இந்தியா - அமெரிக்கா இடையே ஜூலை 8-ம் தேதி வர்த்தக ஒப்பந்தம்?

இந்தியா மற்றும் அமெரிக்கா இடையே நீண்டகாலமாக எதிர்பார்க்கப்பட்ட இடைக்கால வர்த்தக ஒப்பந்தம் ஜூலை 8 அன்று அறிவிக்கப்படலாம். இருதரப்பிலும் அனைத்து விதிமுறைகளும் ஒப்புக் கொள்ளப்பட்டுள்ளதாகத் தகவல்கள் தெரிவிக்கின்றன.

இந்தியா மற்றும் அமெரிக்கா இடையேயான நீண்டகாலமாக எதிர்பார்க்கப்பட்ட இடைக்கால வர்த்தக ஒப்பந்தம் ஜூலை 8-ம் தேதி அறிவிக்கப்படலாம் எனத் தகவல்கள் தெரிவிக்கின்றன. இருதரப்பிலும் அனைத்து விதிமுறைகளும் ஒப்புக் கொள்ளப்பட்டுள்ளதாகக் கூறப்படுகிறது.

இந்தியா சார்பில், வர்த்தகத் துறை சிறப்புச் செயலாளரும், தலைமைப் பேச்சுவார்த்தையாளருமான ராஜேஷ் அகர்வால் தலைமையிலான குழு பேச்சுவார்த்தையை இறுதி செய்ய வாஷிங்டனில் முகாமிட்டுள்ளது.

டிரம்ப்பின் காலக்கெடு

இந்த ஒப்பந்தம் சரியான நேரத்தில் வந்துள்ளது. உலக நாடுகள் மீது பரஸ்பர வரிகளை விதிப்பதற்கான டிரம்ப்பின் காலக்கெடு ஜூலை 9-ம் தேதியுடன் முடிவடைய உள்ளது. வரிக் காலக்கெடு குறித்து "எங்களுக்கு எது வேண்டுமோ அதுதான்" என்று வெள்ளிக்கிழமை அவர் கருத்து தெரிவித்த பின்னர், தனது நிர்வாகம் அவற்றை நீட்டிக்க வாய்ப்பில்லை என்று ஃபாக்ஸ் நியூஸிடம் டிரம்ப் கூறினார்.

வர்த்தகப் பற்றாக்குறையைக் குறைக்கும் நோக்கில் ஏப்ரல் 2-ம் தேதி டிரம்ப் அறிவித்த இந்திய இறக்குமதிகள் மீதான 26 சதவீத வரிகளை அமெரிக்கா ஜூலை 9 வரை நிறுத்தி வைத்துள்ளது. அதேநேரம், அடிப்படை வரி 10 சதவீதம் இன்னும் அமலில் உள்ளது. இந்தியா கூடுதல் 26 சதவீத வரியில் இருந்து முழு விலக்கு கோரி வருகிறது.

விரிவான இருதரப்பு வர்த்தக ஒப்பந்தம்

இரு நாடுகளும் அக்டோபர் மாதத்திற்குள் பல்துறை, விரிவான இருதரப்பு வர்த்தக ஒப்பந்தத்தின் (BTA) முதல் கட்டத்தை உருவாக்க பணியாற்றி வருகின்றன.

சமீபகாலமாக, இந்தியாவுடன் ஒரு பெரிய வர்த்தக ஒப்பந்தம் குறித்து டிரம்ப் மீண்டும் மீண்டும் சூசகமாக தெரிவித்துள்ளார். கடந்த வாரம், தனது நிர்வாகம் அனைத்து வர்த்தகத் தடைகளையும் நீக்க விரும்புவதாகவும், அதை "நினைத்துப் பார்க்க முடியாதது" என்றும் அவர் கூறியிருந்தார்.

இந்தியா மற்றும் அமெரிக்கா இடையேயான வர்த்தக ஒப்பந்தம் முதன்மையாக விவசாயம், வாகனங்கள், தொழில்துறை பொருட்கள் மற்றும் தொழிலாளர் சார்ந்த பொருட்கள் போன்ற முக்கிய துறைகளில் கவனம் செலுத்துகிறது.

அமெரிக்காவிற்கு வரிச்சலுகை

வேளாண்மை மற்றும் பால்பண்ணை துறைகள், இந்தியா அமெரிக்காவிற்கு வரிச்சலுகைகளை வழங்குவதற்கு கடினமான மற்றும் சவாலான பகுதிகளாகும். இந்தியா இதுவரை கையெழுத்திட்ட எந்தவொரு சுதந்திர வர்த்தக ஒப்பந்தத்திலும் பால்பண்ணைத் துறையைத் திறக்கவில்லை.

அமெரிக்கா சில தொழில்துறை பொருட்கள், ஆட்டோமொபைல்கள் - குறிப்பாக மின்சார வாகனங்கள், ஒயின்கள், பெட்ரோ கெமிக்கல் பொருட்கள், பால்பண்ணை மற்றும் ஆப்பிள், மரக் கொட்டைகள், மரபணு மாற்றப்பட்ட பயிர்கள் போன்ற விவசாயப் பொருட்களுக்கு வரிச்சலுகைகளை எதிர்பார்க்கிறது.

இந்தியா முன்மொழியப்பட்ட வர்த்தக ஒப்பந்தத்தில் ஜவுளி, ரத்தினங்கள் மற்றும் நகைகள், தோல் பொருட்கள், ஆடைகள், பிளாஸ்டிக், இரசாயனங்கள், இறால், எண்ணெய் விதைகள், திராட்சை மற்றும் வாழைப்பழங்கள் போன்ற தொழிலாளர் சார்ந்த துறைகளுக்கு வரிச்சலுகைகளை நாடுகிறது.