ஐ.நா. பயங்கரவாத எதிர்ப்புக் குழுவுக்கு பாகிஸ்தான் தலைமை; இந்தியா அதிருப்தி

பஹல்காம் தாக்குதலுக்குப் பிறகு, ஐ.நா. பயங்கரவாத எதிர்ப்புக் குழுவில் பாகிஸ்தான் நியமனம் குறித்து இந்தியா அதிருப்தி தெரிவித்துள்ளது. பாகிஸ்தான் பயங்கரவாதத்திற்கு ஆதரவளிப்பதாக இந்தியா குற்றம் சாட்டுகிறது.

ஜம்மு-காஷ்மீரின் பஹல்காம் பகுதியில் சமீபத்தில் நடந்த பயங்கரவாதத் தாக்குதலுக்கு பாகிஸ்தான் ஆதரவு பெற்ற பயங்கரவாதிகளே காரணம் என்று இந்தியா வலியுறுத்தி வரும் நிலையில், ஐக்கிய நாடுகள் சபையின் பாதுகாப்பு கவுன்சிலின் பயங்கரவாத எதிர்ப்பு குழுவின் (UNSC Counter-Terrorism Committee) துணைத் தலைவராக பாகிஸ்தான் நியமிக்கப்பட்டிருக்கிறது.

சமீபத்தில் நடந்த பஹல்காம் பயங்கரவாதத் தாக்குதலில் 26 பொதுமக்கள் உயிரிழந்தனர். இந்தத் தாக்குதலுக்குப் பின்னால் பாகிஸ்தான் இருப்பதாக இந்தியா குற்றம் சாட்டுகிறது. அதற்குப் பதிலடியாக 'ஆபரேஷன் சிந்தூர்' என்ற ராணுவ நடவடிக்கையையும் மேற்கொண்டது.

இந்தச் சூழ்நிலையில், ஐ.நா.வின் பயங்கரவாத எதிர்ப்பு குழுவின் துணைத் தலைவராக பாகிஸ்தானை நியமித்திருப்பது குறித்து இந்தியா தனது அதிருப்தியை வெளிப்படுத்தியுள்ளது.

பாகிஸ்தானின் ஐ.நா. பதவிகள்:

ஐ.நா. பாதுகாப்பு கவுன்சிலின் பயங்கரவாத எதிர்ப்பு குழுவின் துணைத் தலைவர் பதவி மட்டுமல்லாமல், தலிபான் மீதான தடைகளைக் கண்காணிக்கும் குழுவின் (Taliban Sanctions Committee) 2025ஆம் ஆண்டிற்கான தலைமைப் பதவியும் பாகிஸ்தானுக்கு வழங்கப்பட்டுள்ளது.

ஆவணங்கள் மற்றும் நடைமுறை கேள்விகள் குறித்த முறைசாரா பணிக் குழுக்கள் (Informal Working Group on Documentation and Other Procedural Questions) மற்றும் தடைகள் தொடர்பான பொதுப் பணிக் குழுக்கள் (General UNSC Sanctions Issues) ஆகியவற்றின் இணைத் தலைவராகவும் பாகிஸ்தான் செயல்பட உள்ளது.

இந்தியாவின் கருத்து:

இந்திய வெளியுறவு அமைச்சகம் இது குறித்து இன்னும் அதிகாரப்பூர்வமான அறிக்கையை வெளியிடவில்லை. இருப்பினும், பஹல்காம் தாக்குதலுக்குப் பாகிஸ்தான்தான் பொறுப்பு என இந்தியா தொடர்ந்து கூறிவருகிறது. பயங்கரவாத எதிர்ப்புக் கொள்கை பற்றியும் பஹல்காம் தாக்குதலுக்கு பதிலடி நடத்திய ஆபரேஷன் சிந்தூர் ராணுவ நடவடிக்கை பற்றியும் உலக நாடுகளுக்கு விளக்கம் அளிக்க தூதுக் குழுக்களையும் இந்தியா அனுப்பியது.

இந்நிலையில், பாகிஸ்தானுக்குக் கிடைத்துள்ள இந்தப் பதவிகள் குறித்து இந்தியா அதிருப்தி அடைந்துள்ளது. பாகிஸ்தான் நீண்டகாலமாக பயங்கரவாதத்திற்கு ஆதரவு அளிப்பதாக இந்தியா குற்றம் சாட்டுகிறது. இந்த நியமனம் சர்வதேச சமூகத்தின் பயங்கரவாத எதிர்ப்பு நிலைப்பாட்டிற்கு முரணானது என அரசியல் பார்வையாளர்கள் விமர்சித்துள்ளனர்.

முன்னதாக, 2022ஆம் ஆண்டில் இந்தியா ஐ.நா. பாதுகாப்பு கவுன்சிலின் பயங்கரவாத எதிர்ப்பு குழுவின் தலைவராக இருந்தது குறிப்பிடத்தக்கது. பாகிஸ்தான் தற்போது ஐ.நா. பாதுகாப்பு கவுன்சிலில் நிரந்தரமற்ற உறுப்பினராக 2025-26 காலத்திற்குத் தேர்ந்தெடுக்கப்பட்டுள்ளது.