Thalapathy Vijay Injured: கோட் ஷூட்டிங்கின்போது விபத்தில் சிக்கிய விஜய்? கையில் காயத்தோடு வந்து வாக்களித்தார்
நடிகர் விஜய் ரஷ்யாவில் நடைபெற்று வந்த கோட் படப்பிடிப்பின் போது விபத்தில் சிக்கி கையில் காயமடைந்ததாக தகவல் வெளியாகி இருக்கிறது.
தமிழ் திரையுலகில் முன்னணி மாஸ் நடிகராக வலம் வருபவர் தளபதி விஜய். அவர் நடிப்பில் தற்போது கோட் திரைப்படம் உருவாகி இருக்கிறது. அப்படத்தை வெங்கட் பிரபு இயக்கி வருகிறார். ஏஜிஎஸ் நிறுவனம் தயாரிக்கும் இப்படத்தில் நடிகர் விஜய் இரட்டை வேடத்தில் நடிக்கிறார். கோட் படத்தின் படப்பிடிப்பு தற்போது இறுதிக்கட்டத்தை எட்டி உள்ளது. அப்படத்தின் இறுதிக்கட்ட படப்பிடிப்பு கடந்த சில வாரங்களாக ரஷ்யாவில் நடைபெற்று வருகிறது.
இந்த நிலையில், இன்று நடைபெற்று வரும் மக்களவை தேர்தலில் வாக்களிப்பதற்காக ரஷ்யாவில் இருந்து கிளம்பி வந்துள்ளார் நடிகர் விஜய். ரஷ்யாவில் இருந்து வழக்கமாக துபாய் வந்து அதன்பின்னர் தான் சென்னைக்கு வர முடியும். ஆனால் தற்போது துபாயில் வெள்ளப்பெருக்கு ஏற்பட்டுள்ளதால் அங்கு விமான சேவை முற்றிலும் பாதிக்கப்பட்டு உள்ளது. இதனால் மாஸ்கோ வந்து அங்கிருந்து சென்னைக்கு வந்திருக்கிறார் தளபதி விஜய்.
இதையும் படியுங்கள்... Thalapathy Vijay: 2024 மக்களவை தேர்தலில் தன்னுடைய வாக்கை பதிவு செய்தார் தளபதி விஜய்! வீடியோ
ஜனநாயக கடமையாற்ற வேண்டும் என்பதற்காக சுமார் 12 மணிநேரம் விமான பயணம் மேற்கொண்டு சென்னைக்கு வந்துள்ளார் தளபதி விஜய். இன்று காலை சென்னை வந்த அவர், வீட்டுக்கு வந்த உடன் வாக்களிக்க கிளம்பிவிட்டார். கடந்த முறை தேர்தலின் போது சைக்கிளில் வந்து வாக்களித்த நடிகர் விஜய், இம்முறை காரில் ரசிகர்கள் புடைசூழ வந்து வாக்களித்தார். நீலாங்கரையில் உள்ள வேல்ஸ் பள்ளியில் விஜய் வாக்களிக்க வந்தபோது அங்குள்ள ரசிகர்கள் அவரை சூழ்ந்துகொண்டதால் சிறிது நேரம் பரபரப்பு நிலவியது.
இதையடுத்து அங்கிருந்த போலீசார் கூட்டத்தை அப்புறப்படுத்தி நடிகர் விஜய்யை பத்திரமாக வாக்களிக்க அழைத்து சென்றனர். நடிகர் விஜய் வாக்களிக்க வந்தபோது அவரது கையில் காயம் இருந்ததை பார்த்து அதிர்ச்சி அடைந்த ரசிகர்கள் அவருக்கு என்ன ஆச்சு என கேட்டு வருகின்றனர். சமூக வலைதளங்களில் வெளியாகி உள்ள தகவலின் படி நடிகர் விஜய் ரஷ்யாவில் நடைபெற்று வரும் கோட் படப்பிடிப்பின் போது கை மற்றும் தலையில் காயம் அடைந்ததாகவும், அதனால் தான் அவர் சோர்வுடன் காணப்படுவதாகவும் கூறி வருகின்றனர். ரஷ்யாவில் பைக் சேசிங் காட்சி படமாக்கப்பட்டபோது விஜய்க்கு காயம் ஏற்பட்டதாக கூறப்படுகிறது.
இதையும் படியுங்கள்... Thalapathy Vijay: படப்பிடிப்பை விட கடமை தான் முக்கியம்! ரஷ்யாவில் இருந்து.. வாக்களிக்க பறந்து வந்த தளபதி விஜய்