Varahi Amman Worship : ஐப்பசி மாத தேய்பிறை பஞ்சமி..வாராஹி அம்மனுக்கு இந்த வழிபாடுகளைச் செய்யுங்கள்!

Varahi Amman Worship : அக்டோபர் 30 தேய்பிறை பஞ்சமி அன்று வாராஹி அம்மனை எப்படி வழிபடுவது? நீலச் சங்குப்பூ, கல் உப்பு, கிழங்கு வகைகள், சிவப்பு பழங்கள் படைக்கும் முறை மற்றும் வழிபாட்டுப் பலன்கள் பற்றி அறியுங்கள்.

ஐப்பசி மாத தேய்பிறை பஞ்சமி

வாழ்க்கையில் எத்தனை தடைகள் வந்தாலும், தன்னை நம்பி சரணடையும் பக்தர்களைக் காத்து அருள்பவள் அன்னை ஸ்ரீ வாராஹி.

எதிரிகளால் ஏற்படும் தொல்லைகள், தீராத கடன் சுமை, குடும்பத்தில் நிலவும் மனக்கவலை, தொழிலில் ஏற்படும் முட்டுக்கட்டைகள் எனப் பல பிரச்சினைகளிலிருந்து விடுபட வேண்டும் என்று அம்மனிடம் மனமுருகி வேண்டிக்கொள்ளும் பக்தர்கள் ஏராளம்.

சப்த கன்னியர்களில் ஒருவராகப் போற்றப்படும் வாராஹி அம்மன், வீரத்தையும் துணிவையும் வழங்கும் காவல் தெய்வமாக ஆன்மிக நம்பிக்கைகளில் சிறப்பிடம் பெற்றுள்ளார். அந்த வகையில், அம்மனின் அருளைப் பெறுவதற்கு உகந்த நாளாகக் கருதப்படும் தேய்பிறை பஞ்சமி அக்டோபர் 30, வெள்ளிக்கிழமை வருகிறது.

இந்நாளில் அம்மனுக்கு செய்யக்கூடிய சிறப்பு வழிபாடுகள் என்ன? அம்மனுக்கு பிடித்ததாகக் கருதப்படும் பொருள்கள் என்ன? என்பது குறித்து இங்கே விரிவாகப் பார்க்கலாம்.

தேய்பிறை பஞ்சமி எப்போது?

'பஞ்ச என்றால் வடமொழியில் 'ஐந்து' என்று பொருள். அமாவாசை/பௌர்ணமிக்குப் பிறகு வரும் ஐந்தாவது நாள் பஞ்சமி என அழைக்கப்படுகிறது. ஒரு மாதத்தில் வளர்பிறை, தேய்பிறை என இரண்டு முறை பஞ்சமி திதி வரும்.

தேதி : தேய்பிறை பஞ்சமி நாளை மறுநாள் அக்டோபர் 30, (ஐப்பசி 13) வெள்ளிக்கிழமை அன்று வருகிறது. பஞ்சமி திதி அன்று மாலை 7:25 மணியுடன் முடிவடைகிறது.

வாராஹி அம்மனை வழிபட பஞ்சமி திதி சிறப்பானதாகக் கருதப்படுகிறது. குறிப்பாக, தேய்பிறை பஞ்சமியில் வழிபடுவதன் மூலம் வாழ்க்கையில் உள்ள தடைகள் குறைந்து, மனத்துணிவும் நம்பிக்கையும் அதிகரிக்கும் என்பது பக்தர்களின் ஆன்மிக நம்பிக்கை.

பஞ்சமி சிறப்பு?

வாராஹி அம்மனுக்கு ஏன் பஞ்சமி சிறப்பு?

வாராஹி அம்மன், சப்த மாதர்களில் ஒருவராகப் போற்றப்படுகிறார். பன்றி முகமும் பெண் உடலும் கொண்ட தேவியாகச் சித்தரிக்கப்படும் இவர், சக்தி, துணிவு, பாதுகாப்பு மற்றும் வெற்றியின் அடையாளமாக வழிபடப்படுகிறார்.

