கறிவேப்பிலை செடி வளர்ப்பதற்கான வழிகள்..

புதிதாக வாங்கிய கறிவேப்பிலை செடியை உடனே நேரடியாக வெயிலில் வைக்காதீர்கள். சில நாட்கள் நிழல் இருக்கும் இடத்தில் வைத்து, பிறகு வெயிலுக்கு மாற்றவும்.

கறிவேப்பிலை செடியின் வேர்கள் எளிதில் அழுகிவிடும். தண்ணீர் தேங்கும் மண்ணில் நட்டால் வேர்கள் பாழாகும். எனவே, மணல் கலந்த, நல்ல நீர் வடிகால் வசதியுள்ள மண்ணைப் பயன்படுத்துங்கள்.

வெறும் களிமண்ணில் அல்லது மணலில் செடியை நட்டால் அதன் வளர்ச்சி பாதிக்கும். மாட்டுச் சாண உரம் அல்லது மண்புழு உரத்தை மண்ணுடன் நன்கு கலந்து, அதன் பிறகு செடியை நடவும்.

அதிகமாக தண்ணீர் ஊற்றுவது கறிவேப்பிலை செடிக்கு நல்லதல்ல. மண்ணைத் தொட்டுப் பார்க்கும்போது ஈரமாக இருந்தால், மீண்டும் தண்ணீர் ஊற்ற வேண்டாம். மண் காய்ந்த பிறகு மட்டும் தண்ணீர் ஊற்றவும்.

ரசாயன உரங்களை அதிகமாகப் பயன்படுத்தினால் செடி கருகிவிடும். கடலைப் புண்ணாக்கை தண்ணீரில் ஊறவைத்துக் கொடுப்பது அல்லது இயற்கை உரங்களை குறிப்பிட்ட இடைவெளியில் கொடுப்பது நல்லது.

நர்சரியில் இருந்து வாங்கும் செடியை, வேரில் உள்ள மண்ணை அகற்றிவிட்டு நட்டால் செடி காய்ந்துவிடும். க்ரோ பேக்கை மாற்றும்போது வேர்களில் சேதம் ஏற்படாமல் கவனமாகச் செய்யுங்கள்.

இலைப்புள்ளி நோய் மற்றும் தண்டுத் துளைப்பான் பூச்சிகள் கறிவேப்பிலை செடியை எளிதில் தாக்கும். ஆரம்பத்திலேயே இதைக் கவனித்து நீக்காவிட்டால், செடி முழுவதும் நாசமாகிவிடும்.