Largest Airport : உலகிலேயே மிகப் பெரியதான இந்த ஏர்போர்ட்டின் பரப்பளவு ஒரு நாட்டைவிடப் பெரியது! கின்னஸ் சாதனையும் படைத்துள்ள அந்த பிரம்மாண்டமான ஏர்போர்ட் எது? அதன் முழு விவரம் இதோ!
உலகில் பல நூறு பிரம்மாண்டமான விமான நிலையங்கள் உள்ளன. சில ஏர்போர்ட்டுகள் தினமும் லட்சக்கணக்கான பயணிகளைக் கையாள்வதில் பெயர் பெற்றவை; இன்னும் சில நவீன தொழில்நுட்பம் மற்றும் அதிநவீன சொகுசு வசதிகளால் அனைவரையும் ஈர்க்கின்றன. ஆனால், நிலப்பரப்பைப் பொறுத்தவரை இவையனைத்தையும் மிஞ்சும் வகையில் ஒரு விமான நிலையம் உள்ளது. இதன் மொத்த பரப்பளவு சுமார் 776 சதுர கிலோமீட்டர்கள் ஆகும்! அதாவது, பஹ்ரைன் அல்லது சிங்கப்பூர் போன்ற ஒரு சிறிய நாட்டின் நிலப்பரப்பைக் காட்டிலும் இந்த ஏர்போர்ட் மிகப்பெரியது. கின்னஸ் உலக சாதனை புத்தகத்திலும் இடம்பிடித்துள்ள அந்த பிரம்மாண்டமான ஏர்போர்ட் எங்குள்ளது? அதன் சிறப்பம்சங்கள் என்னென்ன? இதோ சில சுவாரஸ்யமான தகவல்கள்!
சவுதி அரேபியாவின் தம்மாம் நகரில் உள்ள கிங் ஃபஹத் சர்வதேச விமான நிலையம் (King Fahd International Airport) உலகிலேயே அதிக நிலப்பரப்பைக் கொண்ட ஏர்போர்ட் என்ற பெருமையைப் பெற்றுள்ளது. கின்னஸ் உலக சாதனைகளிலும் இந்த ஏர்போர்ட் இடம்பிடித்துள்ளது. சுமார் 776 சதுர கிலோமீட்டர் பரப்பளவில் அமைந்துள்ள இந்த ஏர்போர்ட்டின் பிரம்மாண்டம் உண்மையிலேயே ஆச்சரியத்தை ஏற்படுத்துகிறது. சிங்கப்பூர் நாட்டின் மொத்த நிலப்பரப்பை விட இது பெரியது.
இவ்வளவு பெரிய ஏர்போர்ட்டில் குறைந்த பகுதியே பயன்படுகிறது!
கிங் ஃபஹத் சர்வதேச விமான நிலையத்தின் மொத்த பரப்பளவு 776 சதுர கிலோமீட்டர் என்றாலும், விமானங்களின் இயக்கம் மற்றும் பயணிகள் சேவைக்குப் பயன்படுத்தப்படும் பகுதி இதைவிடக் குறைவுதான். அறிக்கைகளின்படி, சுமார் 37 முதல் 43 சதுர கிலோமீட்டர் பகுதி மட்டுமே தற்போது ஏர்போர்ட்டின் முக்கிய செயல்பாடுகளுக்குப் பயன்படுத்தப்படுகிறது. மீதமுள்ள பரந்த பகுதி எதிர்கால விரிவாக்கம், பிற உள்கட்டமைப்பு மேம்பாடு மற்றும் பாதுகாப்பு நோக்கங்களுக்காக ஒதுக்கப்பட்டுள்ளது. அதாவது, முழு 776 சதுர கிலோமீட்டர் பகுதியிலும் ஏர்போர்ட் கட்டடங்கள், ரன்வேக்கள் மற்றும் டெர்மினல்கள் மட்டுமே இல்லை.
இந்த ஏர்போர்ட்டின் மற்றொரு சிறப்பம்சம் இதன் ஆறு அடுக்கு முக்கிய டெர்மினல் கட்டடம். பயணிகளின் வசதிக்காக நவீன வசதிகள் இங்கு அமைக்கப்பட்டுள்ளன. ஏர்போர்ட் டெர்மினலின் மேற்புறத்தில் ஒரு பெரிய மசூதியும் கட்டப்பட்டுள்ளது. ஒரே நேரத்தில் ஆயிரக்கணக்கான மக்கள் தொழுகை செய்யும் வகையில் இந்த மசூதி வடிவமைக்கப்பட்டுள்ளது. ஏர்போர்ட்டின் கட்டிடக்கலை மற்றும் வசதிகள் சவுதி அரேபியாவின் நவீன உள்கட்டமைப்பு மேம்பாட்டைப் பிரதிபலிக்கின்றன.
சவுதி அரச குடும்பத்தினருக்கென தனி ராயல் டெர்மினல்!
கிங் ஃபஹத் சர்வதேச விமான நிலையத்தில் சவுதி அரச குடும்பத்தினர் மற்றும் வெளிநாட்டுப் பிரமுகர்களின் பயணத்திற்காகத் தனி ராயல் டெர்மினல் வசதியும் உள்ளது. சாதாரணப் பயணிகள் டெர்மினலை விட வித்தியாசமாகச் சிறப்புப் பாதுகாப்பு மற்றும் தேவையான வசதிகள் இங்கு அமைக்கப்பட்டுள்ளன. இது தவிர, பிரம்மாண்டமான பயணிகள் விமானங்கள் பாதுகாப்பாகத் தரையிறங்கவும், டேக்-ஆஃப் ஆகவும் வசதியாக சுமார் நான்கு கிலோமீட்டர் நீளமுள்ள இரண்டு ரன்வேக்கள் கட்டப்பட்டுள்ளன. நவீன விமானப் போக்குவரத்து மேலாண்மை அமைப்பும் இங்குள்ளது.
உலகின் பரபரப்பான ஏர்போர்ட்டுகளின் பட்டியலில் இந்த ஏர்போர்ட் முதல் இடத்தில் இல்லை. ஆனால், மொத்த நிலப்பரப்பைப் பொறுத்தவரை இது உலகின் கவனத்தை ஈர்த்துள்ளது. பொதுவாக ஏர்போர்ட்டுகளின் திறன் பயணிகள் எண்ணிக்கை, விமானப் போக்குவரத்து மற்றும் சரக்குப் போக்குவரத்தை அடிப்படையாகக் கொண்டு அளவிடப்படுகிறது. ஆனால், கிங் ஃபஹத் சர்வதேச விமான நிலையத்தின் சிறப்பம்சம் அதன் பிரம்மாண்டமான நிலப்பரப்பு. ஒரு நாட்டின் நிலப்பரப்புடன் ஒப்பிடக்கூடிய அளவு பரந்த பகுதியில் கட்டப்பட்டுள்ள இந்த ஏர்போர்ட், உலகின் ஆச்சரியமான உள்கட்டமைப்புத் திட்டங்களில் ஒன்றாகும்.