பஞ்சமி திதி வாராஹி அம்மனுக்கு உகந்த நாளாகக் கருதப்படுவதால், இந்த நாளில் தீபமேற்றி மலர்கள் சாத்தி, மந்திரங்களைச் சொல்லி வழிபடுவது பலரது வழக்கம். கடன் சுமை, தொழில் தடைகள், சொத்து தொடர்பான பிரச்சினைகள் போன்றவற்றிலிருந்து விடுபட வேண்டும் எனப் பக்தர்கள் வேண்டிக்கொள்கிறார்கள்.

வாராஹி அம்மனுக்கு செய்ய வேண்டிய 3 சிறப்பு வழிபாடுகள்

நீலச் சங்குப்பூ, மருதாணி இலைகளால் அர்ச்சனை

வாராஹி அம்மன் வழிபாட்டில் நீலம் மற்றும் சிவப்பு நிறங்களுக்கு முக்கியத்துவம் கொடுக்கப்படுவது வழக்கம். நீலச் சங்குப்பூ கிடைத்தால் அதை அம்மனுக்குச் சமர்ப்பிக்கலாம். சாத்திரத்தில் சங்கு பூவிற்கு தோல்வியே இல்லாதது என்று பொருள்.

எனவே, நீலச் சங்குப்பூக்களையும், மகாலட்சுமி வாசம் செய்யும் சுத்தமான மருதாணி இலைகளையும் அம்மனுக்கு சமர்ப்பித்து, குடும்ப நலன் மற்றும் மன அமைதிக்காக வேண்டிக்கொள்ளவும்.

அம்மனை வைத்து வழிபடும் முறை

கல் உப்பில் வாராஹி அம்மனை வைத்து வழிபடும் முறை

ஒரு சிறிய செம்புத் தட்டு அல்லது வெற்றிலையில் கல் உப்பைப் பரப்பி, அதன் மீது வாராஹி அம்மனின் சிறிய படத்தை அல்லது சிலையை வைத்து வழிபட வேண்டும். பின்னர் அம்மனுக்கு மலர்கள் சாத்தி, தீபமேற்றி மனதார வேண்டிக்கொள்ளுங்கள்.

குறிப்பாக, வாழ்க்கையில் உள்ள தடைகள் நீங்கவும், எதிர்மறை எண்ணங்கள் விலகவும், குடும்பத்தில் அமைதி மற்றும் செழிப்பு பெருகவும் அம்மனைப் பிரார்த்திக்கலாம்.

ஆன்மிக நம்பிக்கையின்படி, கல் உப்பைப் பயன்படுத்திச் செய்யப்படும் இந்த வழிபாடு எதிர்மறைத் தன்மைகள் நீங்கி, வீட்டில் மங்களம் பெருகுவதற்கான வழிபாடாகக் கருதப்படுகிறது.

கிழங்கு வகைகள்

கிழங்கு வகைகள், சிவப்பு நிறப் பழங்களைப் படைத்தல்

வாராஹி அம்மனுக்கு மண்ணுக்குள் விளையும் கிழங்கு வகைகளையும், சிவப்பு நிறப் பழங்களையும் படைத்து வழிபடலாம்.

இதற்காகச் சர்க்கரைவள்ளிக் கிழங்கு, சேனைக்கிழங்கு போன்ற கிழங்கு வகைகளையும், மாதுளை, சிவப்பு ஆப்பிள் போன்ற பழங்களையும் எடுத்துக்கொள்ளலாம். இவற்றுடன் வெற்றிலை, பாக்கு ஆகியவற்றையும் சேர்த்துப் படைக்கலாம்.

படைக்கும் பொருட்களைச் சுத்தமான தட்டில் வைத்து, வாராஹி அம்மனுக்குத் தீபமேற்றி, மலர்கள் சாத்தி மனதார வழிபட வேண்டும்.

