எளிதாகப் பரவுகிறது.
** நோய்க்கிருமிகளால் பாதிக்கப்பட்ட கோழிகளின் சளி, எச்சம், முட்டை ஓடுகளில் வைரஸ் இருக்கும்.
** குளிர்காலத்தில் இந்த வைரஸ் சுற்றுப்புறத்தில் சில நாட்களுக்கு உயிரோடு இருக்கும். இதனால் குளிர்காலத்தில் நோயின் தாக்குதல் அதிகமாக இருக்கும். ஆனாலும் எந்த ஒரு பருவ காலத்திலும் இந்நோய் கோழிகளைத் தாக்கும்.
** கோழிப்பண்ணையில் கோழிகளுக்கிடையே எளிதில் இந்நோய் பரவும்.
** கோழிகளுக்கிடையே நேரடித் தொடர்பால் இந்நோய் எளிதில் பரவும்.
** முட்டைகள் வழியாக இந்நோய் எளிதில் பரவும்.
** நோய்க்கிருமியால் அசுத்தமடைந்த உயிரற்ற பொருட்கள் மூலமும் இந்நோய் பரவும்.
நோய் அறிகுறிகள்
** ஆறு வார வயதிற்குக் குறைவாக உள்ள கோழிக்குஞ்சுகளில் தும்மல், இருமல், மூச்சு விட சிரமப்படுதல், கண்கள் மற்றும் மூக்கிலிருந்து நீர் வடிதல் போன்ற அறிகுறிகள் காணப்படும்.
** கொட்டகையினைச் சூடாக்கும் வெப்ப ஆதாரத்தின் கீழ் கோழிக்குஞ்சுகள் அடைந்து காணப்படும்.
** முகம் வீங்கி, முகத்திலுள்ள சைனஸ்களும் வீங்கிக் காணப்படுதல்
** இந்நோயினால் பாதிக்கப்பட்ட கோழிக்குஞ்சுகளில் 25-60% இறப்பு ஏற்படுவதுடன்,நோய் 1-2 வாரம் வரை நீடிக்கும்.
** கோழிக்கொட்டகையிலிருந்து தொலைவிலேயே இந்நோயினால் பாதிக்கப்பட்ட கோழிகள் மூச்சுவிடும் போது ஏற்படும் சத்தம் கேட்கும்.
** வளரும் மற்றும் வயது முதிர்ந்த கோழிகளில், இந்நோய் அறிகுறிகளின் தாக்கம் குறைவாகக் காணப்படும். இக்கோழிகளில் சுவாச மண்டல அறிகுறிகள் குறைந்தும், இறப்பும் குறைவாகவும் காணப்படும்.
** முட்டையிடும் கோழிகள் இந்நோயினால் பாதிக்கப்படும் போது அவற்றின் முட்டை உற்பத்தி 5-50% வரை திடீரெனக் குறைந்து விடும்.
** முட்டையிடும் கோழிகளில் முட்டை உருவாகும் குழாய் இந்நோயினால் பாதிக்கப்படுவது பொதுவாக நடக்கும்.
** முட்டையில் மாறுபாடுகள் காணப்படுதல் (ஒழுங்கற்ற வடிவமுடைய முட்டைகள், முட்டை ஓடு மெல்லியதாகக் காணப்படுதல், முட்டை ஓடு சொரசொரப்பாகக் காணப்படுதல், தோல் முட்டைகள் தோன்றுதல்).
** முட்டையின் தரம் குறைந்து, அதிலுள்ள அல்புமின் தண்ணீர் போலாக மாறிவிடும்.
** சிறுநீரகம் பாதிக்கப்படுவதால், கோழிகள் சோர்ந்து, இறகுகள் துருத்திக்கொண்டு, எச்சம் தண்ணீர் போன்று காணப்படுதல். மேலும் கோழிகள் தண்ணீர் அதிகமாகக் குடிக்கும். மேலும் இறப்பு விகிதம் 0.5-1% (ஒரு வாரத்திற்கு) சிறுநீரகக் கோளாறுகள் ஏற்படும்.
நோய்த் தடுப்பு முறைகள்
** முறையான சுகாதார மேலாண்மை முறைகள் மற்றும் தடுப்பூசி அளிப்பதால் இந்நோயினை கட்டுப்படுத்தலாம்.
சேனலை கிளிக் செய்து பின்தொடரவும்