குடும்பத்தில் மகிழ்ச்சி நிலைக்கவும், பொருளாதார முன்னேற்றம் கிடைக்கவும், வாழ்க்கையில் எதிர்கொள்ளும் தடைகளைச் சமாளிக்கும் மனவலிமை கிடைக்கவும் அம்மனிடம் வேண்டிக்கொள்ளலாம்.

மஞ்சள் நீர் அபிஷேகம்

வாராஹி அம்மனுக்கு மஞ்சள் நீர் அபிஷேகம்

வாராஹி அம்மனுக்கு மஞ்சள் கலந்த நீரால் அபிஷேகம் செய்வது சில வழிபாட்டு மரபுகளில் சிறப்பாகக் கருதப்படுகிறது. மஞ்சள் மங்களம், தூய்மை ஆகியவற்றின் அடையாளமாகப் போற்றப்படுகிறது.

அம்மனுக்கு மஞ்சள் நீர் அபிஷேகம் செய்து, மலர்கள் சாத்தி, தீபமேற்றி வழிபடலாம். இதனால் குடும்பத்தில் நிம்மதி, நலன், தடைகளை எதிர்கொள்ளும் மனவலிமை கிடைக்க வேண்டும் என்று பக்தர்கள் வேண்டிக்கொள்கிறார்கள்.

மந்திரம்

வாராஹி அம்மனுக்கு விளக்கேற்றி எந்த மந்திரத்தைச் சொல்லலாம்?

பூஜையின்போது நல்லெண்ணெய் அல்லது நெய் தீபம் ஏற்றி,

”ஸ்ரீ வாராஹி அம்மன் மந்திரம்

ஓம் வம் வாராஹ்யை நமஹ”

என்ற மந்திரத்தைச் உங்கள் வசதிக்கேற்ப 11 அல்லது 108 முறை சொல்லி வணங்கலாம்.

மந்திரத்தைச் சொல்லும்போது மனதை ஒருமுகப்படுத்தி, நல்ல எண்ணங்களுடன் வழிபடுவது முக்கியம். மந்திர எண்ணிக்கையைவிட மனத்தூய்மையும் உண்மையான பக்தியும் முக்கியம்.

வாராஹி அம்மனை வழிபடுவதால் கிடைக்கும் என நம்பப்படும் பலன்கள்

தடைகள் குறைய: முயற்சிகளில் தொடர்ந்து ஏற்படும் தடைகளைத் தாண்ட மனத்துணிவு கிடைக்கும் என்பது நம்பிக்கை.

கடன் சுமையிலிருந்து விடுபட: பொருளாதாரச் சிக்கல்கள் குறைந்து வாழ்க்கையில் முன்னேற்றம் ஏற்பட வேண்டும் என வேண்டிக்கொள்ளலாம்.

எதிர்ப்புகளைச் சமாளிக்க: எதிரிகளால் ஏற்படும் தொல்லைகளை எதிர்கொள்ளும் தைரியம் கிடைக்க வேண்டி வழிபடுகிறார்கள்.

தொழில், வேலை முன்னேற்றம்: புதிய வாய்ப்புகள் கிடைக்கவும், எடுத்த காரியங்கள் வெற்றியடையவும் பிரார்த்திக்கிறார்கள்.

குடும்ப நிம்மதி: குடும்பத்தில் ஒற்றுமை, அமைதி மற்றும் நலன் நிலைக்க வேண்டிக்கொள்கிறார்கள்.

மனதில் உள்ள கவலைகளை அம்மனிடம் ஒப்படைத்து, நம்பிக்கையுடனும் நேர்மையான முயற்சிகளுடனும் வாழ்க்கையில் முன்னேற வேண்டிக்கொள்ளுங்கள். வாராஹி அம்மனின் அருளால் அனைவரது இல்லங்களிலும் அமைதியும் நலமும் பெருகட்டும்.